Dagblaðið Vísir - DV - 25.07.2012, Blaðsíða 18

18 Umræða 25. júlí 2012 Miðvikudagur <18 Umræða
Vinsæl
ummæli
við fréttir DV.is í vikunni
„Skiptir engu máli
hvort þú sért gullfal-
leg - feit - ljót- sæt
- yndisleg - ógeðsleg eða
hvaðeina... Karlmaður hefur
aldrei undir neinum kringum-
stæðum leyfi til þess að
labba upp að stelpum/kon-
um og þukla né káfa og grípa
í þær án þeirra samþykkis.“
Ívar Þórir Daníelsson um pistil
Bylgju Guðnýjardóttur þar sem
hún lýsir ágangi karlmanna á
skemmtistöðum.
„Kappinn tók nú
vel meira en eina
æfingu í Mjölni. Þeir
voru við æfingar í Mjölni í
síðustu viku og Crowe er í
hörkuformi.“
Haraldur Dean Nelson í
athugasemd um frétt þess efnis
að stórleikarinn Russell Crowe
hafi tekið æfingu hjá Mjölni.
„Frábær pistill og
hvert orð satt og rétt.
Ég er Norðfirðingur
og hef alltaf beðið spenntur
eftir hverri hátíð og svo er um
ansi marga íbúa hér. Yndis-
legra og kurteisara fólki en
öllum rokkurunum hef ég ekki
kynnst, keyrði nokkra til og
frá tjaldsvæðinu og krakkarnir
ekkert nema þakklætið og
elskulegheitin. Þetta er frábær
hátíð og þeim sem að henni
standa, tónlistarmönnum
og gestum til mikils sóma.
Við skulum ekkert æsa okkur
yfir því þó einhver tískudúlla
í bómullarumbúðum gráti
svolítið. Hún skrifar vonandi
næsta pistil eftir að hún hugs-
ar, ekki áður.“
Árni Þorsteinsson í
athugasemd við pistil
sem Franz Gunnarsson
skrifaði á DV.is. Þar gagnrýndi hann
ummæli Heiðu Þórðar á vefsíðunni
Spegill.is um hátíðina Eistnaflug.
„Fór í teiti en var eltur
af Birni Bjarnasyni.“
Sævar Einarsson við frétt
um sænskan karlmann sem
lenti í klóm bjarnar. Sá var á
leið í teiti þegar björn kom
aðvífandi og gerði sig líklegan til að
ráðast á hann. Manninum tókst að klifra
upp á skúr og hrekja björninn á brott.
„Hvet þá sem eiga
eitthvað með þetta
mál að gera - að
leysa úr því eins fljótt og vel
og kostur er - með velferð og
hamingju og vilja Magnúsar
og Úlfhildar að leiðarljósi!“
Leifi Vest í athugasemd við frétt
um parið Úlfhildi Stefánsdóttur,
heimilismann á Sólheimum, og
unnusta hennar, Magnús Helga Vigfússon.
„Auðvitað á hann að
rukka, þetta er gert
á flest öllum stöðum
í Evrópu og þykir sjálfsagt.
Kostnaður við sápu, klósett-
pappír og þurrkur er alltaf til
staðar.“
Ásta Hafberg um frétt þess
efnis að Kristberg Jónsson,
eigandi Baulu, íhugi að taka upp
það sem hann kallar klósettgjald fyrir
ferðamenn sem koma í verslun hans.
12
55
8
28
29
Guðjón Sigurðsson: Hverjir
eru helstu rekstrarkostnaðar­
liðir ykkar? Hvað hefur aðal í
laun? Gott að fá þig á Klakann.
 Kristinn Hrafnsson: Takk, Guðjón.
Rekstrarliðir allir eru nýbirtir í
uppgjöri frá Wau Holland­sjóðnum
sem ferlað hefur mest af okkar
styrktarfé. Þar er hægt að nálgast
allar upplýsingar um helstu kostn­
aðarþætti. Þetta er tæknikostnað­
ur, lögfræðikostnaður. laun o.fl.
Bjarki Hilmarsson: Sæll.
Urðuð þið vör við viðbrögð í
fjölmiðlum utan Íslands vegna
dóms héraðsdóms um daginn?
 Kristinn Hrafnsson: Sæll. Já,
viðbrögðin voru gríðarlega mikil
víða um heim eins og sést ef þú
leitar eftir fréttum á netinu. Fyrir
mig persónulega var sérstaklega
ánægjulegt að þessi niðurstaða
kom frá minni heimabyggð. Ég vona
að þetta verði tímamótadómur
og að Valitor hunskist til að una
dómnum enda engin efnisrök til að
áfrýja.
