Morgunblaðið - 18.06.2014, Page 30

30 MENNING
MORGUNBLAÐIÐ MIÐVIKUDAGUR 18. JÚNÍ 2014
Tapashúsið | Ægisgarður 2, 101 Reykjavík | info@tapashusið.is
NÝR OG SPENNANDI
MATSEÐILL
TAPASHÚSID BORDPANTANIR
Í SÍMA 512-8181
Tónlistarhátíðin Bergmál verður
haldin í fimmta skipti 19.–22. júní í
Menningarhúsinu Bergi á Dalvík
og verða þrennir tónleikar haldnir
með tónverkum sem spanna vítt lit-
róf, allt frá djúpum þönkum Jo-
hannesar Brahms til skemmti-
tónlistar Franz Lehár með
viðkomu í rússneskum þjóðsagna-
heimi, París aldamótanna og ís-
lenskri sumarnæturkyrrð, að því er
segir í tilkynningu.
Á opnunartónleikunum annað
kvöld kl. 20 hljóma verk gamalla
meistara úr ýmsum áttum, m.a.
Fiðlusónata Mozarts í e-moll, og á
laugardaginn hljómar tónlist um
fugla og náttúru. Lokatónleikar
Bergmáls bera yfirskriftina „Aríur
og fingraflugeldar“ og á þeim mun
m.a. hljóma virtúósísk hljóðfæra-
tónlist eftir jafnólíka höfunda og
Richard Strauss, Taffanel og
Poulenc. Tónlistarmenn á hátíðinni
í ár eru Margrét Hrafnsdóttir sópr-
an, Helga Þóra Björgvinsdóttir
fiðluleikari, Hafdís Vigfúsdóttir
flautuleikari, Grímur Helgason
klarínettuleikari, Ella Vala Ár-
mannsdóttir hornleikari, Caro
Aguilera básúnuleikari og píanó-
leikararnir Ástríður Alda
Sigurðardóttir og Kristján Karl
Bragason.
Hátíð Tónlistarmennirnir á Bergmáli uppstilltir að hætti Dalton-bræðra.
Bergmál í fimmta
sinn á Dalvík
Davíð Már Stefánsson
davidmar@mbl.is
„Þetta er náttúrulega viðurkenning
sem ég er afskaplega þakklátur
fyrir. Í lífi mínu og starfi er þetta
einstaklega ánægjulegt. Verðlaunin
koma mér þar að auki svo sann-
arlega á óvart,“ segir Gunnar Þórð-
arson, sem í gær hlaut þann heiður
að vera valinn borgarlistamaður
Reykjavíkurborgar árið 2014. Það
var borgarstjóri Reykjavíkur, Dag-
ur B. Eggertsson, sem útnefndi
Gunnar, en athöfnin fór fram í
Höfða og gerði Einar Örn
Benediktsson, fráfarandi formaður
menningar- og ferðamálaráðs,
grein fyrir vali ráðsins á borgar-
listamanni.
Ekki unnið frá átján ára aldri
Gunnar ættu flestir að þekkja, en
hann hefur verið eitt helsta tón-
skáld þjóðarinnar allt frá því að
Hljómar voru stofnaðir árið 1963.
Gunnar hefur auk þess verið iðinn
við að útsetja og taka upp lög, en
alls liggja eftir hann rúmlega 650
lög sem gefin hafa verið út á hljóm-
plötum. Auk þess hefur hann samið
tónverk fyrir kvikmyndir, söngleiki
og leikverk. Hann segir ekkert eitt
standa upp úr frá tónlistarferli sín-
um en hann segir árin hafa verið
nokkuð jöfn hvað atorkusemi varð-
ar.
„Þetta hefur nú bara verið nokk-
uð jafnt í gegnum árum. Maður
hefur bara verið í því að spila, taka
upp lög og útsetja þau. Eins og ég
segi, ég hef eiginlega ekkert unnið
frá því að ég var átján ára,“ segir
Gunnar sposkur, en hann varð þess
heiðurs aðnjótandi árið 1975 að
verða fyrstur íslenskra tónlistar-
manna til að fá listamannalaun.
