Morgunblaðið - 03.06.2005, Blaðsíða 12

12 B FÖSTUDAGUR 3. JÚNÍ 2005 MORGUNBLAÐIÐ
bílar
L
exus kynnti í síðustu viku
RX400h borgarjeppann í
Aþenu í Grikklandi. RX400h
er fyrsti borgarjeppinn með
tvinnvél, þ.e.a.s. bæði bensínvél og
rafmagnsmótorum. Blaðamaður hélt
til Aþenu til að prófa bílinn, sem
reyndar er þegar kominn í einu ein-
taki hingað til lands. Hér verður bíll-
inn síðan formlega kynntur síðar í
mánuðinum.
Saga tvinnbíla, á ensku hybrids, er
ekki löng. Toyota, móðurfyrirtæki
Lexus, ákvað snemma á tíunda ára-
tug síðustu aldar að þróa tvinnbíla í
stað þess að leggja of mikla áherslu á
þróun efnarafalabíla, þar sem þeir
eru ekki taldir verða raunverulegur
kostur fyrr en eftir nokkuð mörg ár.
Þess í stað vildi Toyota setja fram
nýja tækni sem miðar að því að draga
úr eldsneytisnotkun með afar há-
tæknivæddri aflrás. Toyota ákvað
jafnframt að þróa sjálft sína tvinnbíla
innanhúss í stað þess að reiða sig á
tæknifyrirtæki og birgja utanhúss. Af
þessari ástæðu hefur Toyota núna
byggt upp gríðarlega þekkingu á
þessu sviði og þótt tvinnbílar, þ.e.a.s.
bílar með hefðbundinni bensínvél og
rafmótor, séu ennþá í hugum margra
byltingarkennd og fjarlæg nýjung, þá
er ljóst að þessi tækni er komin til að
vera og breiðast út á komandi árum.
Önnur kynslóð Toyota Prius hefur
t.a.m. mikið tæknilegt forskot á fyrsta
bílinn og um leið og tækniþekkingu
Toyota fleygir fram á þessu sviði
verða bílarnir léttari, aflmeiri og
ódýrari í framleiðslu.
Umhverfisvænleiki
en ekki á kostnað aflsins
Lexus, lúxusbílaarmur Toyota,
valdi eina menguðustu borgina í Evr-
ópu til þess að kynna nýja „ofurtvinn-
bílinn“ Lexus RX400h, sem er fyrsti
borgarjeppinn í heimi með tvinnvéla-
kerfi. Staðsetning kynningarinnar
var vel við hæfi því í Aþenu er mistur
yfir allri borginni daglangt og hávaða-
mengun mikil, en nýi tvinnbílinn get-
ur bæði verið hljóðlátur og sparneyt-
inn ef menn kjósa. En hann getur líka
gefið frá sér hljóð og eytt talsvert
miklu ef menn keyra hann á þann
hátt.
Hjá Lexus hafa menn gert sér
grein fyrir því að bílkaupendur eiga
margir erfitt með að skipta út afli fyr-
ir umhverfissjónarmið og þess vegna
þurfti að samræma þetta tvennt. Og
til þess að gera langa sögu stutta þá
tókst Lexus áætlunarverkið mæta
vel.
Í Aþenu gafst tækifæri að aka
RX400h bæði á hraðbrautum og
meira krefjandi fjallavegum og var
það undarlegt að finna allt aflið sem
bjó í bílnum. Hann er t.a.m. mun fljót-
ari í 100 km hraða en RX300, eða 7,6
sekúndur á móti 9 sekúndum. Undir
vélarhlífinni er þó ekki nema 3,3 lítra,
V6 bensínvél en auk þess eru í bílnum
tveir rafmótorar, einn fyrir framhjól-
in og annar fyrir afturhjólin. Það er
síðan flókið og tæknilegt úrlausnar-
efni að koma þessu öllu heim og sam-
an og verður ekki farið nánar út í þá
sálma hér. RX400h er hins vegar með
sanni fjórhjóladrifinn og í raun sí-
tengdur þó rafmótorinn fyrir aftur-
hjólin skili yfirleitt ekki nema 10% af
heildaraflinu til afturhjólanna. Aftari
mótorinn snýst síðan hraðar með
meiri inngjöf og skilar þá meira átaki
til afturhjólanna.
