Víkurfréttir - 31.05.2012, Blaðsíða 8

8 FIMMTUDAGURINN 31. MAí 2012 • VÍKURFRÉTTIR
Róbert Ragnarsson hefur verið bæjarstjóri Grindavíkur frá því um sumarið 2010. Hann gegndi starfi bæjar-
stjóra í Vogum árið 2006 þar til hann tók við stjórnar-
taumum í Grindavík en Róbert er með meistarapróf í stjór-
nmálafræði og hefur einnig starfað sem verkefnisstjóri í
Félagsmálaráðuneytinu þar sem hann meðal annars stýrði
átaki til eflingar sveitarstjórnarstigsins. Jafnframt var hann
um tíma stundakennari við stjórnmálafræðiskor Háskóla
Íslands, þar sem hann kenndi stjórnun og starfsumhverfi
sveitarfélaga. Róbert er kvæntur Valgerði Ágústsdóttur
og eiga þau saman þrjá syni. Róbert var svo ferðamála- og
markaðsfulltrúi Grindavíkurbæjar um aldamótin síðustu.
Víkurfréttir kíktu í heimsókn til Róberts á skrifstofu hans
í Grindavík og ýmis mál sem snerta sjávarútvegs- og ferða-
mannabæinn Grindavík voru þar rædd.
Nýlega var gerð úttekt á skólamálunum í Grindavík og síðan
þá hafa verið gerðar tvær umbótaráætlanir, annars vegar í
sérkennslu og svo almennt, en hvernig komu skólamálin út í
Grindavík?
„Það var beggja blands. Það voru atriði sem komu mjög illa
út, t.d. hvað varðar stjórnun og stefnumótun. Þar fengum við
í raun staðfestingu á því sem við töldum okkur vita. Síðan
Gunnlaugur Dan Ólafsson, sem hafði verið farsæll skólastjóri
hér í yfir 20 ár fór, þá dettur rosalega mikið niður af því sem
hann hafði verið að gera. Skólastjórinn sem fyllti í skarð hans
var einfaldlega ekki að valda verkefninu enda var hann látinn
fara í nóvember síðastliðnum,“ segir Róbert.
„Við fáum hins vegar mjög góða umsögn um aðbúnað og
menntun kennara, fjármagn til skólans er líka eins og best
verður á kosið.“ Róbert segir Grindavíkurskóla hafa verið
meðal bestu skóla Suðurnesja ásamt Heiðarskóla fyrir um 3-4
árum síðan en undanfarið hafi fatast flugið. „Stjórnun í skól-
anum var ekki nægilega markviss og í kjölfar af því hefur eðli
málsins samkvæmt ekki gengið eins vel,“ en Róbert vonast til
þess að leiðin liggi nú upp á við.
„Hér var engin skólaskifstofa áður en sveitarfélögin tóku við
skólunum og Grindvíkingar voru að kaupa ýmsa utanað-
komandi þjónustu. Undanfarin ár hefur þrýstingurinn á
aukna þjónustu vaxið alveg stórkostlega, bæði hér og annars
staðar og við erum því komin með okkar eigin skólaskrifstofu
þar sem nálgast má alla þjónustu. Við erum því að veita alveg
svakalega mikla þjónustu nú til dags.“
Að mati Róberts er rosaleg krafa um þjónustu og hann telur
sveitarfélögin hafa sinnt þeirri þjónustu mjög vel eftir að ríkið
sleppti hendinni af skólunum. „Skólarnir eru orðnir miklu
betur búnir og flottari en áður. Nú eru líka menntaðir kenn-
arar í öllum stöðum. Þetta kostar sitt og hjá Grindavíkurbæ
eru fræðslumálin 67% af skatttekjum bæjarins og voru á
tímabili yfir 70%. Árið 2009 voru svo íþrótta- og æskulýðs-
mál 25% á móti 70% í skólamálum. Þessir tveir málaflokkar
tóku hreinlega allar skatttekjur til sín og aðrir málaflokkar
voru fjármagnaðir með vaxtatekjum úr hitaveitusjóðnum.
Nú erum við að reyna að vinda ofan af þessu og koma hlut-
unum í eðlilegra ástand,“ segir Róbert og tekur það fram að
ef ekki náist betri árangur í samræmi við fjármagn sem er sett
í skólana þá verði að endurskoða málin.
