Fréttabréf Öryrkjabandalags Íslands - 01.12.1993, Síða 41

Friður sé með ykkur
hvíslar hann svo undurlágt
í hjörtum okkar
að við eigum auðvelt með
að heyra það ekki
meðan við örkum
stíf á leðurstígvélum
með glitrandi hár
skinnklædd
á leið til jólamessu.
Lítum svo undan
þegar við rekumst á
manninn með hækjurnar sínar
og aleiguna í plastpoka.
Hann enn einu sinni
óhreinn með plastpokann.
Meira að segja hérna.
Maður er á leið til messu
og rjúpan bíður í pottinum
rjúpan af heiðinni
potturinn logagylltur
frá mangaranum sem mylur gullið
mest í desember
Það blæðir úr roðanum í austri
en stjarnan barnsins í jötunni
skín þó enn.
Við sögubúar
lítum ekki við bókum
nema á jólaföstu
sellófanið skellihlær
inni í ofskreyttum jólapappír
og slauffuseni
undir jólatrénu.
Frið og jafnrétti
hrópaði Hann
og Hann kastaði borðum mangaranna
í allar áttir.
Ófreskjur skríkja
í pökkum elsku barnanna okkar
stríðshetjur
sem þeim er kennt að stjórna.
En jatan var svo smá.
Best er nú að slappa af
á hóteli við gylltan sand
í sól - sól - sól
og liggja sem sardínur
á ströndinni.
Hér
í Guðs eigin landi
hvílum við
þreyttar sálir okkar
og viljum ekki muna
að gömlu einmana fátæklingarnir
slafra í sig kanínuogkattamat úr dósum
í hreysunum sínum.
Hér
er hægt að tifa
til kirkju jólakvöldið
á leðurbandaskóm
í skrautmussum.
Hún hér á sjálft jólakvöldið
skökk í skökkum hjólastólnum
og synir hennar
í gatslitnum lörfum
rogast með stólinn
upp kirkjutröppurnar.
Að kirkjunnar þjónar
skuli leyfa annað eins.
Skítapakk
ekki einu sinni friður á jólunum.
En jatan var svo smá.
Við kinkum kollum hátíðlega
þegar presturinn talar um
skotgrafir
um eldgömul jól
um lífsgæðakapphlaup
og biður svo fyrir sjúkum og einmana.
Þetta er hans starf
veslings mannsins
hugsum við
og hangikjötið bíður
í eldhúsi
hótelíbúðarinnar góðu.
Jatan var svo smá
og ekkert rúm í gistihúsinu.
Nína Björk.
Þetta fallega og athyglisverða Ijóð
gaf hún Nína Björk Fréttabréfinu.
Kærar þakkir.
FRÉTTABRÉF ÖRYRKJAB ANDALAGSINS
Tn