Samtals er vélaraflið frá bensínvél-
inni og rafmótorunum þremur um 272
hestöfl, þar af um 211 hestöfl frá
bensínvélinni. Með tvinnvélatækninni
hefur Toyota því náð sambærilegu
afli út úr V6 vélinni og rafmóturunum
eins og úr V8 bensínvél, en með mun
minni eldsneytisnotkun. Lexus gefur
upp 8,1 lítra í blönduðum akstri.
Eyðslan fór þó reyndar upp í rúma 16
lítra á hundraðið á fjallvegunum,
samkvæmt aksturstölvunni í bílnum,
en þá var líka ekið með inngjöfina í
botni á milli krappra beygjanna.
Þar sem útgangspunkturinn með
tvinnbílum eru umhverfissjónarmið
fyrst og fremst kom þægilega á óvart
hve aflmikill bíllinn samt er. Það hef-
ur löngum verið talinn óyfirstíganleg-
ur fylgifiskur umhverfisvænna bíla að
þeir væru jafnframt fremur aflvana.
Svo er þó engan veginn í RX400h.
Við fengum afhenta lykla í anddyri
Sheratons hótelsins við flugvöllinn í
Aþenu ásamt kortabók með fyrirfram
ákveðinni leið sem ekin var um borg-
ina og sveitirnar í kring. Það er
merkileg tilfinning í sjálfu sér að snúa
lykli í bíl og það eina sem heyrist er
lágvært rafsuð. Bíllinn er engu að síð-
ur kominn í gang og þannig hægt að
læðast á honum um íbúðahverfi án
þess að valda nokkrum truflunum
með vélarhljóðum. RX400h er hrein-
ræktaður tvinnbíll sem þýðir að hann
getur gengið eingöngu á rafmagninu
eða eingöngu fyrir bensínvélinni eða
hvorttveggja í senn. Rafmagn knýr
loftkælinguna, vatnsdæluna, rafalinn
og vökvadæluna fyrir stýrið sem þýð-
ir að bíllinn hefur vökvastýrið og loft-
kælinguna virka jafnvel þótt hann
gangi einungis fyrir rafmagninu. Um
leið og farið er fram á meiri hröðun
með því að stíga hraustlegar á inn-
gjöfina kemur til kasta bensínvélar-
innar. Hún og rafmótorarnir búa síð-
an til magnað vélarhljóð sem minnir
ekki á hljóð frá öðrum vélum.
Eins og í tvinnkerfinu í Prius er
RX400h stöðugt að hlaða orku sem
verður meðal annars til við hemlun
inn á rafgeymana. Í prófunarbílnum í
Aþenu, sem var útbúinn leiðsögu-
kerfi, mátti fylgjast með þessari
hringrás orkunnar á 7" skjánum í
mælaborðinu.
„Svagur“ í beygjum
en vinnur á í sportlegri beitingu
RX400h er að sjálfsögðu byggður á
RX300 en er lítið eitt lengri, um 2,5
cm, og nálægt 150 kg þyngri. Bíllinn
hraðar sér ánægjulega vél og hljóðið
frá aflrásinni kemur manni í opna
skjöldu í fyrstu. Aflrásin nefnilega
urrar á góðri inngjöf en steinþegir
þegar hægt er tekið af stað. Rafeinda-
stýrð CVT-skipting er í bílnum sem
er þreplaus.
Undirritaður fann fyrir allt öðru-
vísi hegðun bílsins í fyrstu beygjunum
en í hefðbundnum RX300. Meira var
um hliðarhreyfingar í undirvagninum
en undirritaður átti von á og var eins
og aukaþyngdin hefði breytt karakter
bílsins miðað við venjulegan RX300.
