Feykir - 16.08.2012, Blaðsíða 10

10 Feykir 30/2012
Saga & kirkja
samtvinnuð
Hátíðarhöld í Skagafirði
Árleg Hólahátíð og Sögudagur á Sturlungaslóð
voru haldin hátíðleg sl. helgi en að þessu sinni voru
haldnir sameiginlegir dagskrárliðir, enda tengjast
bæði viðfangsefnin órjúfanlegum böndum.
Á Hólahátíð gafst tækifæri til að taka þátt í helgihaldi,
fræðsludagskrá og farið í gönguferðir og kynnst gömlum
þjóðleiðum sem pílagrímar fóru á leið sinni heim að
Hólum til taka þátt í helgihaldi. Hápunktur hátíðarinnar
var svo biskupsvígsla frú Solveigar Láru Guðmundsdóttir
(sjá bls. 9). Ragnheiður Þórsdóttir vefari, sýndi bæði í
máli og verki, miðaldavefnað og hvernig ofið var
röggvarfeld við kljásteinsvefstað á vefstól sem settur hefur
verið upp í Auðunarstofu.
Á laugardaginn hélt Björn Vigfússon sögukennari við
MA fyrirlestur í Hóladómkirkju og Laufey Guðmunds-
dóttir söng. Sigríður Sigurðardóttir forstöðukona Byggða-
safns Skagfirðinga kynnti skilti sem Sturlungahópurinn
setti nýverið upp við Víðines í Hjaltadal. Á sama tíma léku
börnin sér að miðaldarsið, með hornum, sverðum og
skjöldum.
Um kvöldið var haldið Ásbirningablót í tilvonandi
Kakalaskála í Kringlumýri í Blönduhlíð. Um er að ræða
fyrsta viðburðinn sem haldinn er í húsakynnum skálans
sem Sigurður Hansen hefur unnið að en hann hefur
þegar gert umfangsmikið útilistaverk þar sem Haugs-
nesbardagi er sviðsettur á Haugsnesgrundum. Kakala-
skáli var fullsetinn og ríkti mikil gleði á meðal gesta í
hinum nýja skála. Boðið var upp á girnilegan mat að
miðaldarvísu, að hætti Hótel Varmahlíðar. Þar voru
fjölmörg skemmtiatriði þar sem Kristín Halla Bergsdóttir
mundaði fiðluna og hafði orð á einstökum hljómburði í
salnum. Siggi á Ökrum og Jói í Stapa fóru með stemmur
en Jói á jafnframt ófá handtökin í smíði Kakalaskálans.
Sigurður Sigurðarson kvað stemmu eftir Jóa í Stapa sem
var tileinkuð deginum. Agnar Gunnarsson sá um
veislustjórn eins og honum einum er lagið og stofnaði við
tilefnið Kakalakórinn, sem samanstóð af viðstöddum
Heimismönnum og tekið var Undir bláhimni við tilefnið.
Kjartan Sigurjónsson organista skipaði Agnar sem
stjórnanda Kakalakórisins. /BÞ