Fréttir - Eyjafréttir - 19.05.2016, Blaðsíða 16
16 Eyjafréttir / Fimmtudagur 19. maí 2016
Á dögunum kom ég í sérlega
ánægjulega heimsókn til Vest-
mannaeyja. Mér hefur alla tíð
fundist dugnaður og framtakssemi
einkennandi fyrir Eyjamenn og er
óhætt að segja að þessi heimsókn
hafi sýnt það og sannað. Sú
framtakssemi birtist ljóslifandi í
heimsókn okkar til Gríms kokks.
Það var ekki annað hægt en að
hrífast af þeirri ástríðu sem
einkennir allt þeirra starf. Við
borðuðum bestu löngu í heimi hjá
Sigga á Gott og áttum sérlega
skemmtilegt skátaspjall við Frosta.
Þegar ég komst að því að þeir væru
allir bræður mátti ég til með að
spyrja Gísla föður þeirra í einlægni
hvert leyndarmálið væri. Þá sagði
hann mér af systur þeirra, en hún og
hennar sonur stæðu að baki
Slippnum og Mat og Drykk, en á
báðum veitingastöðum höfum við
notið sérlega góðs matar. Já Binni í
Gröf má vera stoltur af sínum
afkomendum.
Við heimsóttum Vinnslustöðina,
en þar standa nú yfir miklar
framkvæmdir. Auður tók á móti
okkur hjá eldri borgurum á
Hraunbúðum. Þar hittum við
sérlega hressa Eyjapeyja og
-meyjar. Áttum m.a. ánægjulegt
spjall við Möggu Karls, móður
mesta sundkappa þjóðarinnar og
við Sillu, en hún og systur hennar á
aldrinum 91–95 voru allar búnar að
ákveða að kjósa konu og tóku mér
opnum örmum. Á rölti um bæinn
kíktum við svo í verslanir og var vel
tekið. Linda hjá Smart tískuverslun
kannaðist í fyrstu ekki við forseta-
frambjóðandann en eftir fjörugar
umræður gerðist hún stuðningskona
og skyrtan sem stóð til að kaupa
varð framlag hennar til framboðsins
og kann ég henni bestu þakkir fyrir.
Kvenkrafturinn var allsráðandi við
lok ferðar þegar kvennalið ÍBV tók
á móti kvennaliði Blika þar sem
tekist var á um Lengjubikarinn.
Bikarinn varð eftir í Eyjum að
þessu sinni en bæði liðin sýndu
snilldartakta og ég, Blikinn sjálfur,
stóð mig að því að taka undir þegar
lag Eyjamanna glumdi, svo
skemmtilegt er það.
Ég býð mig fram til embættis
forseta Íslands til að gera gagn og
láta gott af mér leiða og vil vera
duglegur fyrirliði heiðarleika,
réttlætis, virðingar og jafnréttis. Ég
fann fyrir miklum innblæstri þessa
góðu daga í Eyjum og þakka
Eyjamönnum einstaklega hlýjar og
hressandi móttökur.
Dugnaðarforkar og -freyjur í Eyjum
Halla tómasdóttir
forsetaframbjóðandi
Halla ásamt eiginmanni sínum Birni Skúlasyni í Eyjum á dögunum.
Drífa Þorvaldsdóttir og Friðrik
Már eiga bjart og fallegt heimili
þar sem þau búa ásamt
stráknum sínum Óliver. Þau
opnuðu heimilið sitt fyrir
blaðamanni á dögunum. Íbúðin
er 70 fermetrar og mjög vel
skipulögð og hefur fjölskyldan
komið sér afar vel fyrir.
Hver eru áhugamál þín: Handbolti,
fjölskylda og vinir eru svona aðal
áhugamálin.
Hvernig myndir þú lýsa stílnum
þínum: Ég er svo sem ekkert með
einhvern sérstakan stíl held ég, ég
vil bara hafa frekar stílhreint en
samt voða kósý.
Hvað finnst þér mikilvægast að
huga að þegar þú innréttar heimilið
þitt: Mér finnst mikilvægast að það
sé hlýlegt og að manni líði vel
heima hjá sér.
Hvað hafi þið lengi búið hérna: Við
höfum búið hér í rúmt eitt og hálft
ár.
Eru þið búin að framkvæma
eitthvað hérna síðan þið fluttuð inn:
Það er bara eitthvað smotterí,
skiptum um gólfefni inni í svefn-
herbergi, löguðum nokkra glugga.
Svo skiptum við líka um borðplötu
í eldhúsinu.
Hvar verslarðu helst inná heimilið:
Ég versla bara hér og þar, ég hef
mikið verslað í Hrím og Epal, líka
mjög mikið í Ikea og Ilvu.
Hvert sækir þú innblástur: Aðal-
lega á Instagram, dett mjög oft inná
síður hjá konum eða stelpum sem
setja mikið af myndum inn af
heimilinu. Svo er líka alltaf voða
fallegt hjá mömmu og ég hef stolið
ófáum hugmyndum frá henni. ;)
Hver er griðastaður fjölskyldunar-
innar: Ég held að það sé bara
stofan, við eyðum langmestum
tímanum saman þar.
Er eitthvað á óskalistanum fyrir
heimilið: Já það er alveg hellingur
á óskalistanum en svona efst núna
er plakat eftir Kristinu Dam.
Heima er best
Mikilvægt að það sé hlýlegt og
að öllum líði vel heima hjá sér
Sara SjöFn GrETTiSdÓTTir
sarasjofn@eyjafrettir.is