Þessi tilfinning vék þó strax til hliðar
þegar farið var að beita bílnum að ein-
hverju ráði á krókóttum fjallvegum í
kringum Aþenu og kom þar í ljós að
um leið og afturdrifið er gert virkt
með mikilli inngjöf grípur bíllinn
virkilega vel í beygjum. Á hraðbraut-
arkeyrslu er bíllinn stöðugur og fer
yfir 200 km/klst. án þess að pústa. Það
sem eftir stendur eftir reynsluakst-
urinn á RX400h er að hér er á ferðinni
byltingarkenndur, aflmikill borgar-
jeppi sem er skemmtilegur í akstri,
vel búinn og vel smíðaður. Aflrásin
dregur síðan úr samviskubiti þeirra
sem verst eru haldnir vegna ástands í
umhverfismálum.
RX400h verður fáanlegur í tveimur
útfærslum hérlendis, þ.e. EXE og
Luxury. Staðalbúnaður er m.a. CVT-
skipting, spólvörn, stöðugleikastýr-
ing, ABS-hemlakerfi með ECB, raf-
eindastýrðri hemlun, og BAS, heml-
unarátaksdreifingu., Xenon ljós með
sjálfsvirkri aðlögun (stefnuvirk ljós),
9 öryggispúðar, 18 tommu álfelgur og
margt fleira. Í EXE-útfærslu kostar
hann 6.200.000 kr. en 6.750.000 kr. í
Luxury-útfærslu. Til samanburðar
má nefna að RX300 kostar 5.550.000
kr. í EXE-útfærslu og 6.000.000 kr. í
Luxury.
Lexus RX400h —
tvinnjeppi sem virkar
Luxury-útfærslan er hin glæsilegasta að innan en skjárinn er ekki
til staðar í þeim gerðum sem seldar verða hér, nema sérpantað sé.
Burstað ál, leður og hágæðaplastefni eru í mælaborði.
Morgunblaðið/Guðjón Guðmundsson
RX400h er fyrsti borgarjeppinn með tvinnvélakerfi.
Í útliti er RX400h eins og RX300 en þó eru aðrar afturlugtir og annað grill.
Skjár fylgir leiðsögukerfinu. Þar má fylgjast með aflrás bílsins.
Bensínvél: V6, 3.311
rúmsentimetrar, 24
ventlar, VVT-i.
Afl: 211 hestöfl við 5.600
snúninga á mínútu.
Tog: 288 Nm við 4.400
snúninga á mínútu.
Rafmótor að framan:
Afl: 123 kW við 4.500
snúninga.
Tog: 333 Nm frá 0-1.500
snúninga á mínútu.
Hámarkssnúningshraði:
12.400 snúninga
á mínútu.
Rafmótor að aftan:
Afl: 50 kW við 4.610-
5.120 snúninga á mínútu.
Tog: 130 Nm frá 0-610
snúninga á mínútu.
Rafhlaða: Nikkel-málm.
Gírskipting: E-CVT,
rafeindastýrð, þreplaus
sjálfskipting.
Hjólbarðar og felgur: 235/
55R18, 18" álfelgur.
Hröðun: 7,6 sekúndur úr
kyrrstöðu í 100 km/klst.
Hámarkshraði: 200 km.
Eyðsla: 8,1 lítri í
blönduðum akstri,
9,1 lítri innanbæjar.
Lengd: 4.755 mm.
Breidd: 1.845 mm.
Hæð: 1.670 mm.
Hjólhaf: 2.715 mm.
Eigin þyngd: 2.000 kg.
Verð: 6.200.000 kr.
(EXE), 6.750.000 kr.
(Luxury).
Umboð: Lexus á Íslandi.
Lexus
RX400h
REYNSLUAKSTUR
Lexus RX400h
Guðjón Guðmundsson
gugu@mbl.is
Brugðið var á leik í fjörunni á Sounio-skaganum í Grikklandi.