Víkurfréttir - 30.08.2018, Blaðsíða 10
10 LJÓSANÆTURBLAÐ VÍKURFRÉTTA f immtudagur 30. ágúst 2018 // 33. tbl. // 39. árg.
„Að sjálfsögðu var ég dálítið búin að gæla við þá hugmynd að gaman væri að
fá þessi verðlaun en um leið og ég mætti á hátíðina og sá alla hina þá hugsaði
ég að það væri lítill möguleiki,“ segir Erla Svava Sigurðardóttir, eigandi Yarm.
Erla tók þátt á Handverkshátíð sem fór fram í Eyjafirði fyrr í ágúst og hlaut
hún þar titilinn Handverksmaður ársins 2018.
„Hátíðin var mjög umfangsmikil og
flott, ég heyrði einhversstaðar að í
kringum 10.000 manns hafi komið á
sýninguna. Auðvitað var mjög gaman
að fá verðlaunin enda eru þau mikil
viðurkenning og ákveðin staðfesting
á því að maður er að gera eitthvað
rétt og eigi að halda ótrauður áfram.“
Erlu finnst einnig mjög mikilvægt og
ánægjulegt að taka þátt í sýningum
sem þessum og hitta annað hand-
verks- og listafólk.
Spinnur sitt eigið garn
Erla hafði aldrei haft áhuga á því að
prjóna eða hekla þó hún hafi miklar
prjónakonur í kringum sig. En þegar
hún rakst á handleggjaprjónaðar
vörur á Pinterest vissi hún strax að
þetta væri eitthvað fyrir sig. „Ég rakst
strax á veggi þegar ég fór að leita af
garni til þess að prjóna úr, það er
ekki selt svona gróft garn á Íslandi
og því þurfti ég að panta garn að utan
sem var bæði dýrt og endingarlítið.“
Það varð úr, að Erla ákvað að spinna
sitt eigið garn úr íslenskri ull. Það
tók marga mánuði að finna réttu
aðferðina og fá íslensku ullina til sam-
starfs. En Erla segir íslenska ull að
mörgu leyti líka okkur Íslendingum,
frekar úfin, villt, sterk og full af
karakter. „Mér finnst ótrúlegt að ég
hafi ekki gefist upp, það tók marga
mánuði að ná garninu notendavænu
og endingargóðu.“
Eftir að Erla fór að sjá garnið sem
hún gerði sjálf úr íslenskri ull vissi
hún að þetta væri eitthvað sérstakt,
þetta er eitthvað sem enginn annar
er að gera og garnið miklu betra en
það sem er gert úr erlendri ull. Þannig
fæddist viðskiptahugmyndin.
Yarm verður til
Það var mamma Erlu sem kom með
hugmyndina að nafninu Jarm. „Þegar
ég var að byrja að spinna þá var allt
heimilið mitt undirlagt í ull og lyktaði
oft eins og fjárhús, svo þegar ég fór
að hugsa um nafn þá sagði mamma
að það lægi beinast við að þetta héti
bara Jarm.“ Erlu fannst Jarm passa
vel þar sem hún vildi bara eitt ein-
falt orð og eftir að hafa kastað þessu
fram og til baka milli ættingja og vina
varð Yarm fyrir valinu. Því þá er það
borið eins fram á íslensku og ensku og
þýðir nánast það sama og því myndu
útlendingar tengja við það.
Síðasta vetur tók Erla þátt í sýningu
í Ráðhúsi Reykjavíkur þar sem hún
hlaut Skúlaverðlaunin sem eru ný-
sköpunarverðlaun veitt fyrir bestu
nýju hönnunina. Eftir að hafa hlotið
þessi verðlaun og einstaklega góðar
viðtökur á sýningunni ákvað Erla að
hún skuldaði þessum draum að hún
gæfi allt í hann. Hún hætti í vinnunni
um áramótin og hefur síðan þá sett
alla sína krafta í Yarm.
„Ég er með nýjar vörur á markaðnum
en framleiðslugetan er enn frekar
lítil þar sem ég er ein og vinn þetta
þetta allt frá grunni. Þess vegna hef ég
verið að halda aðeins í mér varðandi
markaðssetningu. En það hefur ekki
komið að sökum, því síðan ég byrjaði
hef ég alltaf verið með biðlista.“ segir
Erla en hún byrjaði að selja vörur
fyrir einu og hálfu ári. Það tekur Erlu
minnst fimmtán tíma að vinna eina
vöru og því er starfið mjög tímafrekt
þó að það sé skemmtilegt fyrir hana.
Framtíðarhorfur
Erla segist vera mikil draumóra-
manneskja og á góðum dögum sjá
fyrir sér heimsyfirráð. „Mig langar að
þetta vaxi meira og að ég geti afgreitt
hraðar,“ segir Erla en hana langar að
sjá Yarm sem lítið en kröftugt fyrir-
tæki með litla yfirbyggingu og nokkra
starfsmenn.
„Helsti draumurinn núna er að eign-
ast spunavél, en það eru ekki til vélar
sem spinna svona gróft garn og því
þyrfti ég að láta sérsmíða vél fyrir
mig.“ Ef að Erla fengi spunavél gæti
hún spunnið mikið hraðar og jafnvel
farið að selja garnið sjálft sem mikil
eftirspurn er eftir.
Erla tekur þátt í sýningu á Ljósanótt
á Park Inn hótelinu en það hefur hún
aldrei gert áður og er mjög spennt
fyrir því.
Að lokum nefnir Erla forréttindi
hennar að geta búið sér til starf og
unnið heima hjá sér. „Ég er með þrjú
börn og ég er mjög ánægð með það
að börnin mín alast upp við það að
mamma þeirra sé að spinna á rokk-
inn í stað þess að hanga yfir sím-
anum,“ segir Erla en hún er vön því
að vera tilbúin með ull til að spinna
við sófann þegar hún og fjölskyldan
eru með kósýkvöld saman.
„Börnin mín alast upp
við að sjá mömmu sína
spinna ull á rokk,“
– segir Erla Svava Sigurðardóttir,
eigandi Yarm og Handverksmaður ársins 2018
Brynja Ýr
Júlíusdóttir
brynja@vf.is
VIÐTAL
Helsti draumurinn núna
er að eignast spunavél, en
það eru ekki til vélar sem
spinna svona gróft garn
og því þyrfti ég að láta sér-
smíða vél fyrir mig.