Frjáls verslun - 01.11.2007, Blaðsíða 44
44 F R J Á L S V E R S L U N • 1 1 . T B L . 2 0 0 7
ársinsMenn20 ár
Þorgeir Baldursson, forstjóri
Prentsmiðjunnar Odda, var maður
ársins í íslensku viðskiptalífi árið 1992
að mati Frjálsrar verslunar og Stöðvar 2.
Í rökstuðningi dómnefndar sagði meðal
annars, að Prentsmiðjan Oddi hefði
skilað feikigóðum árangri í rekstri árin á
undan og að baki því lægi þrotlaus vinna
og útsjónarsemi. Þorgeir var nýorðinn
fimmtugur þegar hann hlaut útnefninguna
og var faðir hans, Baldur Eyþórsson, áður
forstjóri Odda og einn af stofnendum
fyrirtækisins. Þorgeir byrjaði snemma að
vinna hjá Odda, varð sendill 12 ára og
hefur unnið hjá fyrirtækinu síðan. Hann
varð verkstjóri 23 ára og sinnti jafnframt
framleiðslustjórnun og tæknimálum og tók
síðan við forstjórahlutverkinu þegar faðir
hans lést árið 1982. Oddi varð að stórveldi í
íslensku viðskiptalífi undir stjórn Þorgeirs.
Prentsmiðjan Oddi var stofnuð hinn
9. október 1943, starfsemin hófst í einu
horni Ásmundarsalar við Freyjugötu og
voru starfsmennirnir þrír. Mikið vatn hefur
runnið til sjávar frá því að frumherjarnir
hófu rekstur Odda í fyrrnefndu leiguhúsnæði
og var Þorgeir spurður í forsíðuumfjöllun
Frjálsrar verslunar árið 1992 hvað lægi að
baki framúrskarandi árangri fyrirtækisins,
en fyrsta skóflustungan að byggingu eigin
húsnæðis var tekin í ágúst árið 1979.
„Framsýni gömlu mannanna ... hafði
verulega mikið að segja. Þeir byggðu 5.000
fermetra hús, sem þótti fáránlega stórt á
sínum tíma fyrir prentsmiðju í svona litlu
samfélagi. Þegar gamli maðurinn valdi sér
lóð hafði hann í huga að geta byggt við síðar.
Hann hafði upplifað það á öllum stöðunum
sem fyrirtækið hafði verið á áður, að
húsnæðið varð of þröngt og engir möguleikar
á því að stækka. Hann ætlaði ekki að láta
það henda oftar. Það þótti auðvitað alveg
fáránlegt að ætla sér að bæta við 5.000
fermetra hús. Síðan höfum við byggt við í
tvígang og erum nú á 10.000 fermetrum og
eigum möguleika á að bæta við einni álmu.“
Árið 1992: Þorgeir Baldursson
forstjóri Prentsmiðjunnar Odda
Hvar er hann núna?
Húsnæði Odda hefur stækkað
jafnt og þétt frá því starfseminni
tók að vaxa fiskur um hrygg
og hefur vöxturinn verið ör á
undanförnum árum. Oddi er nú í
hópi fullkomnustu og fjölhæfustu
prentsmiðja á Norðurlöndum.
Framgangur eignarhaldsfélagsins
hefur verið efldur með kaupum á
íslenskum og erlendum fyrirtækjum
í skyldum rekstri og samþættingu
starfseminnar og er svo komið að
meirihluti veltunnar er erlendis. Hinn
1. janúar 2006 varð sú breyting
á skipulagi Prentsmiðjunnar
Odda og dótturfélaga hennar að
skilið var á milli eignarhalds og
eignaumsýslu annars vegar og
framleiðslu- og verslunarstarfsemi
hins vegar. Þannig varð Kvos til sem
móðurfélag samstæðunnar. Í byrjun
ársins 2007 voru dótturfélögin orðin
11 og starfsmenn félaga í eigu
Kvosar um 1.300 talsins. Áætluð
velta fyrirtækisins árið 2007 nemur
um 12 milljörðum króna. Þorgeir
Baldursson er forstjóri Kvosar hf.
en undir hatti þess eru Gutenberg,
Kassagerðin, Oddi, OPM, Prentun.
com, Oddi Atlantic, Oddi Printing
Corporation, Oddi Pólland og
Infopress Group.
1992Útnefningar í
Heilmikil viðurkenning
„Útnefningin var auðvitað mjög
ánægjuleg á sínum tíma og
staðfesting á því við værum að gera
eitthvað rétt. Þetta var heilmikil
viðurkenning fyrir fyrirtækið, vakti
athygli og var jákvætt innlegg,“
segir Þorgeir Baldursson. Hann
átti jafnframt sæti í dómnefnd
Frjálsrar verslunar í tíu ár, eða þar
til fyrir tveimur árum. Þorgeir er í
dag forstjóri eignarhaldsfélagsins
en sinnti á árum áður daglegum
rekstri prentsmiðjunnar. „Það er
auðvitað gerólíkt og ekki laust við
að maður sakni gamalla tíma þegar
jólabókaflóðið skellur á,“ segir hann.