Víkurfréttir - 05.09.2019, Síða 27

til framkvæmda í gegnum þetta fé-
lag. Sveitarfélögin voru eigendur að
Fasteign allan tímann en með því að
búa til félagið þá höfðum við greiðari
aðgang að lánsfé því bankar lánuðu
ekki sveitarfélaginu, sem slíku, það
sem til þurfti. Það var samþykkt
mótatkvæðalaust í bæjarstjórn að
fara þessa leið. Ef við hefðum verið
bókhaldarar, sem hræddust lánsfé
til uppbyggingar þá hefði ekkert af
uppbyggingarstarfinu sem fram fór
næstu árin í Reykjanesbæ átt sér stað.
Til að koma hlutunum á hreyfingu þá
yrðum við að fjárfesta og fjárfesting
kostar,“ segir Árni.
Rödd bæjarbúa skiptir máli
Árni og félagar brydduðu upp á
ýmsum nýjungum í stjórnartíð sinni
sem ekki hafði áður verið gert, eitt
af því voru íbúafundir í hverfum
bæjarins. Í fyrsta sinn voru bæjar-
búar spurðir hvað þeim fyndist.
„Við leituðum til bæjarbúa um hug-
myndir og settum strax fram plagg
sem við kölluðum „Framtíðarsýn“.
Kjarninn fjallaði um hamingju, sem
við ætluðum ekki að skilgreina fyrir
hvern og einn en það er að horfa fram
á við, til framtíðar. Að þú veist hvert
þú ætlar. Að sérhver einstaklingur eigi
framtíðarsýn, að hver manneskja eigi
sér tækifæri og þar kemur skólinn,
uppeldi og menntun sterkt inn. Að
geta lesið sér til gagns og reiknað.
Sem sveitarstjórnarmaður veit ég
að þetta var tímamótamarkmið, það
er að sveitarfélag skilgreindi í stefnu
sinni að mikilvægast væri að stuðla
að heilbrigði og hamingju allra íbúa
með þeim hætti að verkefni sveitar-
félagsins legðu áherslu á líflínu og
mikilvæga áfanga í lífi hvers einstakl-
ings frá meðgöngu til fullorðinsára.
Öll menntun, iðnmenntun, háskóla-
menntun, skiptir okkur máli. Til þess
að láta drauma okkar rætast verðum
við að hafa ákveðin tól og verkfæri í
töskunni okkar. Við vildum byggja
upp betra menntasamfélag hér í bæ, á
leikskólum og í grunnskólum. Okkur
tókst gríðarlega vel gagnvart þeim
verkefnum í menntamálum, svo vel
að önnur sveitarfélög komu til okkar
í heimsókn til að skoða módelið, sjá
hvað við værum að gera því nemendur
bæjarins voru farnir að skora mun
hærra í samræmdum prófum á undra-
verðum tíma,“ segir Árni stoltur.
Skuldahlutfall var erfitt frá
byrjun
Reykjanesbær stóð ekkert sérstaklega
vel fjárhagslega þegar ný bæjarstjórn
tók við. Verkefnin voru mýmörg sem
Árni og félagar, samstarfsfólk, tókust
á við á þessum árum;
„Þegar ég tók við stöðu bæjarstjóra
var skuldahlutfallið 200% árið 2002.
Það var strax svona erfitt. Þessar stað-
reyndir hafa farið framhjá mörgum
sem fáruðust yfir háum skuldatölum,
sérstaklega í kjölfar hrunsins. En oft
var gagnrýnin ómarkviss og röng.
Bærinn fékk til dæmis viðurkenningar
fyrir hagstæðan rekstur á þessum
tíma. Auðvitað má gagnrýna ákveðnar
fjárfestingar á stjórnunartímabili
okkar, því þær voru margar og miklar,
sem nú hafa skilað okkur verulega
fram á við. Markmiðið var að stuðla
að og undirbúa öll þau tækifæri sem
möguleg væru til að styrkja atvinnu-
lífið, fjölbreytt störf, menningu og
menntun á svæðinu. Víkingaheimar
voru til að efla ferðaiðnaðinn en við
hefðum kannski átt að leyfa ein-
staklingsframtakinu að sjá um það.
Sumir gagnrýndu vandaðan tónlistar-
skóla og endurbætur Stapa. Það er
þó dæmi um verkefni sem mun skila
menningararfi svæðisins til komandi
kynslóða. Framkvæmdir við uppbygg-
inu kísilversins voru mistök, þótt
einkaframtakið hafi alfarið kostað
þá uppbygginu. Það breytir ekki því
að við verðum að huga áfram að fjöl-
breyttum og vel launuðum störfum,“
segir Árni.
