Fréttablaðið - 23.10.2020, Side 16

Útgefandi: Torg ehf. Veffang: frettabladid.isÁbyrgðarmaður: Björn Víglundsson Sölumaður auglýsinga: Jón Ívar Vilhelmsson, jonivar@frettabladid.is, s. 550 5654,
ÖRUGGT START
MEÐ EXIDE
RAFGEYMUM
Endingargóðir og sterkbyggðir rafgeymar fyrir
flestar gerðir vörubíla. Veldu vöru frá gæða-
framleiðanda sem hentar íslenskum aðstæðum.
Hafið samband við sérfræðinga Olís í síma 515 1100
eða pontun@olis.is og fáið nánari upplýsingar.
Páll Halldór segir að vörubílar séu sitt líf og hafi verið alla tíð. „Ég man eftir mér sem
ungum strák heima í Hnífsdal þar
sem ég fylgdist með vörubílunum
keyra með mjölpoka úr skipunum
í bræðsluna. Pabbi minn, Halldór
Friðbjarnarson, vann við þetta
og stundum fékk ég að sitja í og
vissi fátt eins skemmtilegt. Pabbi
og Óskar, bróðir hans, áttu lítinn
vörubíl sem þeir notuðu við að
ferja efni í nýbyggingar í Hnífsdal
og höfðu nokkra atvinnu af því.
Svo þegar ég var orðinn sautján ára
og fékk bílprófið vildi ég endilega
vinna við að keyra. Ég fékk vinnu
við að keyra ölbílinn á milli staða.
Ölumboðið var í Bolungarvík og ég
keyrði þaðan í sjoppurnar á Þing-
eyri, Flateyri, Suðureyri, Súðavík,
Ísafirði og Hnífsdal,“ rifjar Páll
Halldór upp og ekki leynir sér að
hann á margar góðar minningar
frá þessum tíma.
„Ég fékk svo meiraprófið um leið
og ég hafði aldur til, þegar ég varð
tvítugur, og fékk þá vinnu við að
keyra glænýjan flutningabíl milli
Ísafjarðar og Reykjavíkur. Á níu
árum náði ég að keyra samtals
milljón kílómetra. Í dag er hægt
að ná þessari vegalengd á mun
skemmri tíma, enda vegirnir betri
og bílarnir kraftmeiri,“ segir hann.
Er kominn hringinn
Leiðin lá síðan til Reykjavíkur þar
sem Páll Halldór fór að vinna hjá
Vöruflutningamiðstöðinni, sem
síðar varð Flytjandi. „Ég sá um
forvarnir í umferðinni og fleira.
Þaðan fór ég svo yfir til Öskju og
var sölustjóri Benz-vörubíla og var
þar í tólf ár. Þetta var eftirminni-
legur tími. Ég fékk að fara víða
um heim á fundi hjá fyrirtækinu,
prufukeyra nýja bíla og koma
með tillögur að því hvað mætti
fara betur í hönnun á vörubílum
fyrirtækisins. Ég var eini sölu-
stjórinn á alþjóðavísu sem var
með meirapróf og sá því hlutina
stundum í öðru ljósi en aðrir.
Núna er ég kominn hringinn og
er farinn að keyra vörubíla aftur,
er laus við skrif borðið, tölvuna og
tölvupóstana,“ segir Páll Halldór
og hlær en hann er í tímabundnum
verkefnum hjá Öskju eftir að hafa
unnið á sínum eigin bíl við ferða-
þjónustu síðustu árin.
„Ferðaþjónustan er í dvala eins
og stendur og ég ákvað því að finna
mér annað að gera á meðan svo er.
Ég keyri tveggja hæða vörubíl og
flyt fólksbíla um allt land. Það er
mikill munur á því að keyra svona
stóra bíla í dag miðað við hvernig
það var fyrir fjörutíu árum. Ég
keyrði til Egilsstaða í vikunni á níu
tímum en áður tók það um fjórtán
til sextán klukkutíma. Bílarnir eru
kraftmeiri og tæknivæddari og
keyra sig nánast sjálfir. Það er hægt
að stilla hraðann, bílinn bremsar
sjálfur, nemur línur á veginum
og krafturinn er slíkur að maður
þýtur upp brekkur sem maður fór
áður á 30-40 kílómetra hraða,“
nefnir Páll Halldór og segir akstur-
inn alltaf jafnskemmtilegan.