Þykir vænt um Reykjavík
Þrátt fyrir að vera borgar-
listamaður Reykjavíkur hefur
Gunnar ekki búið í höfuðborginni
alla sína tíð.
„Ég bjó í átta ár á Hólmavík, mín
fyrstu ár. Svo var ég í fjórtán ár í
Keflavík en ég hef búið í rúmlega
fjörutíu ár í Reykjavík. Ég flutti frá
Keflavík árið 1967 þannig ég myndi
nú segja að ég væri orðinn Reyk-
víkingur,“ segir Gunnar, sem
kveðst þykja aftar vænt um borg-
ina.
„Það kom nokkuð fljótt. Ég flutti
nú til Reykjavíkur á sínum tíma
vegna þess að Hljómarnir voru að
spila svo mikið í Reykjavík og mað-
ur var orðinn leiður á því að keyra
Keflavíkurveginn, hann var ekki
einu sinni malbikaður á þeim tíma,“
segir hann. Ekki er nóg með að
Gunnar hafi komið að stofnun
Hljóma heldur var hann einnig einn
forsprakka Trúbrots og Ðe lónlí blú
bojs sem og Guitar Islancio. Á ár-
unum 1982 til 2002 var Gunnar síð-
an hljómsveitarstjóri á Broadway
og setti þar upp fjölmargar vinsæl-
ar sýningar ásamt Agli Eðvarðs-
syni.
Óperuverk í bígerð
Á síðari árum hefur Gunnar aðal-
lega verið að braska í tónsmíðum,
en nýjasta verk hans, óperan Ragn-
heiður, hefur heillað þjóðina og
vann í fyrradag til þriggja Grímu-
verðlauna, meðal annars fyrir sýn-
ingu ársins og tónlist. Gunnar
kveðst ekki vita hvort hafi vegið
þyngra við útnefningu borgarlista-
manns Reykjavíkur, ævistarfið eða
Ragnheiður, en hann segir óperuna
í það minnsta ekki hafa skemmt
fyrir.
„Óperan kom nú bara eiginlega
til vegna þess að ég hef verið í
þessum geira svo lengi og mig lang-
aði til að læra meira og prófa eitt-
hvað nýtt. Ég fór líka svolítið út í
þetta til að ögra sjálfum mér. Ég
vildi bara hafa gaman af og víkka
sjóndeildarhringinn,“ segir Gunnar
og kveðst hafa lært geysilega mikið
á því að setja upp óperuna.
„Nú langar mig bara að setja upp
aðra því ég lærði svo mikið af þess-
ari. Ég er því byrjaður að smíða
nýja óperu en það er ekki komin
nein dagsetning á hana, menn eru
bara að lesa sér til. Það verður
mögulega farið aftur í gamlar ís-
lenskar sögur eins og var gert með
Ragnheiði en það er samt ekkert
víst. Hver veit nema þetta verði nú-
tímasaga, en það sem skiptir að-
allega máli er að sagan sé góð. Hún
þarf auk þess að falla inn í þetta
óperuform,“ segir hann að lokum.
Þess má geta að Ragnheiður verður
sýnd aftur eftir sumarfrí nú í haust
og verður auk þess tekin upp í
október í Norðurljósum í samstarfi
við Sinfóníuhljómsveit Íslands.
„Byrjaður að
smíða nýja óperu“
 Gunnar Þórðarson borgarlistamaður Reykjavíkur í ár
Morgunblaðið/Eggert
Hátíðleg athöfn Gunnar Þórðarson tekur hér við viðurkenningu úr hendi Dags borgarstjóra í Höfða í gær.
Ljósmynd/Kristinn Svanur Jónsson
Lofsöngur Ópera Gunnars Þórðarsonar og Friðriks Erlingssonar, Ragn-
heiður, hlaut mikið lof gagnrýnenda. Hér sést Gunnar með Friðriki og Þóru
Einarsdóttur að lokinni frumsýningu í Eldborg 1. mars síðastliðinn.