Morgunblaðið - 10.12.2003, Blaðsíða 6

6 B MIÐVIKUDAGUR 10. DESEMBER 2003 MORGUNBLAÐIÐ
bílar
MIKIL umbreyting hefur orðið á
allri Mégane-línunni hjá Renault.
Hver nýi bíllinn á fætur öðrum hefur
verið kynntur og nú er röðin komin
að annarri kynslóð fjölnotabílsins
vinsæla, Scénic. Scénic II, en svo
heitir bíllinn, er hluti af nýju Még-
ane-línunni frá Renault en þar trónir
fremstur hlaðbakurinn sem var val-
inn bíll ársins í Evrópu 2003. Nú hef-
ur Renault Scénic að auki bætt á sig
titlinum öruggasti bíllinn í sínum
flokki, samkvæmt árekstrarprófun
Euro NCAP.
Þrátt fyrir að vera á síðasta ári í
framleiðslu var Scénic mest seldi
bíllinn í sínum flokki í Evrópu með
25,9% markaðshlutdeild, sem segir
allt sem segja þarf um yfirburði
Renault í þessum flokki bíla.
Það sem breytist með nýrri kyn-
slóð er að Scénic er núna boðinn í
tveimur gerðum, þ.e.a.s. fimm sæta
og sjö sæta, þar sem hann keppir
auðvitað við bíla eins og VW Touran
og Opel Zafira.
10 cm meira hjólhaf
Útlitsbreytingin er líka mikil.
Horfin eru ávölu formin sem gerðu
Scénic líkastan risavöxnum vatns-
dropa. Nú hefur hann fengið útlits-
svip frá hlaðbaknum, sem vakti gríð-
arlega athygli þegar hann kom á
markað snemma á þessu ári fyrir
byltingarkennt útlit. Allar línur eru
orðnar skarpari og um leið nútíma-
legri og jafnframt er bíllinn 8 cm
lengri en forverinn. Hjólhafið hefur
aukist um 10 cm sem leiðir til bættra
aksturseiginleika og meira innan-
rýmis en áður.
Scénic er boðinn í tveimur bún-
aðarútfærslum, þ.e.a.s. Authentic
Comfort og Dynamique. Prófaður
var Scénic með 1,6 lítra bensínvél,
115 hestafla, í Authentic-útgáfu.
Framsætin eru með hæðarstillingu
og ökumaður finnur sig strax undir
stýri. Sætin styðja vel við bakið og
eru um leið þægileg. Gírstöngin er í
mælaborðinu sem er ákaflega þægi-
leg staðsetning því hún leikur í
höndum ökumanns. Stutt er á milli
gíra og skiptingin er liðug og ratvís.
Athygli vekur líka að engin hefð-
bundin handbremsustöng er í bíln-
um því handbremsan er rafstýrð og
sjálfvirk. Eins og í flestum öðrum
Renault-bílum er komið lykilkort í
stað hefðbundins lykils og bíllinn
ræstur með því að stinga því í þar til
gerða rauf og þrýsta á Start-hnapp-
inn. Hægt er að fá lykilkortið með
skynjara þannig að bíllinn opnast
sjálfkrafa þegar ökumaður nálgast
hann með kortið í vasanum.
1,6 l vélin í það minnsta
Það finnst strax í reynsluakstri að
hér er á ferðinni betri bíll. Veggripið
er meira og bíllinn er líka betur ein-
angraður, bæði frá vegi og vél. Vélin
er 1,6 lítra og skilar að hámarki 115
hestöflum. Þetta er ekkert orkubúnt
en dugar bílnum engu að síður
þokkalega. Spurning er þó hvort hún
dugi bílnum þegar hann er fullhlað-
inn og jafnvel með aftaníkerru eða
toppgrind fulla af farangri.
Scénic er með stýri með rafmótor,
eins og svo margir nýir smábílar og
millistærðarbílar. Þetta er búnaður
sem dregur úr bensíneyðslu en gerir
stýrið jafnframt loðnara í svörun.