Öryggismálin mikilvæg
„Bílar eru mín ástríða og partur af
því var minn keppnisferill í rallýi.
Ég hef líka stundað ísakstur og
ökuleikni, sem er mín hliðargrein
í þessu. Öryggismálin eru mér líka
hugleikin en mér finnst skipta
miklu máli að fólk fari sér ekki að
voða í umferðinni og komi heilt
heim. Því miður er mikið um að
atvinnubílstjórar sýni af sér það
kæruleysi að nota ekki öryggis-
belti, sérstaklega ekki innanbæjar,
sem er slæmt. Rallýökumaður
myndi til dæmis aldrei fara í rallý
nema með öryggisbeltið spennt,“
minnir Páll Halldór á, en hann er
ekki alveg hættur að keppa í rallý-
íþróttinni.
„Ég lét gamlan draum rætast og
tók þátt í keppni í útlöndum fyrir
tveimur árum. Þegar ég var 24 ára
bauðst mér að keppa erlendis en
það hentaði ekki á þeim tíma, við
konan mín, Kristín G. Ingimund-
ardóttir, áttum von á barni og ég
vildi vera hjá henni. En þegar þetta
tækifæri kom upp ákvað ég að slá
til og það var hrikalega gaman. Ég
komst í mark og varð mér ekki til
skammar,“ segir Páll Halldór og
skellir upp úr. „Keppendur voru
170 og við lentum í 50. sæti. Þessi
keppni var bara upp á fjörið.“
Fer aftur í ferðaþjónustuna
Páll Halldór er ákveðinn í að snúa
sér aftur að ferðaþjónustu þegar
bóluefni finnst gegn COVID-19
og fólk getur ferðast á ný. Hann
þekkir landið út og inn og hefur
einna mest verið með ferðir upp á
hálendið. „Það er frábært að keyra
ferðamenn og sýna þeim landið
okkar, sem er svo fallegt. Margir
hafa safnað sér fyrir Íslandsferð
árum saman og væntingarnar
eru miklar, svo maður verður að
standa sig og gera gott úr öllum
aðstæðum. Ég bíð bara þolinmóð-
ur eftir að landið opni á ný en það
má búast við skriðu ferðamanna
þegar bóluefnið kemur.
Ferðaþjónustan á eftir að
blómstra á ný. Ég er klár með
bílinn minn, sem ég fékk nýjan í
maí. Um er að ræða Mercedes Benz
Sprinter, sem er sérsmíðaður fyrir
lúxusferðir. Ég sé samt fyrir mér
að ég endi starfsævina á að keyra
vörubíla. Þegar ég lít yfir feril
minn sem atvinnubílstjóra er ég
einna þakklátastur fyrir hvað ég
hef verið farsæll í starfi, “ segir Páll
Halldór að lokum.
Með ástríðu fyrir bílum
Bílar leika stórt hlutverk í lífi Páls Halldórs Halldórssonar. Hann hefur verið atvinnubílstjóri,
unnið hjá bílaumboði, sinnt forvörnum í umferðinni og keppt í rallýi með góðum árangri.
Sigríður Inga
Sigurðardóttir
sigriduringa@frettabladid.is
„Núna er ég kominn hringinn og er farinn að keyra vörubíl aftur, er laus við
skrifborðið, tölvuna og tölvupóstana,“ segir Páll Halldór. MYNDIR/AÐSENDAR
Á níu árum náði ég
að keyra samtals
milljón kílómetra. Í dag
er hægt að ná þessari
vegalengd á mun
skemmri tíma, enda
vegirnir betri og bílarnir
kraftmeiri.
Páll Halldór hefur unnið við að keyra ferðamenn um landið. „Ferðaþjónustan á eftir að blómstra á ný. Ég er klár með
bílinn minn, sem ég fékk nýjan í maí.“ Núna keyrir hann tveggja hæða vörubíl og flytur fólksbíla út á land.
2 KYNNINGARBLAÐ 2 3 . O K TÓ B E R 2 0 2 0 F Ö S T U DAG U RVÖRUBÍLAR OG VINNUVÉLAR