Feykir - 21.08.2019, Page 10
Fræðsludagur skólanna
Markmiðið að tengja saman allt starfsfólk skólanna
Árlegur fræðsludagur skólanna í
Skagafirði var haldinn í Miðgarði sl.
fimmtudag, þann 15. ágúst, og er
þetta tíunda árið sem hann er haldinn
við upphaf skólaárs. Þar voru saman
komnir starfsmenn leik-, grunn- og
tónlistarskóla í Skagafirði auk
starfsfólks FNV sem nú var með í
fyrsta sinn. Feykir hafði samband við
Selmu Barðdal, fræðslustjóra, og
spurði hana nokkurra spurninga
varðandi daginn og komandi skólaár.
Selma segist gera ráð fyrir að fjöldi leik-
og grunnskólabarna í Skagafirði verði
svipaður nú og var á síðasta skólaári
þegar nemendafjöldinn var um 750
börn. Hún segir að mönnun skólanna
hafi almennt gengið nokkuð vel, þó
auðvitað sé það eitthvað misjafnt eftir
starfsstöðvum eins og gengur. Í vetur
verði boðið upp á frístundarúrræði eftir
skóla í Varmahlíð með sama sniði og
Árvist á Sauðárkróki og verði nú
nemendum 1.- 4. bekkjar í Varma-
hlíðarskóla í fyrsta skipti gefinn kostur á
að vera í frístund til kl. 16.00 á daginn.
Nýafstaðinn fræðsludagur er nú
orðinn að fastri hefð í skólastarfinu og
Selma er innt eftir því hver séu helstu
markmiðin með þeim degi.
„Markmið dagsins er fyrst og fremst
að tengja saman allt starfsfólk skólanna í
Skagafirði, deila góðu verklagi og stuðla
að sem bestu lærdómssamfélagi,“ segir
Selma. „Við viljum tengja saman
mismunandi skólagerðir og skólastig. Á
fræðsludegi er saman komið allt
starfsfólk leik-, grunn- og tónlistarskóla,
ásamt starfsfólki fræðsluþjónustu og
stundum frístundar. Á þessum tíunda
fræðsludegi skólanna í Skagafirði var
starfsfólk FNV einnig með okkur.“
Selma segir að dagur sem þessi skili fyrst
og fremst aukinni faglegri samvinnu og
samstarfi sem leiði til aukinnar
samheldni innan skólasamfélagsins á
svæðinu. Að þessu sinni tóku um 230
manns þátt í fræðsludeginum, leik-,
grunn- og framhaldsskólinn, tónlistar-
skólinn, starfsmenn frístundar, nefndar-
menn fræðslunefndar og félags- og
tómstundanefndar svo og sveitarstjóri.
„Mín tilfinning er sú að það hafi
verið almenn ánægja með daginn. Það
sem var sérstaklega ánægjulegt við
þennan fræðsludag var þátttaka
framhaldsskólans, sem vonandi er
einungis upphafið að einhverju stærra
og meira samstarfi, sömuleiðis
undirritun landlæknis og sveitarstjóra
um heilsueflandi samfélag og í framhaldi
af þeirri undirritun var á dagskrá erindi
frá Embætti landlæknis um heilsueflandi
samfélag og skólastarf sem við munum
svo vinna áfram með í vetur.“
Það eru starfsmenn fræðsluþjónustu
sem halda utan um skipulag fræðsludags
en leita eftir hugmyndum frá skólunum.
Að þessu sinni var boðið upp á tólf
málstofur sem allar voru haldnar af
starfsfólki skólanna, leik-, grunn- og
framhaldsskólans og frístunda, sem
Selma segir sýna hvað margt spennandi
sé í gangi í skólunum. „Við eigum bæði
framsækna skóla og sömuleiðis
gríðarlega mikinn mannauð í okkar
skólasamfélagi. Fræðsludagurinn er í
raun kjörinn vettvangur fyrir starfsfólk
skólanna til þess að koma á farmfæri
öllum þeim spennandi verkefnum sem
það er að fást við í sínu starfi.“
Aðspurð að því hvort einhverjar
málstofanna hafi verið vinsælli en aðrar
segir Selma að svo hafi ekki verið: „Það
var sérstaklega gaman að sjá hvað
dreifing hópsins var jöfn í málstofurnar,
sem sýnir að áhugasvið hópsins er
mismunandi og það er það sem við
viljum sjá, nógu mikla flóru og
fjölbreytni. Tilfinning mín var sú að
margir ættu erfitt með að velja málstofu
og hefðu mjög gjarnan viljað geta valið
fleiri en tvær. Það er skemmtilegt að
upplifa blöndunina í hópnum,
leikskólastarfsmenn eru ekki einungis
að sækja málstofur um leikskólamál og
svo koll af kolli, fólk er að kynna sér allt
mögulegt bæði út frá sínu starfi og
áhugasviði, hluti af þessu öllu saman er
að deila góðum hugmyndum bæði í
