Húnavaka - 01.05.2010, Blaðsíða 178

H Ú N A V A K A 176
Björn og Margrét Eyrún. Á Skagaströnd ólst Búi upp við leik og störf og
hefðbundna skólagöngu.
Þegar Búi fæddist voru samgöngur ekki jafn góðar og nú er og svo var það
að Inga, móðir hans, komst ekki heim til Skagastrandar með frumburðinn fyrr
en nokkrum vikum eftir fæðinguna vegna ófærðar
milli Blönduóss og Skagastrandar.
Búi fór ungur í sveit og sagði sjálfur að hann
hefði verið sendur í sveit vegna þess hversu ódæll
hann var. Ekki gekk sveitavistin sem best fyrst í
stað en er honum var komið fyrir á Kagaðarhóli
í Torfalækjarhreppi tóku betri tímar við og var
hann í fimm sumur í góðu yfirlæti hjá þeim
heiðurs hjónum, Jóni Stefánssyni og Guðrúnu
Jóhannsdóttur. Búi fór til þeirra um leið og skóla
lauk að vori og kom heim aftur rétt tímanlega til
að mæta í skólann að hausti.
Sextán ára flutti Búi með foreldrum sínum til
Reyðarfjarðar þar sem hann kynntist fyrri konu
sinni, Guðbjörgu Karólínu Karlsdóttur. Gengu þau í hjónaband 25. júlí 1965.
Búi og Guðbjörg byggðu sér hús á Eskifirði og eignuðust tvo syni, Birgi Heiðar
og Karl Heimi. Birgir er kvæntur Ásu Karítas Arnmundsdóttur. Þau eiga tvo
syni, Búa Þór og Konráð Inga. Karl Heimir býr á Reyðarfirði.
Árið 2003 slitu Búi Þór og Guðbjörg samvistir. Seinni kona Búa heitir
Þorbjörg Bjarnadóttir, hún á tvö börn frá fyrra hjónabandi. Þau gengu í
hjónaband 17. ágúst 2008.
Búi fór 15 ára að vinna við sjávarútveg, ýmist á sjó eða í landi og á tímabili
var hann kokkur á bátum. Þegar hann hætti alveg á sjónum vann hann í land-
vinnslu sem verkstjóri í síld og síðar rækju.
Þegar faðir Búa Þórs lést árið 2005 flutti Búi í kjölfar þess til Skagastrandar
til að aðstoða aldraða móður sína. Sama ár stofnaði hann eigið fyrirtæki á
Skagaströnd, Dropa hf. Hann byggði upp gömlu lifrarbræðsluna sem faðir
hans átti, þar var útbúin góð aðstaða með frystiklefa og unnið við beitningu og
fleira.
Búi hafði ýmis áhugamál. Segja má að hann hafi haft áhuga á öllu sem leit
að sjávarútvegi og landbúnaði en hann var dýravinur og hafði gaman af
landbúnaðarstörfum. Meðan hann bjó á Eskifirði spilaði hann reglulega
bridge. Þá var hann áhugamaður um golf og enska boltann.
Síðustu æviárin glímdi Búi við veikindi sem drógu hann að lokum til dauða.
Útför hans var gerð frá Hólaneskirkju 24. september.
Sr. Fjölnir Ásbjörnsson.