Vildum skapa góða íbúabyggð
Hugmyndir Árna og félaga voru að
nýta Helguvík til þess að skapa fjöl-
breytileg og vel launuð störf á svæð-
inu. Fleiri verkefni voru krefjandi á
þessum árum.
„Í dag er auk Bláa lónsins og Reykja-
nesbæjar, einn stór vinnuveitandi á
svæðinu, ISAVIA og þar geta launin
ekki stigið upp endalaust. Þegar her-
inn fór þá vorum við aðeins að vissu
marki búin að undirbúa okkur. Við
höfðum leitað svara víða um hvað
best væri að gera ef varnarliðið hyrfi
af landi brott. Niðurstaðan varð sú að
breyta svæðinu í frumkvöðlasvæði
og háskólasvæði. Nafnið Ásbrú með
ákveðna tilvísun í goðheima, kom
seinna. Við vorum því að nokkru
leyti undirbúin þegar herinn fór árið
2006. Þá vorum við tilbúin með til-
lögur um það sem best hafði virkað
annars staðar við svipaðar aðstæður.
Þróunarfélagið Kadeco, varð til og
hélt utan um verkefnið fyrir íslenska
ríkið. Keilir, háskólabrú, flugnám og
háskólatenging varð síðan sterkur
bakhjarl í frekari hugmyndaþróun,
með frábæru fólki. Ég las nýlega út-
tekt á brotthvarfi hersins þar sem
sėrstaklega var þess getið að fum-
laus aðkoma Reykjanesbæjar hafi
skipt miklu máli fyrir hversu vel tókst
að forða algeru fíaskó á svæðinu við
brotthvarf hersins,“ segir Árni með
áherslu.
Fjölskylduvænt umhverfi
fyrir alla aldurshópa
„Allt sem við unnum að á þessum
árum var vandað og hugsað til fram-
tíðar enda var bærinn að stækka.
Við töldum mjög mikilvægt að efla
og styrkja allar grunnstoðir og að
gera bæinn okkar fallegan og sam-
keppnishæfan fyrir fjölskyldur sem
væru að íhuga framtíðarbúsetu.
Nokkur dæmi um þau verkefni sem
við skiluðum af okkur eru bygging
Akurskóla, Vesturberg nýr leikskóli,
bætt aðstaða Tjarnarsels, viðbygg-
ing Hjallatúns, leikskólinn Akur var
byggður, byggt við leikskólann Holt,
endurbygging leikskólans Vallar, Háa-
leitisskóli og leikskóli á Ásbrú, Nes-
vellir, bæði félagsaðstaða aldraðra og
hjúkrunarheimili, endurbygging við
Stapa, Hljómahöll, Tónlistarskólinn,
Rokksafnið, endurbygging Duushúsa,
Fishershúss, Íþróttaakademían var
byggð, við byggðum við félagsaðstöðu
við Íþróttahús Njarðvíkur o.s.frv. Við
vörðum alla strandlengjuna, notuðum
grjótið úr Helguvík til þess og gerðum
í leiðinni göngustíga meðfram sjónum
frá smábátahöfninni í Keflavík og alla
leið inn í Kópu í Innri Njarðvík. Við
létum grafa upp alla Hafnargötuna
og lögðum hana á ný. Við lögðum
kapp á að versla við heimamenn.
Við vildum efla húsnæði mennta-
stofnana og varðveita gamla menn-
ingu, fá meiri tengingu íbúanna við
svæðið sjálft. Á sama tíma og þessar
miklu fjárfestingar stóðu yfir náði
bæjarfélagið að vera í hópi best reknu
sveitarfélaga þrátt fyrir allt. Ég vann
með frábæru starfsfólki sem elskaði
vinnuna sína og þannig náði maður
að virkja kraftinn í fólkinu. Þetta var
frábær tími.“
Reykjanes frekar en Suðurnes
Margir innfæddir voru ekki sáttir
þegar allt í einu var hætt að tala um
Suðurnes heldur bjuggum við nú á
Reykjanesi. Suðurnesjamenn hváðu og
sögðu Reykjanes vera úti við Reykja-
nesvita. Við búum á Reykjanesskaga
en erum Suðurnesjamenn. Maður
fann litla tengingu við þetta nafn í
upphafi. Hvers vegna vildu menn
breyta markaðssetningu svæðisins
Árni?
„Suðurnes er fallegt orð sem aldrei fer
frá þessu svæði. Varðandi notkun á
nafni til að lýsa svæðinu þá var gerð
stór könnun um afstöðu Íslendinga
til ákveðinna orða. Það var stuttu
fyrir mína tíð hér. Spurt var hvað
fólki dytti í hug þegar það heyrði
eftirfarandi nöfn; Suðurnes. Svar:
rigning og rok, Keflavík: Hljómar,
lélegar götur, Njarðvík: óþekkt svæði.
