Feykir - 09.06.2021, Blaðsíða 12

Ertu með fréttaskot, mynd eða
annað skemmtilegt efni í Feyki?
Hafðu samband. Síminn er 455 7176
og netfangið feykir@feykir.is
23
TBL
9. júní 2021 41. árgangur
Frétta- og dægurmálablað á Norðurlandi vestra : Stofnað 1981
Sunnudaginn 6. júní var Nýprent Open mótið
haldið á Hlíðarendavelli Golfklúbbs Skagafjarðar
og er þetta mót ætlað fyrir börn og unglinga frá
öllum golfklúbbunum á Norðurlandi. Nýprent
Open er fyrsta mótið af fjórum í Norður-
landsmótaröðinni en einnig verður spilað á
Dalvík þann 4. júlí, á Ólafsfirði 27. júlí og svo er
síðasta mótið haldið á Akureyri þann 29. ágúst.
Leikið er í fimm flokkum, byrjendaflokki, 12 ára
og yngri, 13-14 ára, 15-16 ára og svo 17 -18 ára í
bæði stúlkna og drengjaflokki.
Í ár var 61 keppandi skráður til leiks og var
fyrsti hópurinn af eldri krökkunum ræstur út á
slaginu 9:00 en þeir spila 18 holur. 12 ára og yngri
hópurinn og byrjendaflokkurinn, voru svo ræstir
út koll af kolli um eitt leytið og spiluðu þeir 9
holur. Mótið gekk afburða vel og voru veðurguðirnir
nokkuð sáttir með að sjá loksins líf og fjör á
vellinum og glöddu keppendur með þokkalega
góðu golfveðri sem einkenndist af sól og smá
vindi. Eftir að keppendur luku leik var farið í
vippkeppni og gætt sér á pylsum og verðlaun
afhent þeim sem stóðu sig best í hverjum flokki
fyrir sig. Þá fengu allir krakkarnir í byrjendaflokki
verðlaun fyrir þátttökuna á mótinu.
Barna- og unglingaráð GSS vill þakka öllum
þeim sem lögðu vinnu í að gera þennan dag
ógleymanlegan fyrir krakkana okkar, kærlega fyrir
og óskar öllum golfurum gleðilegs golfsumars. / SG
Norðurlandsmótaröðin í golfi
Nýprent Open
Glæsilegur hópur af byrjendum sem eru að taka sín fyrstu skref í golfiþróttinni. MYNDIR: SYLVÍA DÖGG, MARGRÉT HELGA OG HJÖRTUR GEIRMUNDS.
Um sumarið
Einar umboðsmaður
Stefánsson á Reynistað
og Þorbergur Jónsson
hreppstjóri á Dúki
fengu Jens Jenssen
Stæhr, plægingamann frá Skipalóni við Eyjafjörð, til að
vinna að jarðabótum (plægingum), og var það nýmæli
trúlega öðrum þræði runnið undan rifjum Jóns
búfræðings Espólíns á Frostastöðum.
Nokkur hross voru seld til útflutnings í Skagafirði.
Brödrene Jacobsen í Höfða keyptu Grafarósverzlun.
Eftir lát Sigurðar Gíslasonar á Fannlaugarstöðum sóttu
hreppstjóri Vindhælishrepps og fleiri mjög fast, að
kotið yrði ekki byggt aftur heldur „léð til fjárrekstrar“.
Eigendur jarðarinnar, Áss- og Hofdalafólk, réð því af að
leggja jörðina til Skrapatunguafréttar og fela umsjá
hennar ,,valinkunnum manni vestra til allra umráða,
ábyrgðar og afgjalds til 5 ára.“ Séra Björn Þorláksson á
Höskuldsstöðum tók þetta að sér ,,móti 18 spesía
eftirgjaldi“.
Skagfirskur annáll
Kristmundar Bjarnasonar 1847–1947
1852