Grindavík verður alltaf sjávarútvegspláss
Fyrirhugaðar eru stækkanir og breytingar á íþróttamann-
virkjum í bænum. Bæta á við rúmlega 400 fermetrum við
íþróttahúsið og gera um leið nýja búningsklefa. Einnig er á
teikniborðinu viðbygging við grunnskólann þar sem hýsa á
bókasafn og tónlistarskóla. Þá stendur til að gera nýjan sal
við íþróttahúsið sem rúmar um 200 manns en sá salur myndi
vera samkomusalur bæjarins og íþróttafélaganna. „Sá salur
ætti að leysa að mestu það hlutverk sem Festi hafði áður og
ráðgert er að útbúa íþróttasalinn þannig að hann geti hýst
stóra viðburði.“ Róbert segir ekki vera neinn ágreining um
hvort ráðast eigi í þessar framkvæmdir heldur einungis um
hvernig útfæra eigi hlutina. Markmið bæjarins sé að hafa
allar íþróttadeildir á sama stað og skapa þannig meiri stemn-
ingu, en fótboltinn vilji frekar hafa sína aðstöðu þar sem
áhorfendastúkan stendur. Einhverjir aðilar eru á því að ekki
eigi að ráðast í slíkar framkvæmdir á meðan ekki liggur ljóst
fyrir hvernig nýtt kvótafrumvarp sem liggur fyrir á Alþingi
hafi áhrif á Grindavík. „Það er áhætta í öllu og við vitum
ekki hvað gerist varðandi þessi frumvörp. Það er líka áhætta
fólgin í því ef að eitthvert sjávarútvegsfyrirtækjanna ákveður
að selja kvótann úr bænum. Ef við ætlum alltaf að bíða vegna
einhverrar óvissu þá verður okkur ekkert úr verki. Ég held að
Grindavík verði alltaf sjávarútvegspláss,“ segir Róbert. Hann
telur ekkert benda til þess að sjávarútvegsfyrirtæki færi sig
um set og hann segir þau vera ákaflega heimakær og styðji
vel við samfélagið. „Skerðingar eins og boðaðar eru í frum-
varpinu verða þess valdandi að leigja þarf kvótann til baka til
að halda sömu stöðu. Sá kostnaður, ásamt veiðigjöldum mun
örugglega hafa áhrif á rekstur þessara fyrirtækja, þau þyrftu
jafnvel að fækka starfsmönnum sem myndi hafa áhrif á okkar
útsvarsstofn. Það er vissulega áhætta en við munum þurfa
þessi mannvirki hvernig sem fer.“
Fjögur ár eru liðin síðan samkomuhús Grindvíkinga, Festi,
var síðast notað og segir Róbert vissulega vera mikinn söknuð
af húsinu. „Mannlífið hefur blómstrað þrátt fyrir það og þetta
hefur alveg gengið upp. Aðrir salir hér í bænum og við Bláa
lónið hafa reynst okkur vel og það hefur sem betur fer ekki
verið nein krísa.“ Hann segist vonast til þess að einhver kaupi
Festi og geri þar verslunar- og þjónusturými. „Við höfum
verið í viðræðum við aðila sem vilja breyta húsinu í gisti-
heimili og verslunarrými og vonandi gengur það eftir.“
Ferðaiðnaðurinn önnur stoð Grindvíkinga
Róbert var kennari í Grindavík á árunum 1996-7 og kom
síðan aftur til starfa sem ferðamálafulltrúi árið 1999 þá aðeins
23 að aldri. Þá var Bláa lónið að flytja sig í nýtt húsnæði sem
var upphafið að þeim mikla vexti og árangri sem þar hefur
náðst að sögn Róberts. „Ferðaþjónustuaðilar í Grindavík eru
þá að átta sig á því að þetta sé alvöru markaður og byrja að
skipuleggja sig sem atvinnumenn frekar en áhugamenn. Ég
kem svo aftur til Grindavíkur 12 árum síðar og þá eru öll
viðmið orðin mikið hærri og menn eru búnir að læra betur á
þjónustuna og markaðinn. Hér koma fyrirtæki eins og Salt-
húsið sem er virkilega gott þegar kemur að sjávarréttum og
kaffhús eins og Bryggjan sem hefur ákveðna sérstöðu sem
íslenskt sjóarakaffihús.“ Róbert segir fyrirtæki eins og Fjór-
hjólaferðir einnig vera til fyrirmyndar enda séu þar starfandi
björgunarsveitarstrákar sem hafi öll öryggisatriði á hreinu og
ekkert sé þar í ólagi. Fagmennska í ferðaþjónustu sé mikil í
dag.
