Feykir - 10.07.2014, Blaðsíða 9

26/2014 Feykir 9

Heilir og sælir lesendur góðir.
Aldrei þessu vant er nú nauðsynlegt að gera
leiðréttingu á einni vísu er birtist í síðasta þætti.
Er það önnur vísan sem birtist þar eftir Rakel
Bessadóttur, svo litlu munar að í síðasta orði í
annarri hendingu kemur l í staðinn fyrir t og
breytir það ótrúlega miklu. Sama er í síðustu
hendingu, þar kemur í einu orði l í staðinn fyrir
b eins og flestir lesendur hafa trúlega tekið eftir.
Rétt er vísan svo:
Lífs á söndum leiðin skín
liggur önduð staka.
Óma löndin eru mín
undir böndum klaka.
Heyrum næst þessa játningu Ingólfs Ómars
Ármannssonar.
Ég hef gengið grýtta slóð
gegnum slarkið flotið.
Drukkið stíft og faðmað fljóð
freistinganna notið.
Ýmsar hliðar eru á þeim teningi. Ingólfur skýrir
það frekar í næstu vísum.
Bakkus gleði meinar mér
mörg er ögur stundin.
Píslargangan orðin er
erfiðleikum bundin.
Vínið leita löngum í
líkt og margir gera.
Oft á tíðum þurft hef því
þungan kross að bera.
Hjá okkur mörgum sem þekkja vel til á þessum
vettvangi er stundum hægt að sjá fleiri leiðir
með stuðningi þeirra sem eru sterkari. Að
lokum þessi frá Ingólfi.
Þó mig fjandinn fjötri í bönd
og fækki týndum sauðum.
Veit ég drottins hlýja hönd
hjálpar mér í nauðum.
Kannski þykir einhverjum að bera í bakkafullan
lækinn að bæta einni vísu við um þennan
konung. Vona að mér fyrirgefist að birta næst
þessa vísu Jóns S. Bergmanns sem ort var að ég
held eftir að svokölluð bannlög gengu í gildi.
Er nokkuð ljóst að þar er sá snjalli hagyrðingur
að átta sig á því að við þessa aðgerð færðist
brennivínsþamb heldur á annan veg og margir
þyngdu frekar drykkjuna.
Bakkus hafði heilsubrest
hnaut í öllum sporum.
Honum er að batna best
af bannlögunum vorum.
Alltaf freistandi og gaman að rifja upp vísur
eftir snillinginn Jón. Skoðum þessa.
Þegar skyggði á þjóðarhag
þrældómsmyrkrið svarta.
Ferskeytlunnar létta lag
lagði yl í hjarta.
Á fallegum vormorgni yrkir Jón svo fallega
hringhendu.
Allt í kring er eilífð skírð,
-ekkert þvingað grætur-
Vísnaþáttur 621 Fuglar syngja um draumadýrðdaginn yngja lætur.
Freistast til að enda þessa upprifjun með
þessari mörgum kunnu vísu Jóns.
Meðan einhver yrkir brag
og Íslendingar skrifa.
Þetta gamla þjóðar-lag-
það skal alltaf lifa.
Áfram skal haldið með kveðskap frá vinum í
vestrinu ef svo mætti að orði komast. Held að
rétt sé með farið að sá ágæti Bjarni frá Gröf
hafi ort svo fallegar vorvísur.
Þegar vorið bjart á brá
byrjar hér að skína,
með sólskríkjunni sendu þá
sumarkveðju þína.
Þegar hún kemur þreytt og svöng
þúsund fræ að tína,
hlusta ég á hennar söng
og heyri kveðju þína.
Eitt afbrigði í viðbót kemur hér af skáldskap
Bjarna. Kallast það hjá miklum spekingum
í vísnagerð braghenda. Get ég reyndar ekki
alltaf munað þetta orð og kalla þetta ágæta
afbrigði af skáldskap stundum þríhendu.
Ég elska þessi atómljóð sem enginn skilur
þau hvíla alveg í mér vitið
sem er að verða þreytt og slitið.
Að lokum þessi fallega vorvísa eftir Bjarna.
Vorið kemur, vetur fer
vonir allar stækka.
Sólin hlær og segir mér,
„sjáðu hvað ég hækka.“
Ef ég hef skilið þær upplýsingar rétt sem
ég fékk í gegnum símtól að afstöðnum
sveitarstjórnarkosningum mun Ágúst
Marinósson gefa svo skýra lýsingu á úrslitum
í Sveitarfélaginu Skagafirði.
Fagur sem áður er fjörðurinn enn
og fólkið sem glímuna þreytir.
Flestir sem búa þar framsóknarmenn
flórunni enginn hér breytir.
Sá ágæti félagi og gleðimaður Magnús
Halldórsson mun hafa hlustað á fréttaflutning
frá ákveðinni stofnun á Selfossi og ort af því
tilefni.
Oft hafa þingið og þjóðin sannað
að þurrð er á málum brýnum.
Og gott er að fátt mig grætir annað
en geldingar á svínum.
Gott að leita til skáldsins Davíðs úr skóginum
fagra með loka stefið.
Er sólin rís úr svefnsins tæru laug
er sælt að finna líf í hverri taug,
og heyra daginn guða á gluggann sinn
og geta jafnvel boðið honum inn.

