Morgunblaðið - 03.03.2002, Qupperneq 14

14 B SUNNUDAGUR 3. MARS 2002 MORGUNBLAÐIÐ
Að ungra manna sið þurftu þeir Bjarni Gylfason og Magnús
Bjarnason að láta reyna á ísinn á Hólatjörn.
„Snjóbolti“ og gestanemendur
Þeir sem búa við ysta haf veigra sér ekki við útivistinni og það
á jafnt við um unga sem aldna í Grímsey. Krakkarnir í skólanum
eru til dæmis hinir ánægðustu með körfuna á leikvellinum við
skólann, þar geta þeir æft körfuboltann af miklum móð og skiptir
auðvitað engu máli þótt snjór liggi yfir öllu. Fyrst snjórinn dregur
ekkert úr fótboltaiðkaninni, þá er jú engin ástæða til að láta hann
setja strik í körfuboltareikninginn.
Krakkarnir í skólanum í Grímsey taka gestum opnum örmum,
eins og aðrir eyjaskeggjar. Ef krakki kemur í heimsókn til ömmu
og afa á eyjunni þykir ekkert tiltökumál að munstra hann sem
gestanemanda og leyfa honum að sitja tíma. Hann missir þá ekki
úr námi á meðan.
Bræla á brælu ofan
Slæm tíð hefur sett mark sitt á atvinnulífið í vetur. Sjósókn hef-
ur verið lítil frá áramótum, því mjög vindasamt hefur verið. Karl-
arnir bíða óþolinmóðir betri gæfta. Bátar í Grímsey eru flestir
smáir og algengast að menn rói einir eða við annan mann. Tveir
bátar eru sýnu stærstir, Þorleifur og Sæbjörgin, en þrír menn eru
oftast á hvorum.
Á fimmtudag í liðinni viku var fallegt veður og þá fór hver kopp-
ur á sjó, en á föstudag hafði aftur gert vonskuveður með stórsjó.
Engir bátar fóru út þann daginn og þeir sem erindi áttu í land
hleyptu í herðarnar þegar þeir stigu um borð í Sæfara og sáu
fram á fjögurra tíma siglingu í haugasjó.
Í fámenninu ríkir ekki sama sérfræðingaveldið og í þéttbýlinu.
Kannski væri réttara að segja að hver og einn þurfi að vera sér-
fræðingur í mörgu í Grímsey. Sigurður Bjarnason á vélaverk-
stæðinu er ágætt dæmi um þetta. Auk þess að reka almennt
verkstæði sér hann um rafstöðina, er slökkviliðsstjóri eyjarinnar
og kemur jafnt að viðhaldi báta, bíla og húsa. Þá er áreiðanlega
eitthvað ótalið.
Líf á landkríli
Valgerður Þorsteinsdóttir var gestanemandi í grunnskólanum eina viku í febrúar. Hún sækir annars skóla á Seltjarnarnesi, þar sem hún býr.
Einn yngsti Grímseyingurinn, Konný Ósk Bjarnadóttir, örugg í bílnum hans pabba á meðan brimskaflarnir dynja á hafnargarðinum.
Á öskudaginn fóru börnin í fyrirtæki og s