Reykjanes: jarðhiti, hrikalegt hraun,
brim. Við sáum hvað afstaða fólks til
ákveðinna orða gat haft mikil áhrif
á hugmyndir fólks um svæðið og því
ráðlagði Markaðs- og atvinnumála-
skrifstofan okkur að nota Reykjanes í
kynningum. Varðandi innri markaðs-
setningu bæjarins, þá taldi ég góðar
fréttir af skóla- og menningarmálum
vera sterkastar. Við vildum fjölga
íbúum í Reykjanesbæ. Það er hag-
stæðari eining rekstrarlega séð að
búa til dæmis í 20.000 íbúa bæ. Við
vildum stækka bæinn, þróa og efla
Innri Njarðvík sem nýtt byggingar-
svæði.“
Árni er sáttur
Þegar hlustað er á Árna þá finnur
maður hvað hann er hugmyndaríkur
og hefur uppbyggilegar skoðanir um
samfélagið. Manni finnst eiginlega
synd að missa svona frumkvöðul
úr allri hugmyndavinnu varðandi
framtíð svæðisins. Árni og félagar
gerðu margt gott fyrir Reykjanesbæ
og komu bænum svo sannarlega á
kortið. Jákvæð umfjöllun fjölmiðla
varð algengari í stjórnartíð hans og
snérist oftar en ekki um skemmtilegt
og frjótt mannlíf. Það getur verið gott
að hafa svona frumkvöðla innanborðs
því þeir koma hlutunum á hreyfingu.
Glöggt er gests augað.
„Hrunið var partur af stigvaxandi
vanda. Ég gat ekki séð fyrir frekar en
aðrir hvert allt stefndi. Við bregðumst
við aðstæðum. Það þarf að hlusta,
vera sjálfsgagnrýninn, viðurkenna
mistök og fá tækifæri til að leiðrétta.
Maður er að „verja fé“ en ekki að „eyða
fé“ ef maður gerir það skynsamlega.
Ef við horfum á þetta bæjarfélag í dag
þá hefur margt tekist vel. Þetta var
gott tímabil í lífi okkar hjóna þrátt
fyrir baráttuna. Við Bryndís horfum á
árangurinn, það var aldrei svo þung-
skýjað að við sæjum ekki til sólar.
Stundum voru aðstæður mjög erfiðar
í bæjarfélaginu, sérstaklega þegar
herinn fór. Þegar einhver grætur við
dyrnar hjá þér þá hugsarðu ekki um
bókfærsluna. Við hjá Reykjanesbæ,
fórum í að búa til úrræði fyrir at-
vinnulaust fólk. Það var mjög stór
hópur sem við vildum hjálpa í að
halda virðingu sinni eftir atvinnu-
missinn. Félagsþjónustan kom sterk
inn og er einstök í Reykanesbæ, þar er
einstakt starfsfólk sem stóð í ströngu
á þessu tímabili,“ segir Árni alvar-
legur í bragði.
Vinnur við hugmyndasmíði
„Ég er í nokkrum verkefnum í dag en
er mest að vinna fyrir Bláa lónið og
fyrirtæki því tengdu í hugmyndavinnu
um framþróun nokkurra verkefna. Ég
hef einnig verið að vinna með Sjávar-
klasanum. Svo er ég að vinna með
minni ástkæru eiginkonu sem teng-
ist menntamálum en það er ástríða
okkar beggja. Ég er frumkvöðull í eðli
mínu og öll þessi verkefni eru á þeim
nótum. Ég ákvað að draga mig út úr
pólítík, alls ekki að hætta til að fara
í aftursætið og nöldra, heldur hætta
alveg og horfa jákvæðum augum til
framtíðar. Mér sýnist margt vel gert
í bæjarfélaginu hjá þeim sem stýra
núna. Ég get ekki annað en verið
stoltur af því sem við höfum áorkað
síðustu ár og áratugi enda er Reyka-
nesbær að uppskera af sáningu sem
átti sér stað á erfiðum tímum ásamt
því að halda áfram götuna fram um
veg. Þannig viljum við að lífið haldið
áfram samfélaginu til góðs.“ segir
Árni að lokum. Hjónin Árni og Bryndís.
Árni er liðtækur á gítar.
27REYKJANESBÆR 25 ÁRA f immtudagur 5. september 2019 // 33. tbl. // 40. árg.REYKJANESBÆR 25 ÁRA