Víkurfréttir - 16.09.2020, Page 30

„Þetta var sannkallað draumahögg því boltinn stefndi beint á pinnann
allan tímann,“ segir Snæbjörn Guðni Valtýsson, kylfingur í Golfklúbbi
Suðurnesja, en hann fór holu í höggi á 8. braut Hólmsvallar í Leiru síðasta
föstudag.
Snæbjörn sló með 9-járni og hitti
boltann vel. „Ég sá hann ekki fara
ofan í en var með góða tilfinningu
þegar ég gekk upp brautina að flöt
og var þokkalega bjartsýnn þegar
ég sá ekki boltann við pinnann. Þá
var hann í holunni,“ segir Snæbjörn
sem hefur einu sinni áður farið holu
í höggi, á 16. braut Leirunnar.
Snæbjörn Guðni gerði sér síðan
lítið fyrir í næsta hring sem hann
fór daginn eftir og lék þá 8. brautina
á fugli. Okkar maður greinilega sjóð-
heitur enda duglegur kylfingur.
Draumahögg
hjá Snæbirni Guðna í Leirunni
Snæbjörn Guðni
á 8. flötinni á Hólmsvelli.
Aron Ómarsson er kominn með aðra höndina
á þriðja Íslandsmeistaratitil sinn í þolakstri
Aron Ómarsson úr Vélhjólaíþróttafélagi Reykjaness keppti í þolakstri á
torfæruhjólum um síðustu helgi, keppnin fór fram á Hellum í Landssveit
og voru 110 keppendur skráðir til leik. Aron stóð uppi sem sigurvegari í
keppninni en hann hefur sigrað í öllum keppnum sumarsins og leiðir Ís-
landsmótið á fullu húsi stiga. Þann 10. október verður lokakeppnin haldin
á Flúðum og þar nægir Aroni að enda í fimmta sæti til að tryggja sér þriðja
Íslandsmeistaratitilinn í röð. En hvað er þolakstur? Víkurfréttir spurðu
Aron nánar út í íþróttina.
– Það liggur beinast við að
spyrja, er ekki bara formsat-
riði að klára keppnina?
„Ég segi það nú ekki, það getur allt
gerst. Hjólið gæti bilað eða eitthvað
óvænt komið upp á en þetta lítur vel
út,“ segir Ómar.
– Segðu mér aðeins frá þo-
lakstri, út á hvað gengur hann?
„Þolakstur er afbrigði af mótorkrossi.
Í mótorkrossi keyrir maður alltaf
sama hringinn, yfirleitt lítill tveggja
mílna hringur, en í þolakstri getur
hringurinn verið allt að tuttugu
kílómetrar í alls kyns landslagi; upp
um fjöll, yfir ár o.þ.h. Þetta er hálf-
gert fjallarall mætti segja, þar sem er
keppt í níutíu mínútur í senn – það
reynir á svona gamla menn eins og
mig.“
– Hvernig byrjaðir þú
í þessu sporti?
„Ég byrjaði bara þegar ég var ungl-
ingur á skellinöðrum og svo koll af
kolli. Við Suðurnesjamenn erum
með eitt flottasta svæðið á landinu,
út við Seltjörn, sem er nánast opið
allan sólarhringinn nema þegar
snjóar – en við hjólum eiginlega líka
þegar snjóar. Félagið okkar, Vélhjóla-
íþróttafélagi Reykjaness, er með
eitthvað yfir tvö eða þrjú hundruð
meðlimi og við erum sennilega næst-
stærsti klúbburinn á landinu.“
Aron er einn þeirra sem stofnaði
félagið, þá fjórtán ára, og hann situr
í stjórn félagsins. Aron segir að þó
svæðið sé eitt það flottasta á landinu
þá vanti talsvert upp á aðstöðu og
tækjabúnað félagsins. Mikið jarðrask
fylgir mótorkrossinu og því er þörf
á jarðvinnuvélum til að lagfæra og
endurgera brautir, slík tæki á klúbb-
urinn ekki og treystir á að geta leigt
þau þegar á þarf að halda – með
öllum þeim kostnaði sem því fylgir.
„Þegar við héldum Íslandsmótið í
fyrra komum við út í tveggja milljóna
tapi því við þurftum að leigja jarðýtu
og þetta eru háar upphæðir fyrir
lítið félag. Það er ekki nóg að vera
með hrífu þegar það er búið að
spóla upp brautirnar,“ segir Aron.
„Flestir klúbbar eiga litlar gröfur
eða jarðýtur sem þeir hafa fjárfest í
en okkur hefur ekki tekist að eignast
svona litla vél þótt við þyrftum að
eiga eina þannig til að geta haldið
svæðinu við. Það hefur aftrað okkur
frá því að viðhalda svæðinu eins vel
og við viljum.
Svo höfum við komið útvegað
að okkur gömlum gámum sem við
höfum reynt að koma okkur upp að-
stöðu í en við höfum ekki aðgang
að vatni eða rafmagni svo við náum
aldrei að gera þetta eins flott og það
þyrfti að vera. Þeir styrkir sem við
fáum hrökkva skammt þegar kemur
að uppbyggingu félagsaðstöðunnar.
