Hafnarfjörður - Garðabær - 21.03.2014, Blaðsíða 14
Fullkomið
heitt súkkulaði
Hitið að suðu, setjið í bolla,
skreytið með þeyttum rjóma
og njótið.
3100 g Lindu suðusúkkulaði
1 l mjólk
1
2
PIPA
R
\
TBW
A
• SÍA
• 123408
– ómótstæðilega gott
14 21. mars 2014
Oddviti Pírata vill opna stjórnsýsluna upp á gátt og opna bókhaldið:
Brýnt að tryggja aukið þátttökulýðræði
Brynjar Guðnason er oddviti Pírata í bæjarstjórnarkosningunum í vor,
en Píratar völdu lista sinn í prófkjöri á netinu. Brynjar er 25 ára gamall,
einhleypur og uppalinn í Hafnarfirðinum. Hann hefur haft afskipti af pólitík
í gegnum Samfylkinguna en en átti ekki samleið með henni. Hann segir
Pírata leggja áherslu á opið bókhald og þátttökulýðræði – þátttökufjár-
lagagerð ekki síður – en hann nefnir einnig að taka verði á fjármálum
bæjarfélagsins og hvernig þróa megi grunnskólana til að mæta breyttum
kröfum á vinnumarkaði.
„Ég hef alltaf haft skoðanir og fylgst
með stjórnmálum, var skráður í Sam-
fylkinguna sem unglingur en áttaði mig
fljótlega á því að ég ætti ekki samleið
með þeim og sagði mig úr flokknum
áður en ég fékk kosningarétt. Frá þeim
tíma og þangað til ég skráði mig í
Pírata var ég virkur í ópólitískum fé-
lagsstörfum,“ segir Brynjar Guðnason
í samtali við blaðið.
Hönnuður og björgunar-
sveitarmaður
Brynjar starfar hjá eigin fyrirtæki, Góða
dátanum, sem hann rekur í félagi við
annan, en starf hans er einkum fólgið í
hönnun og umbroti. Hann hefur meðal
annars starfað hjá Fréttablaðinu, íslensku
auglýsingastofunni og fyrir vefritið
Kjarnann. Brynjar er útivistarmaður,
fjallgöngukappi, og starfar með björg-
unarsveit. Auk þess er hann áhugamaður
um heimspeki, fjölmiðla, hönnun og
tækni. Hann segist ekki eiga sér beinar
fyrirmyndir, en reyni að tileinka sér hið
góða í fari annarra. En nokkur listaverk
hafi haft mikil áhrif á lífsskoðanir sínar
og nefnir hann bæði bókina um Góða
dátann Svejk og kvikmyndina Dr.
Strangelove (or How I learned to stop
worrying and love the bomb).
Upplýstar ákvarðanir
Brynjar lýsir grundvallarhugsjónum
sínum þannig að hann vilji taka
ákvörðun og mynda stefnu í ljósi þeirra
gagna og þekkingar sem hafi verið aflað
í hverju máli. Þetta sé raunar grunnstefið
í stefnu Pírata. „Ég tengi í rauninni vel
við alla grunnstefnuna, sem er ástæðan
fyrir því að ég skráði mig í Pírata.“
Fjármálin, bókhaldið,
lýðræðið
- Hver eru að þínu mati þrjú brýnustu
málin fyrir bæjarstjórn Hafnarfjarðar
að beita sér í til skemmri tíma?
„Það brýnasta er að ná betri tökum á
fjármálum, opna bókhaldið fyrir bæjar-
búum og tryggja aukið þátttökulýðræði.“
Til lengri tíma telur Brynjar það til
mikilvægustu markmiðanna að „opna
stjórnsýsluna upp á gátt og gera hana
gegnsæja og aðgengilegri bæjarbúum
– þar á ég við t.a.m. opið bókhald, að
gera íbúum auðveldara að fylgjast með
og hafa áhrif á mál sem tekin eru fyrir í
nefndum og ráðum og að bærinn leggi
áherslu á að birta öll gögn á opnum
sniðum. Opið bókhald veitir mikið og
nauðsynlegt aðhald á meðferð bæði
kjörinna fulltrúa og embættismanna
með peningana okkar,“ segir Brynjar.
„Ágætt fyrsta skref“
Þess má geta að bæjaryfirvöld byrjuðu
nýlega að birta nákvæmar upplýsingar
um fjárreiður bæjarins, þar á meðal eru
framlög til einstakra skóla og leikskóla,
til íþróttafélaga og félagasamtaka, kostn-
aður við mokstur og hirðingu, auk þess
sem greint er frá kostnaði við stjórnsýslu
bæjarins, auk skatttekna. Rauntölur eru
birtar með samanburði við fjárhagsá-
ætlun bæjarins; bæði fyrir hvern mánuð
og einnig miðað við árið.
„Þetta er ágætt fyrsta skref en við
viljum að hver færsla í bókhaldinu sé birt
á netinu, fyrir utan þær sem er eðlilegt
að birta ekki sem stakar færslur vegna
persónuverndarsjónarmiða, og það sé
hægt að leita í þeim á þægilegan hátt,“
segir Brynjar.