Bíllinn er léttur í stýri í öllu skaki
innanbæjar en þyngist strax og
hraða er náð.
Kosturinn við bíla af þessari gerð,
þ.e.a.s. fjölnotabíla, er hið þægilega
inn- og útstig, fyrir utan fjölbreytta
notkunarmöguleika. Það þarf ekkert
að bogra þegar farið er inn í bílinn –
það er sest inn í hann, ekki niður í
hann. Sætastaðan er sömuleiðis
hærri en í hefðbundnum fólksbílum
sem leiðir til betri yfirsýnar út á veg-
inn og þægilegri stöðu í langkeyrslu.
Menn þreytast síður undir stýri þeg-
ar sætastaðan er þetta há.
Smáhólf og stærri hólf
Innréttingarnar eru breyttar í
nýjum Scénic en eins og áður er
áhersla lögð á margar og notadrjúg-
ar hirslur. Á milli framsætanna er
t.a.m. 15 lítra hirsla sem er færan-
leg. Hanskahólfið tekur síðan 17
lítra og undir framsætunum eru
geymsluskúffur. Samtals taka öll
litlu geymsluhólfin inni í bílnum 91
lítra, og geri aðrir betur. Aftursætin
eru á sleða og hægt að renna þeim
fram eða aftur eftir þörfum en einnig
er einfalt að kippa þeim út úr bílnum
ef þörf er á enn meira flutningsrými.
Keppinautarnir eru allmargir
orðnir í þessum flokki bíla. Þarna
eru bílar eins og VW Touran, Opel
Zafira, Peugeot 307 SW, Ford C-
Max og Toyota Corolla Verso, svo
fáeinir séu nefndir. Renault getur
vel við unað í verðsamkeppninni því
bíllinn kostar í grunngerðinni, Auth-
entic Comfort 2.140.000 kr. Í Dyn-
amique-útfærslunni, þar sem við
ríkulegan staðalbúnað bætist að
auki sportinnrétting, leðurklætt
stýri og gírhnúður, samlitir hliðar-
speglar, 16" álfelgur og fleira, kostar
hann hins vegar 2.240.000 kr.
Með nýjum Scénic hefur Renault
tekist að halda öllum þeim kostum
fjölnotabílsins sem einkenndu fyrstu
kynslóð bílsins en jafnframt bæta út-
litið í takt við aðra bíla í Mégane-
línunni og bæta auk þess aksturseig-
inleikana til muna. Renault hefur því
enn á ný skipað sér til hásætis í
flokki fjölnotabíla.
Nýr Scénic – laglegri og betri í akstri
Útlit bílsins er gerbreytt og hann orðinn 8 cm lengri en áður.
Borð eru aftan á framsætisbökunum. Snyrtileg hönnun að innan og gírstöngin í miðju mælaborðinu.
Farangursrýmið er mikið og stækkanlegt með því að fella niður aftursætisbök eða fjarlægja sæti.
Vél: Fjórir strokkar, 1.598
rúmsentimetrar, VVT
(breytilegur opnunartími
ventla).
Afl: 115 hestöfl við 6.000
snúninga á mínútu.
Tog: 152 Nm við 4.200
snúninga á mínútu.
Hröðun: 12,5 sekúndur úr
kyrrstöðu 100 km/klst.
Hámarkshraði:
185 km/klst.
Gírkassi: 5 gíra
handskiptur.
Lengd: 4.259 mm.
Breidd: 1.805 mm.
Hæð: 1.620 mm.
Eigin þyngd: 1.315 kg.
Veghæð: 130 mm.
Eyðsla: 9,3 l innanbæjar,
7,2 í blönduðum akstri.
Hemlar: Diskar, ABS
og EBD.
Farangursrými: :
430l/1.840 l.
Verð: 2.140.000 kr.
Umboð: B&L hf.
Renault Scénic 1,6
Authentic Comfort
gugu@mbl.is
REYNSLUAKSTUR
Renault Scénic 1,6
Guðjón Guðmundsson
Morgunblaðið/Þorkell
Hægt er að opna afturrúðuna sjálfstætt og óháð hleranum.