Aðalsteinn Kjartansson: Í
hverju felst starf þitt fyrir
WikiLeaks? Er það þitt
aðalstarf?
 Kristinn Hrafnsson: Þetta er mitt
aðalstarf og er ansi fjölbreytt enda
fáir starfsmenn hjá samtökunum
núna. Ég hef m.a. séð um að koma
á samstarfi við fjölmiðla víða um
heim, sinnt því að vera tengiliður
við alþjóðlegt lögfræðingateymi,
svara spurningum fjölmiðla og taka
þátt í umræðum og ákvarðanatöku
í innsta kjarna.
Ragnheiður Ragnarsdóttir:
Hvernig styðjið þið við bakið á
Bradley Manning og gætuð þið
gert meira/betur?
 Kristinn Hrafnsson: Við vildum í
upphafi greiða hluta af málsvörn
hans en gátum ekki lagatæknilega
notað okkar styrktarfé sem fór í
gegnum velgjörðasjóð í Þýskalandi.
Ég kom því samt til leiðar að við
gátum stutt hana fjárhagslega. Við
höfum einnig stutt hann í gegnum
Twitter/Facebook en þar höfum við
1,5–2 millj. fylgismenn. Höfum bent
á það í ræðu og riti að meðferðin á
honum er skelfileg. Auðvitað er okk­
ur nokkur vandi á höndum þar sem
hann er meintur heimildarmaður
WikiLeaks og ef rétt reynist er hann
hetja.
Kolbeinn Kristinsson: Sæll,
Kristinn. Er eitthvað sem heitir
að ganga of langt í birtingu
trúnaðargagna og hvar liggja mörkin?
Telur þú að þið hafið einhvern tímann
gengið of langt?
 Kristinn Hrafnsson: Auðvitað
eru einhver mörk en það er erfitt
að skilgreina mörkin án tilvísana
í dæmi. Ég held að á þeim tveim
árum sem ég hef verið í starfi hjá
WL hafi ekki verið of langt gengið.
Kaupþingsskjölin 2009 koma upp
í hugann hér. Þetta voru einhver
mikilsverðustu gögn sem birtust
í kjölfar bankahrunsins. Held að
enginn efist um það í dag.
Sigurður Sigurðsson: Telur þú
að leyniþjónustur BNA eigi
greiðan aðgang að
tölvu póstum fólks hjá bandarískum/
alþjóðlegum stórfyrirtækjum s.s.
Google, Microsoft og Hotmail?
 Kristinn Hrafnsson: Ég held að
það sé nokkuð klárt. Þegar beðið
var um upplýsingar frá Twitter
fengum við aðeins vitneskju um
það vegna þess að Twitter krafðist
þess fyrir dómi að upplýsa kúnna
sína um beiðnina og unnu. Ég tel
nokkuð öruggt að farið hafi verið
fram á sambærileg gögn frá Google,
Facebook og fleirum án þess að því
hafi verið mótmælt.
Atli Fanndal: WikiLeaks er
gagnrýnt fyrir að aflétta
nafnleynd heimildamanna
bandarískrar utanríkisþjónustu. Hér á
landi mátti til að mynda sjá
viðmælendur sendiráðs BNA í gögnum
sem láku. Hvernig bregstu við?
 Kristinn Hrafnsson: Hér var
upplýst að starfsmenn í íslenskri
stjórnsýslu voru leynilegir heim­
ildarmenn sendiráðs BNA. Sé ekkert
að því að upplýsa það enda hlýtur
það að teljast ámælisvert.
Ragnar Eiríksson: Sæll,
Kristinn, hvers vegna birtið þið
ekki meira af íslenskum
bankaskjölum og tölvupóstum
bankamanna og stjórnmálamanna frá
Íslandi?
 Kristinn Hrafnsson: Það kemur
ef til vill að því að við getum birt
slík gögn. Núna erum við ekki með
gagnagáttina opna og geta okkar
til að starfa hefur ekki verið eins og
við vildum vegna árása á okkur.
Dísa Skvísa: Sæll, hefur þú
fengið alvarlegar hótanir
jafnvel morðhótanir í þínu
starfi hjá WikiLeaks sem hafa hrætt
þig? Ef svo er frá hverjum þá? B.t.w. þú
ert töffari :)
 Kristinn Hrafnsson: Veit ekki með
töffaratitilinn :­) Nei, ég hef ekki
fengið morðhótanir, ekki nema
þessar óbeinu sem berast frá
mönnum í fjölmiðlum í BNA. Þar
hafi margir viljað afgreiða WL eins
og al­Kaída.