þeim tilgangi að efla hvert annað og
samstarf almennt.“
Að þessu sinni var starfsfólk
Fjölbrautaskólans einnig með. Selma
segist gera fastlega ráð fyrir að það
fyrirkomulag sé komið til að vera. „Við
eigum og viljum horfa á okkur sem eitt
skólasamfélag. Gaman væri ef við
gætum horft til þess að Farskólinn yrði
einnig þátttakandi á fræðsludegi og
sömuleiðis Háskólinn á Hólum, allir
skólar í Skagafirði tækju þátt. Okkkur er
umhugað um að Skólar í Skagafirði fái
sérstaka merkingu í hugum fólks, sem
skólar sem bjóða gæðanám á öllum
skólastigum. Skólasamfélagið vinnur
hörðum höndum að því að brúa bilið á
milli leik- og grunnskóla sem þýðir að
allt samstarf er styrkur og þessi dagur er
liður í því,“ segir Selma Barðdal
fræðslustjóri hjá Sveitarfélaginu
Skagafirði. /FE
Morgunleikfimi á fræðslufundi. MYND: SELMA BARÐDAL
Skagafjörður heilsueflandi samfélag
Heilsan er málefni okkar allra
Í síðustu viku skrifuðu Sigfús Ingi Sigfússon sveitarstjóri
Svf. Skagafjarðar og Alma D. Möller landlæknir undir
samning milli Sveitarfélagsins og embættis Landlæknis
um verkefnið Heilsueflandi samfélag. Meginmarkmið
þess er að styðja samfélög í að skapa umhverfi og
aðstæður sem stuðla að heilbrigðum lifnaðarháttum,
heilsu og vellíðan allra íbúa.
„Þetta felur m.a. í sér að öll stefnumótun, framkvæmdir
og þjónusta á að vera í anda þessara megin markmiða og
taka mið af leiðarljósum verkefnisins og þetta tengist mjög
heimsmarkmiðum Sameinuðu þjóðanna,“ sagði Sigfús Ingi
við undirritunina og lýsti um leið ósk sinni að öll þau sem
starfa í þágu íbúa sveitarfélagsins tileinki sér markmið og
starfshætti Heilsueflandi samfélags og leggi sitt af mörkum
til að Skagafjörður gerist gildandi á landsvísu í þeim efnum
með almenna lýðheilsu að leiðarljósi.
„Við erum hér að huga að heilsu og það þarf ekki að
orðlengja það hvað heilsa, andleg, líkamleg og félagsleg, er
gríðarlega mikilvæg og það er þannig að heilsa er málefni
okkar allra og samfélagsins alls,“ sagði Alma Möller og
benti á hvernig einstaklingar geti haft áhrif á sína eigin
heilsu og hvernig heilsueflandi samfélag gæti komið að.
Á heimasíðu Landlæknis kemur fram að fólk lifir lengur á
meðan hlutfall fæðinga minnkar sem felur í sér tækifæri en
einnig ýmsar áskoranir fyrir samfélög. Stjórnvöld verði að
velja hagkvæmar leiðir til að viðhalda og bæta heilsu og
færni fólks á öllum æviskeiðum. Markvisst lýðheilsustarf,
sem sem byggir á bestu þekkingu á hverjum tíma hefur
fjölþætt gildi fyrir ríki, sveitarfélög, einstaklinga og aðra
hagsmunaaðila. Ef vel tekst til við innleiðingu Heilsueflandi
samfélags má vænta að andleg, líkamleg og félagsleg heilsa
og vellíðan íbúa verði betri en annars, jöfnuður verði meiri
sem og öryggi og lífsgæði almennt.
Sveitarfélög hafa sjálf frumkvæði að því að gerast
Heilsueflandi samfélag en skilyrðin fyrir þátttöku eru að
bæjar- eða sveitarstjóri skrifi undir umsókn um þátttöku,
skipaður sé þverfaglegur stýrihópur fyrir starfið sem tryggir
aðkomu lykilhagsmunaaðila að því og sérstakur tengiliður
er tilnefndur. Með undirskrift samnings um Heilsueflandi
samfélag einsetja sveitarfélög sér að vinna markvisst
lýðheilsustarf, í samræmi við markmið og leiðarljós
Heilsueflandi samfélags með stuðningi frá Embætti
landlæknis og öðrum sem að starfinu koma.
Innleiðing Heilsueflandi samfélags og skóla fellur vel að
innleiðingu Heimsmarkmiðanna og öfugt, segir á
heimasíðu landlæknis, og má glöggt sjá m.a. með því að
skoða hvernig þriðja heimsmarkmiðið, sem kveður á um
heilbrigt líf og vellíðan allra frá vöggu til grafar, er samofið
hinum sextán markmiðunum. /PF
Undirritun um samstarf Landlæknis og Svf. Skagafjarðar um
Heilsueflandi samfélag fór fram á fræðsludegi skólanna í Skagafirði
sem haldinn var í Miðgarði í gær. Mikill fögnuður ríkti meðal
viðstaddra um gjörninginn. Mynd: PF
10 31/2019