Verið þar með sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON ) kristin@feykir.is
Vinkona mín Brynja
Þórarinsdóttir skoraði á mig
að skrifa pistil og ég kýs að
fjalla um flugvöll.
Mikið hefur verið rætt um
Reykjavíkurflugvöll, flugvöll
allra landsmanna, undanfarin
misseri. Flugvöllurinn
skiptir máli fyrir íbúa
landsbyggðarinnar og fyrir
íbúa Reykjavíkur.
Menn deila um hvort
flugvöllurinn eigi að fara
eða vera og sjá ýmist kosti
eða ókosti við að hafa
hann áfram í Vatnsmýrinni.
Á bloggsíðunum „Ég
vil flugvöllinn áfram í
Vatnsmýrinni“ og „Ég
vil flugvöllinn burt úr
Vatnsmýrinni“ keppast
menn við að finna rök
með og á móti vellinum.
„Hjartað í Vatnsmýrinni“
er stuðningshópur
vallarins, þar sem 70.000
manns hafa skrifað undir
stuðningsyfirlýsingu við
flugvöll í Vatnsmýrinni og
mun það vera fjölmennasta
undirskriftarsöfnun í sögu
þjóðarinnar.
Stjórnmálaflokkarnir hafa
sig mismikið frammi í
þessari umræðu og það er
athyglisvert að nú síðustu
vikurnar fyrir sveita- og
borgarstjórnarkosningar hafa
þeir flestir kosið að vera
svolítið passívir eða hafa það
pínulítið loðið hver stefna
þeirra er í flugvallarmálinu.
Sumir hafa talað um sátt í
flugvallarmálinu, talað um
að loka brautum eða ekki
loka brautum og skipuleggja
byggð en hafa flugvöllinn
áfram. Mér finnst þetta mjög
óskýrt.
Staðsetning flugvallarins,
vera hans eða flutningur er
að sjálfsögðu pólitískt mál
sem varðar alla landsmenn.
Mönnum hefur verið tíðrætt
um öryggi allra landsmanna
og mikilvægi þess að
hafa flugvöll í nálægð við
sjúkrahús og bráðamóttöku
sem getur þjónað öllu
landinu. Staðsetning
vallarins snýst ekki bara
um öryggi landsmanna
heldur um tengingu borgar
við landsbyggðina, nálægð
við opinberar stofnanir,
stjórnsýslu og þjónustu
höfuðborgarinnar og ekki síst
um atvinnu fjölda fólks. Vert
er að geta þess að í mörgum
borgum erlendis er algengt
að innanlandsflugvellir séu
í nágrenni við miðborg.
Staðsetning vallarins skiptir
líka miklu máli í fjárhagslegu
tilliti og eflaust er það
stærsta deilumálið. Það er
dýrt að byggja nýjan flugvöll,
núverandi flugvöllur stendur
á eftirsóttu svæði og margir
sjá gróðavon í nýtískulegri
íbúðabyggð á svæðinu.
Núverandi flugvöllur skapar
líka miklar tekjur sem færu
annað eða legðust niður ef
flugvöllurinn verður fluttur.
Þeir sem vilja flugvöllinn
burt úr Vatnsmýri hafa nefnt
Löngusker, Hólmsheiði og
Keflavík sem ákjósanlega
staði fyrir nýjan völl.
Veðurskilyrði á Hólmsheiði og
Lönguskerjum eru ekki talin
jafn góð og í Vatnsmýrinni.
Margir telja að innanlandsflug
leggist af ef það verður flutt til
Keflavíkur, Keflavík er allt of
langt frá miðborg Reykjavíkur
og Keflavíkurflugvöllur er allt
of dýr fyrir innanlandsflug,
þar sem alþjóðaflugvellir
innheimta miklu hærri gjöld
en innanlandsflugvellir.
Að lokum, ég bý í 50
metra fjarlægð frá
flugvallargirðingunni og hér er
mjög friðsælt að búa og ekkert
ónæði frá flugvellinum.
- - - - -
Ég skora á Ingibjörgu Hafstað
í Vík að skrifa næsta pistil.
Pistill Arngunnar var ritaður í
aðdraganda sveitarstjórnar-
kosninga en fyrir mistök
umsjónarmanns þáttarins
birtist hann ekki fyrr en nú.
Arngunnur H. Sigurþórsdóttir frá Messuholti í Skagafirði, núverandi íbúi í Skerjafirði skrifar
Er ekki mikið ónæði af flugvellinum?
ÁSKORENDAPENNINN
UMSJÓN kristin@feykir.is