Ragnar Pálsson: Telur þú það
vera löglegt að brjótast inn í
tölvur manna og fyrirtækja og
birta upplýsingar þaðan á netinu?
 Kristinn Hrafnsson: WL hefur ekki
brotist inn í tölvur manna og fyrir­
tækja. Fullyrt hefur verið að WL hafi
birt gögn sem séu fengin með þeim
hætti. Það er í raun ekki óeðlilegt
að blaðamenn og fjölmiðlar birti
slík gögn. Íslenskir dómstólar og
fjölmargir erlendir hafa úrskurðað
um slíkan rétt ef upplýsingarnar
varða almannahagsmuni.
Ásta Sigrún Magnúsdóttir:
Hvernig vegið þið og metið
hvað það er sem þið birtið? Oft
á tíðum eru gögnin í svo miklu magni að
ekki er hægt að birta þau öll. Hver tekur
þá ákvörðun um það hvað á að birta?
 Kristinn Hrafnsson: Þetta er
rætt en karlinn í brúnni tekur loka­
ákvörðun, eins og tíðkast á öðrum
ritstjórnum. Matið er alltaf háð
gögnum hverju sinni og er svipað
ákvörðunum sem ritstjórnir þurfa
að kljást við daglega.
Ágúst Jóhannesson: Sæll.
Frábært starf sem þið vinnið.
Telur þú að stjórnvöld víðs
vegar um heiminn séu að njósna um
almenning, með hlerunum, skoða
tölvupósta og fylgjast með samtölum
fólks á samskiptavefjum?
 Kristinn Hrafnsson: Sæll, Ágúst.
Þau eru að gera það. Einkafyrir­
tæki á Vesturlöndum selja m.a.
alræðisríkjum búnað sem notaður
er til njósna. Við upplýstum þetta
í desember í s.k. SpyFiles verkefni.
Skoðaðu það.
Svala Jónsdóttir: Telur þú að
persónuleg dómsmál Julians
Assange, stofnanda
WikiLeaks, og beiðni hans um hæli í
Ekvador hafi skaðað starfsemi
WikiLeaks? Gæti WikiLeaks starfað
áfram án hans?
 Kristinn Hrafnsson: JA hefur verið
kippt úr umferð áður og við haldið
okkar striki. Auðvitað hefur þetta
mál haft áhrif á starfsemi WL. Það
er óttast að framsal til BNA frá Sví­
þjóð vofi yfir og með nokkrum rétti.
Nýlega kom í ljós að málskjöl FBI
í WL rannsókn telja 42.000 síður.
Jafnframt að rannsóknin beinist að
6 einstaklingum, ónafngreindum.
Fólk hefur verið skikkað fyrir framan
leynilegan rannsóknardómstól
(Grand Jury) til að vitna. Þar er vitn­
að til njósnalöggjafarinnar frá 1917
í BNA en brot gegn þessari fornu
löggjöf varða allt að dauðarefsingu.
Ragnheiður Ragnarsdóttir:
Er lögfræðikostnaður Assange
borgaður með styrktarfé
WikiLeaks?
 Kristinn Hrafnsson: Nei, hann er
greiddur af sérstökum persónuleg­
um söfnunarsjóði og með hans eigin
peningum.
Sölvi Tryggvason: Hvernig
finnst þér staða íslenskra
fjölmiðla og starfsumhverfi
íslenskra blaðamanna vera árið 2012.
 Kristinn Hrafnsson: Þetta er nú
eiginlega kaffibollaspjall, Sölvi :­)
en í stuttu máli er starfsumhverfið
ekki nógu gott. Það er svo margt
sem spilar inn í að það er erfitt að
taka á þessu í stuttu svari. Get
þó sagt að ég hef ferðast víða og
finnst ég helst finna samsvörun við
fjölmiðlaumhverfi í Suður­Ameríku
eða Austur­Evrópu.
Óskar Páll Elfarsson: Nú
verður seint efast um
tilganginn og ástæðurnar sem
drífa ykkur áfram, en hvað er það fyrst
og fremst sem þig dreymir um að áorka í
gegnum WikiLeaks? Eitthvert
draumamarkmið eða hugsjón?
 Kristinn Hrafnsson: Ég valdi
blaðamennsku sem starf af þeirri
hugsjón að það væri nauðsynlegt
til að viðhalda sæmilegri hollustu í
siðuðu samfélagi. Ég er að gera það
sama og ég hef alltaf gert; moka
skurðinn. Ég er raunsær en vona að
ég geti hnikað hlutum eitthvað og
allavega sagt börnunum mínum
seinna að karlinn hafi a.m.k. reynt.
