Lögmannablaðið - 01.03.2010, Blaðsíða 11
Af vettvangi félagsins
Stjórn Lögmannafélags Íslands hefur sent erindi til efnahags-
og viðskiptaráðuneytisins vegna fyrirhugaðra breytinga á
innheimtulögum nr. 95/2008. Auk ábendingar um að leiðrétta
þurfi ákvæði 2. mgr. 15. gr. núverandi laga, þar sem eftirlit
með lögmönnum sé lögum samkvæmt í höndum
Lögmannafélags Íslands en ekki úrskurðarnefnd lögmanna, er
í erindinu bent á að í ljósi óskýrleika gildandi laga og ríkjandi
ágreinings um túlkun, þurfi að skilgreina betur hugtakið
„löginnheimtu“ samkvæmt 2. mgr. 1. gr. innheimtulaganna
og skýra með markvissum hætti á hvaða tímapunkti
löginnheimta hefjist. Að mati stjórnar félagsins sé rétt að líta
svo á að þegar skuld hefur verið send lögmanni til innheimtu
og hann hefur innheimtuaðgerðir með því að senda skuldara
lokaviðvörun um greiðslu, áður en málinu er stefnt fyrir dóm,
sé löginnheimta hafin og lögmanni því heimilt að bæta
innheimtuþóknun samkvæmt gildandi gjaldskrá við kröfuna,
enda séu úrræði frum- og milliinnheimtu samkvæmt
innheimtulögum tæmd áður en til þessa kemur. Bendir
stjórnin á að lokaviðvörun af þessu tagi heyri til góðra
lögmannshátta, sé í þágu hagsmuna skuldara og komi í veg
fyrir að lögmanni sé í raun þröngvað til að hefja
innheimtuaðgerðir með útgáfu stefnu til að fá innheimtu-
þóknun vegna vinnu sinnar greidda.
Þá telur stjórn Lögmannafélagsins eðlilegt að skýra betur
lögsögu eftirlits með innheimtustarfsemi gagnvart lögaðila
sem er í eigu félags í eigu lögmanns/lögmannsstofu. Bendir
stjórnin á að samkvæmt 2. gr. reglna Fjármálaeftirlitsins nr.
1210/2008, um framkvæmd eftirlits með innheimtustarfsemi,
þurfi lögaðili sem er að öllu leyti í eigu lögmanns/lögmanna
og/eða lögmannsstofa ekki innheimtuleyfi að því skilyrði
uppfylltu að starfsemin falli undir eftirlit Lögmannafélags
Íslands. Í framkvæmd hefur sama verið talið gilda um
dótturfyrirtæki slíkra innheimtufyrirtækja eða eignar-
haldsfélaga. Telur stjórn Lögmannafélagsins umhugsunarvert
hvort ekki sé eðlilegra að skilgreina eftirlitshlutverk félagsins
þrengra í innheimtulögunum þannig að það nái aðeins til
innheimtustarfsemi sem rekin er af lögmanni/lögmannsstofu
beint eða eftir atvikum í dótturfélagi í beinni eigu lögmanns
og/eða lögmannsstofu. Ef fleiri milliliðum er hins vegar bætt
við á milli lögmanns/lögmannsstofu og innheimtustarfseminnar
sé heppilegra að slík innheimtustarfsemi sæki um
innheimtuleyfi og eigi þá undir eftirliti Fjármálaeftirlitsins.
II
Tillögur um breytingar á innheimtulögum nr. 95/2008