Fréttabréf Siglfirðingafélagsins í Reykjavík og nágrenni - maí 2022, Blaðsíða 18

Siglfirðingablaðið18
Erling Jónsson:
Við Valtýr notuðum Jóhann sem tilraunadýr!
Erling Jónsson, vélsmiður bjó í útjaðri villimannahverfisins
Hvanneyrarbraut 23 og er hálfbróðir Ægis Jónssonar föður
bræðranna Gylfa og Lýðs. Erlingur er hagur á hönd eins
og ættmenni hans og Valtýr Sigurðsson og strákarnir
fundu strax út að Erling gat smíðað flest sem almennilegir
villimenn þurftu til dagslegs brúks svo sem örvarodda úr
áli. En Erling man eftir að hafa fengið skammir eftir að ein
álörin lenti í læri óvinahermanna.
Eitt sinn voru þeir félagar Valtýr og Erling nýbúnir að sjá
mynd hja Oddi Thor um fallhlífarhermenn, sem þeir heill­
uðust af og ákváðu að gera tilraun. Jóhann Sigurðsson
yngri bróðir Valtýs var tilvalið tilraunadýr eins og oft áður.
Erling og Valtýr útveguðu sér húlahopphring og síðan voru
þeir bræður sendir á Gyðu móður þeirra en hún vann þá
í Túngötu 1 sem seldi allskonar föt og efni fyrir hagsýnar
húsmæður. Það tókst að væla út nokkra metra af lakalérefti
og nú var hafist handa við fallhlífargerðina. Þúsundþjala
smiðurinn Erling var ekki í vandræðum að sauma og sníða
og festa léreftið við húlahringinn. Síðan var útvegað smá­
barnakerrubeisli sem var víkkað fyrir rassinn á Jóhanni.
Þegar fallhlífin var fullgerð þá datt þeim félögum í hug
að fara með Jóhann uppá lýsistanka við Mjölhúsendann
og henda Jóhanni þar niður! Einhverja bakþanka fengu
þeir um að þetta gæti verið of hátt! Og breytt um plan og
klifrað upp á bílskúr Garðars svæfingalæknis sem bjó við
Hvanneyrarbraut 36.
Erling þvertekur fyrir að Jóhann hafi streist á móti þegar þeir
Erling og Valtýr tóku Jóhann í fallhlífarmúnderingunni og
hentu honum fram af bílskúrnum. Þegar Jóhann lenti stóð
á endum að húllafallhlífin dróst fram af bílskúrsþakinu og
veitti ekki það viðnám sem hafði sést í litum og cinemascóp
hjá Oddi! Jóhann meiddi sig og hágrét og hjóp inn og
klagaði þá félaga og var refsing saksóknarans Valtýs hýðing!
G.T.
Gyða Jóhanns með drengina sína, Valtý og Jóhann Ágúst.