Bændablaðið - 28.08.2007, Síða 23

Bændablaðið | Þriðjudagur 28. ágúst 20073
Handverksmaður ársins 2007 var
kynntur á hátíðinni Uppskera
og handverk 2007 sem hald­
in var aðra helgina í ágúst við
Hrafnagilsskóla í Eyjafjarðarsveit.
Að þessu sinni var Guðrún Hadda
Bjarnadóttir valin handverks­
maður ársins, meðal annars fyrir
frumkvöðlastarf sitt og fyrir að
leggja allt í sölurnar til að hug­
sjónir hennar rætist.
Guðrún Hadda vefur með líni og
bómull og einnig úr hálmi og sér­
hæfir sig því í náttúruefnunum.
„Þegar ég var níu ára prjónaði
ég fyrstu peysuna mína, sem var
ekki óvanalegt á þeim tíma svo
þetta geta níu ára börn gert en það
eru ekki gerðar eins miklar kröfur
til barna nú til dags. Á sínum tíma
fór ég í verknám í gagnfræðiskóla í
Reykjavík þar sem var afar flott og
vönduð kennsla í textíl. Ég saum­
aði alltaf og prjónaði á mig föt og
þetta var vissulega á mínu áhuga­
sviði en síðan opnaðist mér svolítið
ný hugsun þegar ég bjó í Svíþjóð
í níu ár. Þar var þjóðlegt handverk
mikils metið og það var unnið mjög
fallega og af mikilli hugsjón. Þegar
ég kom svo heim og settist að á
Akureyri hafði ég sterka og örugga
tilfinningu gagnvart heimilisiðnaði.
Ég fór í Myndlistarskólann en þar
var „tabú“ að tala um heimilisiðnað
með virðingu og lotningu því þá var
maður ekki myndlistamaður. Þegar
síðan 20 milljónir króna voru veitt­
ar úr Jóhannesarsjóðnum vítt um
landið til að halda konum í sveit­
um fór handverkið smám saman
að skapa sér sinn sess. Það var þó
ekki verið að upphefja handverkið
sem slíkt, heldur upphefja það sem
söluvöru,“ segir Guðrún Hadda.
Í handverksstjórn og
Laufáshópnum
Guðrún Hadda hefur fengist við
kennslu á Akureyri sem tengist
handverki hennar, bæði í Mennta­
smiðju kvenna og í grunnskólanum,
svo fátt eitt sé nefnt.
„Fyrir nokkrum árum var ég
beðin að vera í handverksstjórn­
inni fyrir sýninguna í Hrafnagili og
ég vildi að til þess að handverkið
þróðist væru haldin námskeið á
sýningunni og að þetta yrðu eins
konar töðugjöld. Út úr þessu fékk
ég til dæmis fleiri tíma í handverki í
skólum í Eyjafjarðasveit því að mér
fannst skrýtið að halda handverks­
sýningu hér í Eyjafirði ef ekki væri
mikil handverksmenning á svæðinu.
Sýningin er að breytast og þróast
og aðsóknin sífellt að aukast, sem
er mjög jákvætt fyrir handverks­
fólk um allt land,“ útskýrir Guðrún
Hadda sem tilheyrir jafnframt
Laufáshópnum sem vinnur að því
að viðhalda þekkingu á þjóðháttum
landsins, hvort sem er í handverki,
tónlist, sagnahefð eða náttúru. ehg
Guðrún Hadda við bækistöð sína á
hátíðinni Uppskera og handverk 2007
sem haldin var aðra helgina í ágúst
við Hrafnagilsskóla í Eyjafarðarsveit.
Prjónaði fyrstu peysuna níu ára