„Bláa lónið er heimsklassa ferðaþjónustufyrirtæki og það
hefur smitað út frá sér inn í bæinn okkar. Ég er á því að
ferðaþjónustan sé að verða okkar önnur stoð í atvinnulífinu
í Grindavík. Þetta er orðinn alvöru heilsárs iðnaður og ég á
von á því að þetta eigi eftir að aukast með tilkomu nýs hótels
við Bláa lónið. Afþreying hérna á svæðinu á eftir að taka
mikinn kipp þegar það hótel rís,“ segir bæjarstjórinn.
Það koma rúmlega 500 þúsund gestir á ári í Bláa lónið
og þaðan eru aðeins fjórir kílómetrar inn í Grindavík. Til
stendur að leggja göngu- og hjólastíga og merkingar fyrir um
70 milljónir króna frá Lóninu til Grindavíkur og um hafnar-
svæðið. Róbert segir að hér sé erlent ferðafólk allan ársins
hring, ferðamannatíminn svokallaði sé allt árið um kring en
ekki bundinn við ákveðin tímabil. Segir hann einnig umferð
hafa aukist með opnun Suðurstrandarvegar. „Við höfum svo
sem engar handbærar mælingar enda hafa engar talningar
verið gerðar á veginum. Þjónustuaðilar í Grindavík segjast
þó taka eftir því að fleira fólk frá Suðurlandi leggi leið sína
hingað, sem er afar jákvætt.“
Skemmtilegur bæjarbragur vegna Sjóarans síkáta
,,Sjómannadagurinn hefur lengi verið í hávegum hafður í
Grindavík og í tengslum við það hefur bæjarhátíðin okkar
vaxið og yfirleitt farið vel fram. Við höfum stílað inn á fjöl-
skyldufólk og þetta hefur gengið mjög vel.“ Róbert segir há-
tíðina skipta miklu máli fyrir bæjarbraginn þar sem keppni
milli hverfa sé mjög skemmtileg. „Það er ekki bara þannig
að við séum að fá hingað fjölda gesta heldur er þetta hátíð
heimamanna og fólk er að koma til Grindavíkur til þess
að taka þátt í hátíðinni með okkur, við erum ekki bara að
skemmta gestum.“
Róbert telur að Grindavík geti vel vaxið og dafnað sem bær í
komandi framtíð en aðalskipulag gerir ráð fyrir 6.000 íbúum
árið 2030 en í dag eru íbúar um 2800. Róbert segir þó ekki
hollt að vaxa of hratt og telur hann 3% aukningu íbúa á ári
vera yfirdrifið nóg.
Róbert er fæddur og uppalinn í Keflavík en hann hefur þrisvar
verið búsettur í Grindavík. „Mér finnst ekkert skrítið að vera
Keflvíkingur hérna í Grindavík. Fólk er svona stundum að
skjóta á mig að ég sé úr Keflavík en þessu gamli rígur er ekki
til lengur, þetta er bara á skemmtilegu nótunum.“ Róbert
segir það aðallega vera skrítið þegar að Grindvíkingar og
Keflvíkingar mætast á fótboltavellinum, þá á hann stundum
erfitt með sig. „Það hjálpar að ég spilaði fótbolta með Keflavík
þegar búningarnir voru gulir og bláir, þannig að ég er ekki
óvanur að styðja þá liti,“ segir Róbert léttur í bragði en synir
hans spila að sjálfsögðu með Grindavík. „Ég held að það
sé ekkert öðruvísi fyrir íbúa hér að fá Keflvíkinging sem
bæjarstjóra frekar en Akureyring eða Vestfirðing. Ég held að
fólk hafi bara gaman af því að geta strítt Keflvíkingnum, sér-
staklega í vetur þegar Grindvíkingum gekk betur í körfubolt-
anum, þá fékk maður alveg að heyra það,“ segir bæjarstjórinn
að lokum.
›› Róbert Ragnarsson, bæjarstjóri í Grindavík, í viðtali við Víkurfréttir:
Verður alltaf sjávarútvegsbær
„Bláa lónið er heimsklassa ferðaþjónustu-
fyrirtæki og það hefur smitað út frá sér
inn í bæinn okkar. Ég er á því að ferða-
þjónustan sé að verða okkar önnur stoð í
atvinnulífinu í Grindavík. Þetta er orðinn
alvöru heilsárs iðnaður og ég á von á því
að þetta eigi eftir að aukast með tilkomu
nýs hótels við Bláa lónið. Afþreying hérna
á svæðinu á eftir að taka mikinn kipp
þegar það hótel rís,“ segir bæjarstjórinn.