Feykir - 29.08.2018, Blaðsíða 3

Menningarsjóður KS úthlutar styrkjum
Styrkir til 22 verkefna
Þann 22. ágúst var úthlutað
styrkjum úr Menningarsjóði
Kaupfélags Skagfirðinga
en veittir voru styrkir til 22
verkefna. Bjarni Maronsson,
stjórnarformaður KS, sagði
í upphafi athafnarinnar að
þótt styrkirnir væru ekki háir
væru þeir vonandi eitthvað
sem kæmi í góðar þarfir og
væri um leið viðurkenning
á því menningarstarfi sem
viðkomandi er að vinna.
„Ég hef stundum sagt að
menning sé allt sem gerir lífið
bærilegra og það er skýring
sem hugnast mér ákaflega
vel,“ sagði Bjarni. Hann og
Efemía Björnsdóttir afhentu
styrkina en Þórólfur Gíslason,
kaupfélagsstjóri, gat ekki
verið viðstaddur að þessu
sinni. Auk þeirra sitja í stjórn
sjóðsins þau Einar Gíslason,
og Inga Valdís Tómasdóttir.
Að lokinni afhendingu
styrkjanna tóku nokkrir
styrkþeganna til máls og
þökkuðu fyrir þann stuðning
og velvilja sem þeirra framtaki
væri sýnt með stuðningi
sjóðsins. /FE
Efemía Björnsdóttir og Bjarni Maronsson afhenda Gísla Árnasyni, formanni
Karlakórsins Heimis, styrk. MYND: FE
Jakar reyna afl sitt
Norðurlands Jaki ársins
er Ari Gunnarsson
Aflraunakeppnin Norðurlands
Jakinn fór fram á Norðurlandi
dagana 23.-25. ágúst.
Keppnin er með sama sniði og
Vestfjarðavíkingurinn og er
keppt á nokkrum stöðum, víðs
vegar um Norðurland, í einni
grein á hverjum stað.
Keppnin hófst á Blönduósi á
fimmtudag þar sem keppt var í
drumbalyftu en þaðan var
ferðinni heitið til Skagastrandar
og háð keppni í að kasta yfir
vegg. Næsta dag var haldið til
Sauðárkróks og keppt í rétt-
stöðulyftu en seinna um daginn
spreyttu kapparnir sig í víkinga-
pressu og myllugöngu. Keppni
lauk svo á laugardag í Dimmu-
borgum en keppnisgreinarnar
þann daginn nefndust fram-
hald og réttstöðuhald.
Níu kraftajötnar börðust
um að verða Norðurlands Jaki
og lauk keppni þannig að Ari
Gunnarsson bar sigur úr býtum
með 54 stig. Í öðru sæti varð
Sigfús Fossdal með 50,5 stig og
Óskar P. Hafstein í því þriðja
með 44,5 stig.
Feykir kíkti á kappana þar
sem þeir reyndu sig í rétt-
stöðulyftu við Safnahús Skag-
firðinga og smellti af nokkrum
myndum. Byrjunarþyngdin var
aðeins 270 kíló og lauk keppni
þannig að Ari Gunnarsson og
Sigfús Fossdal urðu jafnir í
fyrsta sæti með lyftu upp á 400
kíló. /FE Fleiri myndir má sjá á Feykir.is
Hér lyftir Ari Gunnarsson 400 kílóum í réttstöðulyftu. MYND: FE
Björgunarsveitafólk frá Blöndu og Húnum
Á hálendisvaktinni
Undanfarin ár hefur
Slysavarnarfélagið Landsbjörg
rekið svokallaða Hálendisvakt
á sumrin og felst verkefnið
í því að halda úti gæslu
og aðstoð á hálendinu.
Auk Landsbjargar standa
Umhverfisstofnun og
Vatnajökulsþjóðgarður að
vaktinni.
Í sumar var vakt allan
sólarhringinn í Landmanna-
laugum, Nýjadal á Sprengisandi,
Drekagili norðan Vatnajökuls
og einnig var viðbragðsvakt í
Skaftafelli.
Á Húna.is er sagt frá því að í
síðustu viku hafi aðilar frá
Björgunarfélaginu Blöndu á
Blönduósi og Björgunarsveitinni
Húnum á Hvammstanga staðið
hálendisvaktina ásamt félögum
úr Kili, Dagbjörtu og einum
Norðmanni sem starfar sem
lögreglumaður í heimalandinu
auk þess að vera meðlimur í
Rauða krossinum í Osló.
Nokkuð var um útköll, segir
á Húna.is, þó þau hafi reyndar
verið í lágmarki, en að sjálfsögðu
er æskilegast að þau séu sem
allra fæst þrátt fyrir það að
útköllin auki reynslu félaganna
af björgunarstörfum við mis-
jafnar aðstæður.
Meðan hópurinn var að
störfum fylgdi honum kvik-
myndatökufólk sem myndaði
flest það sem gert var á vaktinni
en verið er að gera heim-
ildamynd um hálendisvaktina.
Myndin, sem verður í sex
þáttum, verður sýnd í vetur. /FE
Hópurinn sem var á vakt fyrri hluta vikunnar MYND: HÚNI.IS
32/2018 3