Þátttökufjárlagagerð
Hann nefnir einnig að fjármál bæjarins
séu líka langtímaverkefni. „Og svo held
ég að það sé mikilvægt að skoða hvernig
við þróum grunnskólana til að mæta
breyttum kröfum á vinnumarkaði, það
er mjög jákvætt skref að Áslandsskóli
taki nú þátt í verkefninu Forritarar fram-
tíðarinnar. Svo þarf að skoða hvernig
við getum innleitt þátttökufjárlagagerð
– sem hefur gefið mjög góða raun í
borgum eins og Porto Alegre í Brasilíu.“
Kjörnir fulltrúar
sitji ekki of lengi
Um gengi Pírata í Hafnarfirði í bæj-
arstjórnarkosningunum í vor, segist
Brynjar vera hóflega bjartsýnn.
- Gæti það haft áhrif á gengi Pírata,
sem hafa mælst með 9,5 prósenta fylgi
í Hafnarfirði í könnun sem Félagsvís-
indastofnun gerði fyrir Morgunblaðið
og birt var í byrjun mánaðarins, að þið
eruð ný í bæjarpólitíkinni?
„Ég geri mér ekki grein fyrir því
hversu mikil áhrif það hefur að við séum
ný í bæjarpólitíkinni en eins og við sáum
með Besta flokkinn í Reykjavík þá getur
verið styrkur að vera nýr. Mér finnst já-
kvætt ef að hér komast að nýir bæjar-
fulltrúar, mín skoðun er að við ættum
að takmarka verulega þá lengd sem hægt
er að sitja í kjörnum embættum, hvort
sem það er í sveitarstjórn eða á Alþingi.“
Auki traust á Pírötum
Brynjar bætir því við að það skipti máli
að Píratar hafi verið kjörnir á Alþingi.
Það hafi hjálpað til við að auka traust
á Pírötum. „Það styður líka vel við
sveitarstjórnaframboðin að hafa full-
trúa á Alþingi, sbr. frumvarp Pírata um
breytingu á sveitarstjórnalögum sem
myndi gera einstökum sveitarfélögum
kleift að lækka það hlutfall íbúa sem
þarf til að krefjast atkvæðagreiðslu um
einstök mál.“
Spurður um hvort hann stefni á bæj-
arstjórastólinn, er svarið afdráttarlaust:
„Nei“.
-En myndu Píratar starfa með hverjum
sem er í meirihluta?
„Ef okkur byðist að fara í meirihluta-
samstarf þá væri ég auðvitað ekki einn
um að taka þá ákvörðun en mér finnst
mjög mikilvægt að opna bókhald bæj-
arins, ég held að það yrði erfitt að fara
í samstarf með flokki sem vildi það
ekki.“
Brynjar Guðnason
Brynjar efstur hjá Pírötum
Brynjar Guðnason varð efstur í próf-kjöri Pírata í Hafnarfirði. Tíu gáfu
kost á sér en 21 greiddi atkvæði. Í öðru
sæti lenti Hildur Björg Vilhjálmsdóttir,
Finnur Þ. Gunnþórsson í þriðja sæti og
Kristlind Viktoría Leifsdóttir í fjórða sæti.
Píratar hafa mælst með töluvert fylgi
enda þótt listi þeirra hafi ekki legið fyrir
fyrr en nú. Þannig var fylgið 9,5 prósent
í könnun sem birt var í byrjun mánað-
arins.
Garðabær:
Sjálfstæðismenn breyttu listanum
Framboðslista Sjálfstæðisflokksins Garðabæ var breytt í kjölfar mik-
illar óánægju með uppstillingu á listann.
Uppstillingarnefnd setti Gunnar Einars-
son, bæjarstjóra, í fyrsta sætið, en hann
ákvað, í kjölfar mikillar gagnrýni að gefa
kost á sér í áttunda sætið í staðinn. Hann
hefur lýst því yfir að hann verði áfram
oddviti listans og bæjarstjóraefni.
Röð annarra í efstu sætum listans er
svona: Áslaug Hulda Jónsdóttir, verður
í efsta sætinu, Sigríður Hulda Jónsdóttir
í öðru sæti. Þá Sigurður Guðmundsson,
Gunnar Valur Gíslason, Jóna Sæmunds-
dóttir, Almar Guðmundsson, og Sturla
Þorsteinsson í sjöunda sæti.
Sjálfstæðisflokkurinn í Garðabæ
mældist með tæplega 59 prósenta
fylgi í skoðanakönnun sem Félagsvís-
indastofnun HÍ gerði fyrir Morgunblaðið
í nóvember. Yrðu þetta niðurstöður
kosninganna fengi Sjálfstæðisflokkurinn
níu bæjarfulltrúa af ellefu, eða 80 prósent
bæjarfulltrúa að sögn Morgunblaðsins.
Þetta er í fyrsta sinn sem bæjarstjórn-
arkosningar fara fram í sameinuðu
sveitarfélagi Garðabæjar og Álftaness.
Sjö bæjarfulltrúar voru í hvoru sveitar-
félagi fyrir sameiningu, en nú verða
þeir 11.
Þreifingar hafa verið um sameigin-
legt framboð nokkurra hreyfinga undir
merkjum Bjartrar framtíðar, en fólk af
Á-lista á Álftanesi og M-lista fólksins
í Garðabæ mun vilja taka þátt í fram-
boðinu en óvíst er með Vinstri græn.
Samfylkingin hafði þegar síðast spurðist,
ekki vilja taka þátt í slíku framboði og
framsóknarmenn bjóða fram sér.
sveitarstjórnakosningar 2014
auglýsingasíminn er 578 1190
netfang: auglysingar@fotspor.is