Austurglugginn - 26.11.2020, Blaðsíða 6

6 Fimmtudagur 26. nóvember AUSTUR · GLUGGINN
„Það þykir mörgum skondið að
skipstjóri sé með bíladellu en
svona er það með mig. Ég hef ætíð
haft brennandi áhuga á bílum,
alveg frá því ég var strákur,“ segir
Grétar Rögnvarsson, skipstjóri á
aflaskipinu Jóni Kjartanssyni SU
111 frá Eskifirði.
Við sitjum inni í stofu hjá honum
með hinn ómissandi kaffisopa fyrir
framan okkur. Inga Rún Beck,
sambýliskona Grétars, er einnig í
stofunni, situr í öðrum sófanum
og vinnur. Hún lætur þess getið að
hún væri sennilega áhugaverðara
viðtalsefni en eiginmaðurinn. Inga
Rún vinnur sem sjálfstætt starfandi
fjölskyldufræðingur og vinnur nú
heima við vegna COVID.
Jón Kjartansson ber nafnið
aflaskip með rentu enda er Grétar
meðal annars þekktur fyrir að hafa
undanfarin ár verið ofarlega á listum
yfir einstaklinga sem greiða hæstu
opinber gjöld á Austurlandi.
En Grétar er einnig þekktur í
plássinu fyrir að eiga tvo gullfallega
fornbíla, Lincoln Continental
og Ford Fairlane Victoria. Dags
daglega, og til að skjótast á rjúpu
eða hreindýr, notar hann hinsvegar
öflugan skærrauðan pallbíl.
Grétar er fæddur og uppalinn á
Eskifirði, fór snemma að stunda
sjóinn og sautján ára gamall var hann
kominn á síldveiðar í Norðursjó. Að
loknu námi í Stýrimannaskólanum
árið 1979 var hann fyrst stýrimaður
á tveimur skipum en 24 ára gamall
var hann orðinn skipstjóri um borð
í Sæljóni SU 104.
Skipstjóri á Jóni
Kjartanssyni í 32 ár.
Grétar varð skipstjóri á Jóni
Kjartanssyni árið 1988. Fyrst gamla
Narfa RE, sem farið var með í tvígang
til Póllands í miklar breytingar, og
síðan þeim sem áður hét Hólmaborg
SU. Sumarið 2017 var síðan sá sem
er í dag Jón Kjartansson sóttur til
Skotlands. Grétar hefur sem sé verið
skipstjóri á skipi með þessu nafni í
ein 32 ár. Hann á því mikla reynslu
að baki á sjó, einkum á loðnuveiðum
„Loðnan kemur eftir áramótin,
ég er fremur bjartsýnn á það,“ segir
Grétar aðspurður hvernig honum
lítist á veturinn.
„Mælingar á ungloðnu í fyrra
benda til þess að töluvert verði af
loðnu hjá okkur eftir áramót. Hún
verður þarna á ferðinni fyrir norðan,
það er bara að finna hana.“
Grétar segir að stóru loðnuárin
upp úr miðjum síðasta áratug síðustu
aldar hafi verið besta tímabilið sem
hann hafi lifað á sjó svona tekjulega.
„En það er líka alltaf góð tilfinning
þegar vel gengur og mikið aflast.
Slíkt léttir lundina,“ segir hann.
Fram kemur hjá honum að
undanfarin ár hafi makrílveiðarnar
gengið ágætlega og að þær séu
tímabil ágætra tekna hjá þeim
sem stunda þær. „Ekkert síður en
loðnan,“ segir Grétar.
Á móti kemur að sumir túrar,
svokallaðir brælutúrar, séu ekkert
til að skrifa um. „Það getur verið
þreytandi að sitja langtímum saman í
brælu og gæftaleysi en maður verður
að taka slíku með hinu góða,“ segir
Grétar.
Stórt olíumálverk af Jón
Kjartanssyni eftir Tolla hangir á vegg
í stofunni. Inga Rún segir að hún hafi
sérpantað þetta verk. „Ég fékk hann
til að búa til verkið sérstaklega fyrir
mig en Tolli er þekktur fyrir að taka
ekki á móti slíkum pöntunum,“ segir
Inga Rún og er stolt af framtakinu.
En mikið lá við þar sem verkið var
gjöf Ingu til Grétars á sextíu ára
afmæli hans.
Það er hins vegar lítið olíumálverk
sem Grétar keypti eitt sinn á Kúbu
sem er uppáhalds málverkið hans.
Verkið er af stílfærðum gömlum
bandarískum kagga en slíkir bílar
eru einkennismynd borga og bæja
á eyjunni.
Sjómennskan auðveldari
en áður
„Sjómennskan er orðin mun
auðveldari en hún var í gamla
daga,“ segir Grétar og nefnir í
því sambandi að öll þessi nýja
tækni- og tölvuvæðing um borð
geri sjómönnum lífið léttara.
„Aðbúnaðurinn um borð er líka
orðinn til fyrirmyndar á þessum
nýrri skipum sem bæst hafa í flotann
á undanförnum tveimur áratugum,“
segir hann.
Þá kemur einnig fram hjá honum
að tæknin og öflugri skip en áður
hafi leitt til þess að verulega hefur
dregið úr viðveru sjómanna á hafi
úti á stærri skipunum.
„Á síðustu öld vorum við kannski
á sjó þetta 300 til 320 daga á ári eða
jafnvel lengur,“ segir Grétar. „Nú er
„Sjómennskan er orðin mun auðveldari en hún var í gamla daga,“ segir Grétar. Mynd: FRI
Þau Grétar og Inga Rún á góðri stundu. Mynd: Einkasafn.
Ætíð haft brennandi áhuga á bílum
- rætt við Grétar Rögnvarsson skipstjóra