Dagfari - okt 2016, Qupperneq 2

2
Hvað kjósa friðarsinnar?
Miðnefnd Samtaka hernaðarandstæðinga sendi á
dögunum spurningalista til allra þeirra flokka og framboða
sem kjósendum standa til boða í komandi kosningum.
Eftir nokkrar áminningar bárust að lokum svör frá öllum
flokkum nema Íslensku þjóðfylkingunni.
Er stjórnmálahreyfingin hlynnt veru Íslands í
Atlantshafsbandalaginu?
Alþýðufylkingin
Nei: Alþýðufylkingin er alfarið á móti veru Íslands í Atlantshafs—
bandalaginu og vill yfirgefa það hið fyrsta. Á meðan landið er í bandalaginu
viljum við misnota aðstöðuna til þess að spilla fyrir einróma ákvörðunum
um stríðsglæpi ef hægt er.
Björt framtíð
Ísland á að vera herlaust land og málsvari friðar á alþjóðavettvangi. Björt
framtíð hefur ekki samþykkt stefnu um að Ísland eigi eða eigi ekki að
vera meðlimur í atlantshafsbandalaginu.
Dögun
Ekki hefur verið tekin formleg afstaða innan Dögunar hvort Ísland eigi
að ganga úr NATO. Fram kemur í stefnu okkar að við viljum her-og
kjarnorkuvopnalaust land. Auk þess fordæmum við að leysa ágreining
með hervaldi. Við erum lýðræðissinnaður flokkur og teljum því að
spurningin henti vel fyrir þjóðaratkvæðagreiðslu. Ef þær áherslur sem við
höfum í lýðræðismálum ná fram að ganga mun það vera mögulegt fyrir
almenning að kalla á þjóðaratkvæðagreiðslu um NATO.