Milli mála - 2022, Qupperneq 174

MILLI MÁLA
Milli mála 14/1/2022 173
4. Könnun á orðabókanotkun framhaldsskólanema
á höfuðborgarsvæðinu
Að lokum má geta þess að það hefur lengi leikið forvitni á að vita
hvort og þá hvaða orðabækur íslenskir nemar í framhaldsskóla nota í
spænskunámi sínu. Tækifæri til að kanna það gafst þegar Estébanez
Bueno vann að lokaverkefni sínu til meistaragráðu í spænskukennslu
veturinn 2021–2022. Til að komast að því hvort nemendur fletta
upp í orðabók á pappír, á rafrænu formi eða notuðu þýðingaforrit
til að afla sér upplýsinga um merkingu eða jafngildi orða, og hvort
þeir flettu upp í einmála eða tvímála orðabókum, var þess farið á
leit við nokkra framhaldsskólakennara að fá að leggja könnun fyrir
nemendur þeirra. Það reyndist auðsótt og var könnun gerð í fjórum
framhaldsskólum á höfuðborgarsvæðinu í apríl 2022. Nafnlaus
könnun á pappír var lögð fyrir í upphafi kennslustundar að rann-
sakanda viðstöddum. Könnunin samanstóð af 23 spurningum á
samtals þremur blaðsíðum. Alls tóku 260 spænskunemar þátt í
könnuninni. Samhliða þessari könnun var spænskukennurum send
könnun rafrænt og tóku 8 starfandi kennarar þátt í henni. Tilgangur
seinni könnunarinnar var að kanna hug og afstöðu kennara til orða-
bókarnotkunar í kennslustundum og tungumálakennslu almennt.
Hér verður stiklað á stóru og helstu niðurstöður beggja kannana
reifaðar í stuttu máli. Ef sjónum er beint að svörum kennaranna
sögðust þeir upplýsa nemendur um helstu tvímálaorðabækur fyrir
tungumálaparið spænsku og íslensku. Þar eru efst á blaði Spænsk-
íslensk orðabók (2007) og Íslensk-spænsk orðabók (2011) sem eru aðgengi-
legar á netinu: snara .is. Nemendur hafa ókeypis aðgang að þessum
orðabókum innan veggja skólans, hvort sem er í tölvu eða síma, og í
sumum tilvikum á prenti.8 Þá svara kennararnir því til að þeir bendi
á önnur verkfæri á netinu sem gætu nýst nemendum. Í könnuninni
kemur einnig í ljós að þeir eru afar hlynntir notkun orðabóka og
hvetja nemendur til að nýta sér þessi hjálpargögn, hvort sem er á raf-
rænu formi eða á bók, við úrlausn verkefna í kennslustund eða heima
(Estébanez Bueno 2022).
8 Í nokkrum kennslustofum blöstu við mörg eintök af Spænsk-íslensk og Íslensk-spænsk orðabókum.
Kennararnir nefndu það hins vegar að prentuðu bækurnar væru sjaldan notaðar þar sem allir
nemendur væru með síma eða tölvu við hendina.
ERLA ERLENDSDÓTTIR