Eimreiðin - 01.01.1909, Blaðsíða 15
iS
Eins og barni enn sem fyr
alt mér vorið sýnir,
þó séu bráðum botnlausir
bernsku-skórnir mínir.
í*ó að blessuð æskan öll
óðum sé á förum,
vorsins ljúfu ljósa-höll
ég lít með bros á vörum.
Kom þú blessað, blíða vor!
bræddu ís frá hjarta;
láttu oss taka trygða spor
til hins göfga og bjarta.
Læknaðu hulin hjartasár,
heilsu sjúkum gefðu;
þá, sem fella trega-tár,
tryggum örmum vefðu.
Fátæklingum færðu brauð,
frið og yndi sendu;
líka þeim, sem eiga auð,
alt hið góða kendu.
Gróður sendi um grund og höf
geislar þínir ljósir;
en þeim, sem hjá þér geyma gröf,
gefðu á leiðið rósir.
Blessað vor! þín blómdögg hlý
bræðir klaka strindi.
Hjá þér falla faðmlög í
friður, von og yndi.
GlSLI ÓLAFSSON.
Náttúrulýsingar Jónasar Hallgrímssonar.
(Ræða á ioo ára afmæli hans).
Eftir STEFÁN S'l'EFÁNSSON.
Enginn maður hefur haft jafnopið auga fyrir íslenzkri náttúru-
fegurð og lýst henni jafnfagurlega og Jónas Hallgrímsson.
Náttúrulýsingar hans eru ekki lausir drættir, engar yfirborðs-
lýsingar, er gefi manni ófullkomna og óljósa mynd af því, sem
lýst er.
Nei —- þær eru nákvæmar myndir, þar sem engu — engu
smáatriði er slept, sem útheimtist til þess, að myndin verði glögg.
Og þessar myndir eru dregnar með þeirri snild og þeim
andans yíirburðum, að þær verða algjört listaverk.