Páll Hilmarsson: Ef WL óttast
framsal JA frá Svíþjóð, á það
sama ekki við um Bretland?
Bretar framselja fólk til USA, eins og t.d.
mál Richard O‘Dwyer sýnir.
 Kristinn Hrafnsson: Þetta er flókið
lagatæknilegt mál. Lögmenn segja
mér að ef USA fari fram á framsal
frá UK fari sú krafa aftur fyrir
sænsku kröfuna eða a.m.k. yrðu
stjórnvöld í Bretlandi sett í erfiða
valþröng.
Hildur Lilliendahl
Viggósdóttir: Sæll, Kristinn.
Geturðu staðfest það sem
kemur fram á http://cryptome.
org/2012/06/sigurdur­thordarson.htm
að q í bókinni We Are Anonymous sé
hinn tvítugi Sigurður Ingi Þórðarson?
 Kristinn Hrafnsson: Sæl, Hildur.
Hef ekki farið yfir þetta og get ekki
tjáð mig um þessi skrif sem þú vísar
til.
Hjálmar Bogi: Sæll, Kristinn,
þakka þér fyrir gott starf og
málefnalegt. Ein spurning; eru
tengsl milli WikiLeaks og The Zeitgeist
Movement?
 Kristinn Hrafnsson: Nei, það eru
engin tengsl þar. Heldur ekki við CIA
eða Mossad (höfum verið sakaðir
um það). Hef heldur aldrei verið í
sambandi við Anonymous­hreyf­
inguna – ef hún er til sem hreyfing.
Baldur Guðmundsson: Veistu
til þess að reynt hafi verið að
bera á starfsmenn WL fé; reynt
að múta þeim beint eða óbeint með
einhvers konar gylliboðum í því skyni að
gögn birtist ekki?
 Kristinn Hrafnsson: Nei, veit ekki
um nein slík dæmi. Það hefur þó
verið reynt að nálgast fólk með
tengingar við WL til að fá það til
þess að ljóstra upp um innri mál og
grafa undan samtökunum.
Ísak Hinriksson: Hefur þú
hugsað um að byrja aftur með
Kompás?
 Kristinn Hrafnsson: Við teymið
sem stóðum að Kompási á sínum
tíma reyndum að fá nafnið keypt
eftir að hann var sleginn af. Það
var ekki möguleiki svo hann verður
væntanlega ekki endurlífgaður með
gamla teyminu a.m.k. Þetta var
einn sá besti tími sem ég hef átt í
blaðamennsku enda starfaði ég þar
með einvalaliði.
Sölvi Tryggvason: En af
hverju varstu rekinn frá RÚV
þrátt fyrir að vera augljóslega
einn albesti fréttamaður Íslands?
 Kristinn Hrafnsson: Tæknilega
var það svo að tímabundinn
samningur við mig var ekki endur­
nýjaður. Það var ljóst eftir að RÚV
varð samstarfsaðli WL við birtingu
þyrlumyndbandsins frá Bagdad í
apríl 2010 að það fór um marga á
RÚV. Ég vildi halda þessu áfram
en líklegast þótti þetta of stór og
hættulegur biti fyrir litla RÚV. Ég
taldi þetta vera til álitsauka fyrir
RÚV. Hefðu menn haldið öðruvísi á
spöðunum sumarið 2010 hefðu t.d.
Afganistanskjölin verið birt af New
York Times, Der Spiegel, Guardian …
og RÚV. Sumum hefði þótt það töff.
Pétur Gíslason: Með hvaða
liði heldurðu í enska
boltanum?
 Kristinn Hrafnsson: Sonur minn 12
ára heldur með Arsenal og þar með
verð ég að gera það líka (hann er
líka Valsari en ég var í skóla í hverfi
Fram). Hef farið á Emirates­völlinn
en fylgist annars ekki mikið með
enska.
Morten Lange: Samstarfið við
virta fjölmiðla hefur gefið
ykkur vægi, trúverðugleika og
hjálpað með að greina og melta.
Hvernig er staðan varðandi það
samstarf?
 Kristinn Hrafnsson: Við höfum
komið á samstarfi við um 100
fjölmiðla víða um heim. Það
hefur að mestu gengið afar vel og
er viðhaldið. Nokkur dæmi eru um
að súrnað hafi yfir samstarfi við ein­
staka miðla og auðvitað verður það
meira áberandi en hinir jákvæðu
þættir.
Erlingur Þorsteinsson: Hefur
þú skoðað með að fá íslenskan
ríkisborgararétt fyrir Assange,
hefur hann sýnt því áhuga?
