Milli mála - 2022, Page 295

MILLI MÁLA
294 Milli mála 14/1/2022
eins og það væri ekki [verið] að spá í því.“ Þó að hana langi til að
mennta sig meira fallast henni hendur yfir að þurfa að lesa fræði-
greinar á ensku: „Mér fyndist það eftir öll þessi ár í enskukennslu,
mér fyndist það alveg lágmark að maður getur notað heimildir á
ensku, en ég bara treysti mér ekki til þess með mína ensku.“
Þó svo að sumir telji sig slaka í ensku og álíti að framhaldsskólinn
hafi brugðist sér, eru aðrir sem telja ensku létt og þægilegt fag í
framhaldsskóla. Magnús ýjar að því að námið hefði mátt vera þyngra:
„Það telja margir vinir mínir [að] þetta sé allt of létt nám.“ Tvær ung-
ar konur hafa svipaða sögu að segja: „Ég get alveg sagt það, af þessum
fyrstu [áföngum] þá vann maður ekkert, lærði eiginlega ekkert fyrir
þessi próf og maður náði vel samt“; „Ég lagði ekkert mikið á mig og
ég fékk alveg frekar háar einkunnir án þess að þurfa að vera eitthvað
stöðugt að læra.“ Svo leiðinlegt var það að fá alltaf góðar einkunnir í
ensku að þegar hún lítur til baka segir Dagný, 21 árs afgreiðslukona:
„Ég hefði viljað kannski fá einu sinni skell, til þess að þurfa að hafa
meira fyrir þessu“.
Einlæg svör viðmælenda benda til þess að ímynd enskunnar sem
auðvelds tungumáls eigi ekki við rök að styðjast þar sem sumir ungir
Íslendingar ráði ekki við að nota hana á þann hátt sem þeir myndu
vilja þegar á hólminn er komið.
3. Ávinningur af enskunámi í framhaldsskóla
Ein spurning í viðtölunum við eldri viðtalshópana, ungt fólk í
háskólanámi eða vinnu, beindist að því hvort enskunám í framhalds-
skóla kæmi að gagni umfram grunnskólanám. Dæmi eru um að við-
mælendur (bæði þeir sem eru í háskóla og í fullri vinnu) telji sig ekk-
ert hafa fengið út úr framhaldsskólaáföngum í ensku: „[Enskunám í
framhaldsskóla] hefði ekki breytt neinu í mína enskukunnáttu, enda
lærði ég ekki neitt“. Aftur á móti eru margir háskólanemar sem átta
sig á gagnsemi námsins í framhaldsskóla. Svör þeirra eru athyglis-
verð. Viðmælendur virðast átta sig á að dýpri skilningur á málinu
og færni til að nota ensku á fjölbreytilegan hátt sé langtímaverkefni.
Jakob gerir sér einnig grein fyrir breyttum viðmiðum í sambandi við
færni sína:
VIÐHORF NEMENDA TIL ENSKUNÁMS Í FRAMHALDSSKÓLA OG GILDIS ÞESS
10.33112/millimala.14.1.13