Feykir - 06.06.2013, Blaðsíða 8

8 Feykir 22/2013
„Þakklát fyrir að hafa fengið að
starfa við mitt hjartans mál“
Við skólaslit Tónlistarskóla
Skagafjarðar á dögunum var
Anna Kristín Jónsdóttir í
Mýrakoti leyst út með
gjöfum í tilefni þess að hún
hefur nú ákveðið að láta af
störfum við skólann eftir hátt
í 40 ára starf. Segja má að
Anna hafi tileinkað
tónlistinni alla sína starfsævi.
Hún kenndi við skólann frá
stofnun Tónlistarskóla
Skagafjarðarsýslu. Áður
hafði hún starfað við
einkakennslu í tvö ár, og
kenndi þá á gítar og píanó
auk þess að vera
stundakennari við
Grunnskólann á Hofsósi.
En skyldi þessi tónlistaráhugi
vera Önnu í blóð borinn?
-Tónlistaráhuginn hlýtur að
vera eitthvað í blóðinu, segir
hún. -Frá því ég man fyrst eftir
mér var ég ákveðin í að ég
ætlaði að verða tónlistarkona.
Ég skyldi fara þangað sem ég
þyrfti til að læra á hljóðfæri svo
ég gæti kennt öðrum sem
hefðu eins mikinn áhuga og ég.
Í fyllingu tímans innritaðist ég í
kennaradeild Tónlistarskólans í
Reykjavík og Tónskóla þjóð-
kirkjunnar, auk þess stundaði
ég söngnám hjá einkakennara.
Ég var búin að bíða svo lengi að
ég tók bara allan pakkann í
einu. Ég var í þessu í 5 ár og
vann fyrir mér með því að
syngja í Dómkirkjukórnum og
var líka í launuðum athafna-
kór, sem söng aðallega við
brúðkaup og jarðarfarir, rifjaði
Anna upp, þegar Feykir hafði
samband við hana í tilefni
starfslokanna.
Þegar Anna kom heim úr
námi var engin tónlistarkennsla
í Skagafirði utan Sauðárkróks.
-Það var svo árið 1976 að
framsýnt fólk hér í Skagafirði
stofnaði Tónlistarskóla Skaga-
fjarðarsýslu. Sá skóli þjónaði
öllum Skagafirði utan Sauðár-
króks. Kennt var á Sólgörðum,
Hofsósi, Hólum, Akraskóla,
Steinsstöðum, Varmahlíð og
Melsgili. Ég var ráðin kennari
strax frá upphafi. Í níu ár
stundaði ég áframhaldandi
nám, meðfram vinnunni, bæði
í orgelleik og söng, og sótti þá
tíma til Akureyrar.
Anna var ráðin skólastjóri
Tónlistarskóla Skagafjarðar-
Anna Jónsdóttir tónlistarkennari lætur af störfum
UMSJÓN kristin@feykir.is
sýslu árið 1984 og gegndi því
starfi til ársins 1999, en þá var
skólinn sameinaður Tónlistar-
skóla Sauðárkróks, í kjölfar
sameiningar sveitafélaganna,
og úr varð Tónlistarskóli Skaga-
fjarðar. -Ég hef starfað á Hofsósi
og á Sólgörðum óslitið frá árinu
1976 og kennt á hin ýmsu
hljóðfæri, svo sem píanó, orgel,
harmonikku, blokkflautu,
þverflautu, gítar, ukulele,
trommur og fleira. Einnig hef
ég kennt söng og verið með
ýmsa barnakóra og samspils-
hópa, bætti Anna við.
Auk kennslunnar hefur
Anna löngum verið kirkju-
organisti, enda var það hennar
æðsti draumur og var hún farin
að syngja í kirkjukór 11 ára
gömul. -Heimkomin úr námi,
árið 1974, var ég ráðin organisti
við Hofsósskirkju og Hofs-
kirkju á Höfðaströnd og ári
seinna við Fellskirkju og
Barðskirkju. Ég er með allar
þessar kirkjur enn í dag, og
vona að ég geti haldið því áfram
enn um sinn. Frá 1975 – 1977
var ég líka organisti við
Hóladómkirkju og Viðvíkur-
kirkju, sagði Anna.
Efst í huga Önnu við þessi
tímamót er þakklæti og vill
hún nota tækifærið til að koma
því á framfæri: -Að lokum ætla
ég að nota tækifærið og þakka
öllum mínum nemendum fyrr
og nú, já og samfélaginu öllu,
innilega fyrir að hafa gefið mér
kost á að starfa svo lengi við
það, sem var mitt hjartans mál.
