Fréttabréf Siglfirðingafélagsins í Reykjavík og nágrenni - okt. 2017, Síða 24

Siglfirðingablaðið24
Þess má geta að eitt af kvæðum Braga
til barnabarns hans, „Litla-Kúts þula“,
var flutt í barnatíma sjónvarps 1971
og teikningar Braga við kvæðið sýndar.
„Sagan hennar Systu“
Þórdís Vala var þriggja ára þegar
mamma hennar lagðist inn á
Kristneshælið. Hún bjó þá um tíma
hjá afa sínum og ömmu, Magnúsi og
Valgerði, stjúpmóður Braga, en þau
áttu heima á Hvanneyrarbrautinni.
Sirrý fór til skyldmenna í Bolungarvík.
„Pabbi kom til mín á hverju kvöldi
og sagði mér sögur og ljóð fyrir
svefninn. Eitt kvöldið vildi ég segja
honum sögu sem ég bjó til um vinskap
kanínunnar Jósefínu og lambsins Óla.
Pabbi endurgerði þessa sögu í bundnu
máli. Hann bjó til handskrifað kver
eða bók með kvæðinu og teikningum
sem hann nefndi „Sagan hennar
Systu“. Þessi bók var síðan gefin út
hjá Heimskringlu árið 1956. Hún var
endurútgefin fyrir nokkrum árum.“
Athvarf í Fljótunum
Þórdís Vala segir að Bragi hafi verið
mikill náttúruunnandi og kunnað
flóru og fuglalíf Íslands utanað. Hann
átti athvarf í Fljótunum í sumarhúsi á
Illugastöðum þar sem hann stundaði
ræktun. Hann renndi líka fyrir lax í
Fljótaánni af ástríðu. Bragi beitti sér
fyrir ræktun árinnar og þá má einnig
nefna að hann var með þeim fyrstu
sem veiddi lax á flugu í ánni.
„Börnin mín nutu þess að heimsækja
afa sinn norður í Fljótin. Sumarið
1984 bjuggum við á Möltu og
börnin söknuðu þess að komast
ekki í Fljótin. Þá sendi pabbi þeim
myndskreytt kvæði, „Stelksþulu“.
Stelkurinn stendur á staur og lýsir
ljóslifandi náttúrunni í kring. Þegar
„Sagan hennar Systu“ var endurútgefin
völdum við að bæta „Stelksþulu“ við.“
Skopmyndir og minjavernd
Bragi var ágætur teiknari að eðlisfari
eins og fram er komið. Á yngri
árum fékkst hann talsvert við
skopmyndateikningar og efndi 1946
til sýningar á slíkum myndum. Á
seinni árum sínum teiknaði hann
einkum myndir af skipum og gömlum
húsum á Siglufirði. Í minningargrein
um Braga segir Benedikt Sigurðsson
kennari að Bragi hafi líklega orðið
fyrstur til þess að vekja athygli á
minjagildi gamalla mannvirkja í
bænum, einkum síldarbrakkanna, með
grein sem hann birti í bæjarblaðinu
Mjölni 1975 ásamt teikningum af
nokkrum þessara húsa.
„Pabbi hafði gott auga fyrir gömlum
hlutum sem höfðu varðveislugildi.
Ég man eftir því að hann bjargaði
ýmsum gripum sem lágu undir
skemmdum í brökkum og kom
þeim í skjól í kyndiklefa á heimilinu.
Þessir gripir rötuðu síðan flestir
á Síldarminjasafnið. Hann talaði
mikið fyrir minjavernd og var ákafur
talsmaður þess að Siglfirðingar kæmu
sér upp safni um sögu staðarins,“ segir
Þórdís Vala.
Glettur
Eftir Braga liggur forláta handskrifuð
bók sem ber nafnið Glettur. Í henni
kennir ýmissa grasa. Þar er að finna
mörg ljóð og kvæði eftir Braga og
fróðleik um Siglufjörð og sögu
íþrótta í bænum. Meðal annars er
greint frá því hvernig Skarðsmótið
margfræga varð til. Einnig er þar
stórkostleg frásögn af keppnisferð KS
til Akureyrar og uppátækjum ungra
manna sem voru að hlaupa af sér
hornin.
Teikning Braga af KEA bragganum og Nöf, athafnasvæði Skafta Stefánssonar.