Milli mála - 2022, Page 131
MILLI MÁLA
130 Milli mála 14/1/2022
og jákvæð viðhorf til þess. Á grundvelli þessarar könnunar og í sam-
ráði við nemendur og dönskukennara var ráðist í að þróa námsefnið
www.taleboblen.hi.is og tölvuleikinn www.talerum.is.
4. Námsefnið Taleboblen.hi.is
Aðalmarkmiðið með Taleboblen er að þjálfa talaða dönsku og þá sér-
staklega föst orðatiltæki eða frasa sem eru algengir í daglegu máli.
Fræðimenn telja sérstaka ástæðu til þess að gefa þessum hluta
orðaforðans gaum (sjá t.d. Henriksen o.fl. 2021, 94–100 og Auður
Hauksdóttir 2012a). Í samvinnu við danska fræðimenn og dönsku-
kennara í Færeyjum, Grænlandi og Íslandi8 og nemendur þeirra
voru valin um 1200 algeng föst orðatiltæki á dönsku. Horft var til
aðstæðna, þar sem nemendur vildu geta notað málið, og dæmigerðra
orðasambanda þeim tengdum, t.d. afgreiðslu (kan jeg hjælpe?, hvis tur
er det?, ellers andet?), á ferðalögum (hvornår går toget?, jeg vil gerne bes-
tille en togbillet) og daglegri rútínu (god morgen, tak for mad), en einnig
nokkrum algengum orðatiltækjum sem geta verið þrándur í götu
nemenda sem ekki hafa dönsku að móðurmáli (godt gået, i lige måde).
Hægt er að leita frasanna eftir stafrófsröð eða með því að skrifa allan
frasann eða hluta hans í leitargluggann. Þar sem framburður frasanna
er ekki alltaf augljós geta nemendur heyrt þá talaða og hlustað á eigin
framburð. Þá eru gefin jafnheiti frasanna á færeysku, grænlensku
og íslensku, ef þau eru til, en að öðrum kosti er merkingin skýrð.
Fjölmörg og misþung samtalsverkefni er að finna í Taleboblen sem
tengjast aðstæðum þar sem frasarnir koma alla jafna við sögu. Gefin
eru dæmi um samtöl og nemendur geta hlýtt á sjálfa sig tala. Hluti
af Taleboblen var tilraunaverkefnið Talebob sem var hannað til að þjálfa
framburð. Í Talebob, sem var eins konar stafrænn leiðbeinandi, var
lagt upp með að nemendur lærðu að bera frasana fram í samræmi við
venjulegt danskt talmál. Til að hvetja nemendur var tryggt að þeir
fengju strax viðbrögð við framburði sínum með miskátum broskalli
(Henrichsen og Auður Hauksdóttir 2015).
8 Sjá upplýsingar um starfshópinn og styrktaraðila á www.taleboblen.hi.is.
DANSKA OG DÖNSKUNÁM Á ÍSLANDI, GRÆNLANDI OG Í FÆREYJUM
10.33112/millimala.14.1.6