 Kristinn Hrafnsson: Það hefur
komið til tals enda er hann æfur yfir
þeim takmarkaða stuðningi sem
hann hefur fengið frá Gillard­stjórn­
inni í Ástralíu. Ég hef hins vegar ekki
skoðað það af alvöru.
Thorros Loftski: Í framsögu á
málþingi í HÍ fyrir þó nokkru
fjallaðirðu um ,,Cable Leaks“ er
þið komust yfir skeytasendingar
bandaríska sendiráðsins í Reykjavík til
Washington. Þar kom fram að USA stýrir
,,stríðinu gegn vissum vímuefnum”
hérlendis eins og víða. En það sem meira
var að Stefán Eiríksson var merktur sem
sérstakur trúnaðarmaður/agent USA á
Íslandi. Hvar er skjölin um Stefán að
finna?
 Kristinn Hrafnsson: Við köllum
þetta Cablegate. Veit ekki hvað þú
ert að vísa til með vímuefnin. Það
er rétt að Stefán var skilgreindur
mikilvægur heimildarmaður sendi­
ráðsins þegar hann var starfsmaður
dómsmálaráðuneytisins. Mig minnir
að hann hafi verið auðkenndur með
,,strictly protect“ eða því að hans
auðkenni ætti að vernda. Öll sendi­
ráðsskjölin eru á netinu. Þægilegt
t.d. að leita á cablegatesearch.net.
Haukur Herbertsson: Hvernig
eru upplýsingar sem berast
WikiLeaks sannreyndar?
 Kristinn Hrafnsson: Það fer eftir
eðli upplýsinganna en við höfum
á okkar snærum sérfræðinga á
ýmsum sviðum. Í raun er þetta
svipað og í starfi annarra fjölmiðla.
Frá stofnun 2006 hefur WL ekki birt
gögn sem nokkur hefur efast um
að væru ekta. Það er býsna góður
árangur, sérstaklega þegar haft
er í huga að þetta er ein leið sem
andstæðingar okkar hafa metið
til ófrægingar. Það kemur fram í
skjölum sem lekið hefur verið til
okkar og við birt.
Erlingur Þorsteinsson:
Varðandi Bradley Manning og
hans uppljóstranir, hann hefur
sýnt fram á blekkingar bandarískra
stjórnvalda, með aðstoð WL. Fjölmargir
í USA eru sammála, telur þú hann eiga
möguleika á náðun?
 Kristinn Hrafnsson: Meðferðin á
BM er smánarblettur á Obama­
stjórninni. Ég vona að það komi að
því að þjóðin sjái að sér og vendi
stefnu sinni í átt til markmiða
sem landsfeður BNA settu á blað.
Þá á hann möguleika á þeirri
virðingu sem hann á skilið, ef hann
er heimildarmaðurinn, sem einn
mikilvægasti uppljóstrari sögunnar.
Ásta Sigrún Magnúsdóttir:
Ertu femínisti?
 Kristinn Hrafnsson: Ég er
jafnréttissinni.
Dagur Thomas: Hvenær mun
WikiLeaks deila UFO­skjölun­
um sem þeir sögðust hafa
undir höndum fyrir ári?
 Kristinn Hrafnsson: Veit ekki
alveg hvaða skjala þú ert að vísa
til. Ég hef sjálfur meiri áhyggjur af
hættum okkar heims en frá öðrum
hnöttum.
Þorvaldur Björnsson:
Hvenær ætlið þið að droppa
stóru bombunni,
„tryggingunni“ ykkar svokölluðu?
 Kristinn Hrafnsson: Saga þessarar
,,bombu“ verður að skoða í ljósi
sögunnar og ofsókna. Annars finnst
mér við hafa verið nokkuð duglegir í
bombunum s.l. 2 ár.
Helgi Björn: Ertu ánægður
með uppgjörið á hruninu á
Íslandi og hafa blaðamenn
staðið sig í stykkinu að rýna í mál eins og
Sparisjóð Keflavíkur, Vafningsmalid …?
 Kristinn Hrafnsson: Margir hafa
staðið sig afar vel en blaðamenn
mættu vera harðari og hafa til
þess meiri tíma og svigrúm. Það
hefur ekki nægjanlega mikið breyst.
T.d. er það forkastanlegt að PwC
skýrslan um SpKef sé varin með
bankaleynd. Það er tímaskekkja.
Kristinn Hrafnsson, talsmaður WikiLeaks, sat fyrir svörum á Beinni línu DV á mánudaginn.
„Ekki verið of langt gengið“
Nafn: Kristinn Hrafnsson
Aldur: 50
Starf: Talsmaður WikiLeaks
7