Neytendablaðið - jún. 2018, Blaðsíða 10

10 Neytendablaðið // Júní 2018
Á ferð og flugi
Íslendingar ferðast sem aldrei fyrr og eflaust mun stór hluti þjóðarinnar leggja
land undir fót í sumar. Yfirleitt ganga ferðalögin vel fyrir sig og ferðalangar koma
heim brúnir og sælir og með góðar minningar. Því miður koma þó stundum
upp vandamál sem geta skemmt ferðalagið. Með smá fyrirhyggju má þó oft
koma í veg fyrir slíkt og hér höfum við tekið saman nokkur góð ferðaráð.
Vegabréf einu gildu íslensku ferðaskilríkin
Mikilvægt er að vegabréfið sé tekið með og að það sé í gildi.
Sum flugfélög neita farþegum um far nema þeir framvísi gildu
vegabréfi með sama nafni og er á flugmiðanum. Samkvæmt
upplýsingum á heimasíðu Samgöngustofu eru íslensk vegabréf
einu skilríkin sem vottað geta um ríkisfang íslenskra ríkisborgara
innan Schengen og því er þess krafist að farþegar hafi þau ávallt
meðferðis.
Réttur þinn ef flugi er aflýst eða því seinkað
Ef flugi seinkar eða því er aflýst eiga farþegar ákveðin réttindi
sem flugfélaginu ber að virða. Réttur farþega fer eftir því hversu
löng seinkunin og hversu langt flugið er. Farþegar geta þannig
átt rétt á máltíðum, drykkjum, hótelgistingu og, eftir atvikum,
stöðluðum skaðabótum. Ef seinkun varir lengur en fimm tíma
geta farþegar átt rétt á endurgreiðslu eða breytingu á flugleið.
Áttu rétt á bótum?
Á heimasíðu Evrópsku neytendaaðstoðarinnar, www.eccisland.is,
má nálgast flugreikni þar sem hægt er að fá upplýsingar um
réttindi farþega þegar flugi er seinkað eða aflýst. Þú slærð inn
upplýsingar um flugið, svo sem hversu löng seinkunin er og
hvaðan er flogið og hvert, og flugreiknirinn upplýsir þig um
rétt þinn. Evrópska neytendasaðstoðin aðstoðar einnig fólk við
að leita réttar síns ókeypis en undanfarið hefur mátt sjá slíka
þjónustu auglýsta gegn þóknun.
Eru skemmdir á farangri?
Þegar þú vitjar farangursins í komusal áfangastaðar skaltu skoða
hvort það séu einhverjar sjáanlegar skemmdir á töskunum. Ef
farangur hefur skemmst í meðhöndlun flugfélagsins ber það
ábyrgð á því tjóni. Til að sanna að tjón hafi orðið í flugvélinni er
mikilvægt að kvarta strax á flugvellinum og óska eftir skýrslu. Ef
farþegi verður fyrst var við tjón þegar hann er farinn af flugvell-
inum getur verið erfitt að sanna hvar tjónið átti sér stað.