Austurglugginn - 16.12.2021, Page 20

20 Fimmtudagur 16. desember AUSTUR · GLUGGINN
„Við hér fögnum jólunum með gleði
í hjarta og óvæntum uppákomum
allan mánuðinn,“ segir Þorbjörg
Sandholt, skólastjóri grunnskóla
Djúpavogs. Þar sem annars
staðar í skólum landsins breytist
skólahaldið nokkuð í aðdraganda
jólahátíðarinnar og ekki hvað síst
sökum þess að nemendum hefur
fjölgað hratt í skólanum og töluvert
púsl að samræma jólaundirbúning
fyrir alla bekki. Covid flækir málið
líka umtalsvert.
Jóladagskráin hófst í fyrstu viku
desember þegar nemendur og
kennarar skreyttu skólann hátt og
lágt. Þá viku kom líka í heimsókn
rithöfundurinn Gunnar Helgason
sem las upp úr nýrri bók sinni.
Það var þó fyrst í annarri viku
desember sem dagskráin fór að
taka raunverulega mið af jólunum.
Fyrst var tónfundur nemenda úr
tónlistarskólanum í kirkjunni og
degi síðar mættu allir í jólafötum
í skólann með sérstakt sparinesti í
þokkabót.
Mesta fjörið var þó í þriðju vikunni
þegar eitthvað öðruvísi var í boði
hvern einasta dag. Ljóð og jólasögur
undir kaffihúsastemmningu er ný
hugmynd sem skólastjórinn vonar
að verði að hefð í framtíðinni.
„Þessi frábæra hugmynd kom frá
nemanda á yngsta stigi en þann 13.
desember prófuðum við að búa til
kaffihúsastemmningu í skólanum.
Allra yngstu nemendurnir sömdu
jólasögur og lásu fyrir aðra meðan
þeir eldri bökuðu vöfflur og hituðu
kakó auk þess sem nemendur í
heimilisfræði bættu um betur og
bökuðu smákökur. Það var tónlist
og leikur og tókst frábærlega vel.“
Í kjölfar þess bauð sundkennarinn
upp á jólasund fyrir alla nemendur
auk þess sem lokið var við að bera
út jólakort.
„Það er sterk hefð fyrir
jólakortagerð í skólanum. Nemendur
gera falleg kort og hver bekkur gerir
sinn jóla-póstkassa sem er settur við
hverja stofu. Nemendur hafa svo þrjá
daga til að koma kortunum í rétta
kassa. Starfsfólkið á líka sinn jóla-
póstkassa og það er alltaf eitthvað
jólalegt við það að setja jóla-
póstkassana á gangana.“
Lokahnykkurinn eru svo stofujól
daginn fyrir jólafrí á föstudeginum
sautjánda. Þá mæti allir með spari-
spari-nesti, allir fá pakka og eiga
stund saman.
AE
Djúpavogsskólajól
Jólakaffihús og jólasund á Djúpavogi
Undirbúningur fyrir jólin í Djúpavogsskóla gengið vel og að mestu áfallalaust þrátt fyrir kófið.z Allir veggir og allar hurðir skreytt á
nýstárlegan og skemmtilegan hátt.