Það var aðeins auðveldara að sækja
styrki til fyrirtækja og einstaklinga
fyrir hrun en núna.“
Vélhjólaíþróttafélagið
Vélhjólaíþróttafélag Reykjaness er
í Íþróttabandalagi Reykjanesbæjar
og heyrir undir MSÍ, Mótorhjóla- og
snjósleðaíþróttasamband Íslands,
sem er æðsti aðili um öll mál mót-
orhjóla- og snjósleðaíþrótta innan
vébanda Íþrótta- og Ólympíusam-
bands Íslands (ÍSÍ). Mótorhjóla- og
snjósleðaíþróttasamband Íslands er
aðili að Alþjóða vélhjólaíþróttasam-
bandinu, FIM.
„Í mótorkrossi og þolakstri eru
haldnar í kringum tíu keppnir til
Íslandsmóts á hverju ári auk bikar-
móta svo það er nóg að gera,“ segir
Aron. „Menn geta verið í þessu
nánast allar helgar yfir sumar-
tímann. Yfirleitt leggja menn áherslu
á aðra hvora greinina en svo er allur
gangur á því. Það er erfitt að elta
þetta allt saman.“
– Hvernig hefur keppnistíma-
bilið verið í ár, hefur ástandið
ekki haft áhrif á mótahaldið?
„Jú, þetta ætti að vera búið núna.
Yfirleitt byrjum við í byrjun maí
en byrjuðum ekki að keppa fyrr en
um miðjan júlí, tafðist um einn og
hálfan mánuð. Samt sluppum við
ágætlega miðað við margar aðrar
íþróttir. Þetta er ekki snertisport,
við erum bara hver á sínu hjóli og
með lokaða hjálma. Þetta er ekki
eins og í fótboltanum, við snertum
lítið hvern annan. Þannig að það var
auðveldara fyrir okkur að halda úti
æfingum þótt við hefðum þurft að
fresta keppnunum.“
– Hvert ættu þeir að
snúa sér sem hafa áhuga
á þessum íþróttum?
„Það er allt komið á Facebook, við
erum með Facebook-síðu (Vélhjóla-
íþróttafélag Reykjaness) og þar er
hægt að spyrja um allt sem fólki
dettur í hug. Svo er msisport.is síða
Mótorhjóla- og snjósleðaíþróttasam-
bandsins og þar er líka upplýsingar
að fá,“ segir Aron að lokum.
Aron er hér á fleygiferð á hjólinu,
hann er með góða forystu í keppni
um Íslandsmeistaratitilinn í ár.
GRINDVÍKINGAR ÍSLANDS-
MEISTARAR Í 5. FLOKKI
Grindvíkingar fögnuðu innilega
þegar 5. flokkur UMFG varð
Íslandsmeistari A-liða í knatt-
spyrnu. UMFG lagði Breiðablik
í skemmtilegum og mjög spenn-
andi leik sem lauk með 3:2 sigri
heimamanna síðasta föstudag.
Eysteinn Rúnarsson skoraði tvö
mörk, þar á meðal sigurmarkið á
lokamínútunum.
Blikar komust yfir en Andri
Karl Júlíusson Hammer jafnaði.
Staðan var 1:1 í hálfleik. Í seinni
hálfleik komumst heimamenn
yfir með frábæru skallamarki
Eysteins Rúnarssonar. Blikar
jöfnuðu að bragði en sigurmark
heimamanna kom í blálokin þegar
Eysteinn skoraði úr vítaspyrnu.
Bæði lið áttu hættuleg marktæki-
færi á síðustu mínútunum, Blikar
áttu sláarskot og heimamenn áttu
skot í stöng. Fögnuður Grindvík-
inga var mikill þegar flautað var
til leiksloka.
Á heimasíðu UMFG kemur
fram að þetta séu tvö bestu lið
landsins í þessum aldursflokki
en þessi sömu lið mættust í úr-
slitum á N1-mótinu fyrr í sumar.
Þar hafði Breiðablik betur.
Frábær umgjörð var í kringum
úrslitaleikinn. Settur upp var sér-
stakur átta manna völlur fyrir
framan stúkuna á aðalvellinum í
Grindavík. Fjölmargir áhorfendur
lögðu leið sína á Grindavíkurvöll
til að fylgjast með þessum frábæra
leik sem einnig var sýndur í beinni
á GrindavíkTV.
Íslandsmeistaralið Grindavíkur 2020:
Arnar Eyfjörð Jóhannsson
Orri Sveinn Á. Öfjörð
Sölvi Snær Ásgeirsson
Breki Þór Editharson
Hafliði Brian Sigurðsson
Helgi Hafsteinn Jóhannsson
Andri Karl Júlíusson Hammer
Reynir Sæberg Hjartarson
Caue Da Costa Oliveira
Eysteinn Rúnarsson
Þjálfarar:
Anton Ingi Rúnarsson
Nihad Hasecic
Þegar rýnt er í sögubækurnar má til gamans geta að Breiðablik lék við
Keflavík í sama aldursflokki til úrslita um Íslandsmeistaratitilinn árið
1972 og var leikurinn sýndur í Ríkissjónvarpinu og Ómar Ragnarsson
lýsti. Þá sigruðu Blikar 3:1 eftir að Keflavík hafði náð forystu með marki
Ragnars Margeirssonar.
Aron hársbreidd frá
Íslandsmeistaratitli
í þolakstri
30 // vÍKURFRÉTTIR á sUðURNEsJUM Í 40 áR