Og síðast en ekki síst þakka ég
Sólgarðaskóla, Foreldrafélaginu
á Hofsósi og foreldrum allra
minna nemenda, einnig sam-
kennurum og öllu samstarfs-
fólki, hjartanlega fyrir falleg
orð og góðar gjafir í tilefni af
þessum tímamótum, sagði
Anna að lokum.
Við skólaslitin færðu þær Guðrún Þorvaldsdóttir, Ingibjörg Sólveig Halldórsdóttir og Sigríður Jónsdóttir
Önnu gjöf fyrir hönd foreldra nemenda hennar á Hofsósi. Einnig voru henni færð blóm og gjafabréf
frá samkennurum og sveitarfélaginu Skagafirði. Áður höfðu starfsfólk og nemendur Sólgarðaskóla
fært henni blóm og gjafir.
Anna með nemendum sínum er forseti Íslands heimsótti Hofsós 2008.
Það var söguleg stund á
Þingeyrum í Húnaþingi,
föstudaginn 31. maí sl., þegar
Guðrún Nordal, forstöðu-
maður Stofnunar Árna
Magnússonar og Steinunn
Sigurðardóttir hönnuður
afhentu heimamönnum
Flateyjarbók til varðveislu og
sýningarhalds. Fyrir hönd
heimamanna tóku Björn
Magnússon, formaður
sóknarnefndar Þingeyra-
klausturskirkju og Ingi-
mundur Sigfússon, eigandi
Þingeyra, á móti handrit-
inu.
Í ár eru liðin 350 ár frá fæðingu
Árna Magnússonar handrita-
safnara og í tilefni þess gengst
Stofnun Árna Magnússonar, í
samvinnu við heimamenn,
fyrir sýningum á sex stöðum á
landinu þar sem komið verður
fyrir vönduðum endurgerðum
handrita sem tengjast við-
komandi svæði ásamt fróðleik
um efni þess. Með því er minnt
á þá staðreynd að handritin
sem söfnuðust til Kaupmanna-
hafnar á 17. öld komu
hvaðanæva að af landinu og eru
vitnisburður um fjölbreyttan
menningararf Íslendinga frá
fyrri öldum.
Nokkrum einstaklingum
var boðið að „fóstra“ handritin
sem í hlut eiga; sá heimsækir
Árnastofnun og handritafræð-
ingur kynnir honum handritið,
útlit þess, sögu og efnið sem
það hefur að geyma. „Fóstran“
fer svo heim í hérað með endur-
gerð handritsins og afhendir
heimamönnum. Kom Flat-
eyjarbók í hlut Steinunnar Sig-
urðardóttur fatahönnuðar.
Við athöfnina flutti Guðrún
Nordal erindi um Flateyjarbók
og tilurð hennar, Hugrún Sif
Hallgrímsdóttir og Lillý
Rebekka Steingrímsdóttir léku
á þverflautu og Steinunn
Sigurðardóttir afhenti handrit-
ið. Ingimundur Sigfússon
stjórnaði athöfninni og þakk-
aði fyrir hönd heimamanna.
Að lokum var viðstöddum
boðið í kaffi.
Flateyjarbók var sett saman
að beiðni stórbóndans Jóns
Hákonarsonar í Víðidalstungu í
Húnaþingi vestra. Hún er að
mestu skrifuð á árunum 1387-
1394, e.t.v. á Þingeyrum, af
prestunum Jóni Þórðarsyni og
Magnúsi Þórhallssyni sem
einnig myndskreytti bókina
fagurlega. Flateyjarbók er stærst
íslenskra miðaldahandrita en
við gerð hennar voru notaðar
húðir af 113 kálfum. Noregs-
konungasögur mynda uppi-
stöðu bókarinnar en frásögnin
berst víða um Norður-
Atlantshaf, allt til Vínlands.
Árið 1647 eignaðist Brynjólfur
biskup Sveinsson handritið og
hann gaf það Friðriki 3.
Danakonungi 1656. Handritið
kom heim 21. apríl 1971 ásamt
Konungsbók eddukvæða en sá
viðburður markaði upphaf
afhendingar handrita úr
dönskum söfnum.
Flateyjarbók verður til sýnis
í Klausturstofu á Þingeyrum í
sumar en þar verður opið alla
daga frá kl. 10.00 – 17.00.
Ingibergur Guðmundsson
Flateyjarbók komin heim
FRÁ LESENDUM INGIBERGUR GUÐMUNDSSONN SKRIFAR
Guðrún Nordal forstöðumaður Árnastofnunar, Björn Magnússon formaður sóknarnefndar
Þingeyraklausturskirkju og Ingimundur Sigfússon, eigandi Þingeyra.