Víkurfréttir - 27.06.2019, Síða 12

Verkefni Gróu Bjarkar Hjörleifsdóttur og Guðrúnar Lísu Einarsdóttur, Jóga og slökun í
Heiðarskóla, hlaut Hvatningarverðlaun fræðsluráðs Reykjanesbæjar nú í ár en verðlaunin
voru afhent í bíósal Duus Safnahúsa fyrir stuttu.
Fræðsluráð Reykjanesbæjar efnir árlega til
hvatningarverðlauna fyrir einstaka kennara,
kennarahópa og starfsmenn í leikskólum, grunn-
skólum og tónlistarskóla Reykjanesbæjar en
verðlaunin eru veitt fyrir verkefni sem þykja
skara fram úr og vera öðrum til eftirbreytni.
Markmið Jóga og slökunar er að nemendur
læri á tilfinningar sínar og geti nýtt sér aðferðir
til þess að takast á við áskoranir daglegs lífs.
Andlegt álag og streita er í dag eitt stærsta
heilbrigðisvandamál heims og því mikilvægt
að nemendur eigi tæki og tól til að takast á við
þær áskoranir í framtíðinni.
Verkefnið er fyrir nemendur Heiðarskóla í
1.–4. bekk sem fara í jógakennslu einu sinni í
viku þar sem þeir læra slökun og núvitund en
það stendur einnig til boða fyrir nemendur á
unglingastigi skólans að velja jóga sem valgrein.
Um hvað snýst þetta verkefni?
Lísa: Þetta snýst um jóga og slökun fyrst og
fremst. Gróa er búin að kenna fyrsta og öðrum
bekk og ég með þriðja og fjórða. Við erum búin
að fara í gegnum þessar helstu jógastöður með
þeim, slökun og núvitund. Við förum í gegnum
tilfinningar og hvernig við getum reynt að
stjórna þeim. Svo er Gróa búin að sjá um valið
fyrir unglingastigið.
Gróa: Valið er fyrir 8.-10. bekk, þá velja þau að
koma í jóga. Þá tökum við þetta meira á þeirra
stigi. Við erum alltaf að reyna að bæta þetta
og hjálpa þeim að læra á tilfinningarnar sínar,
þannig ef þau eru til dæmis reið þá vita þau
hvaða tæki þau geta notað til að aðstoða sig.
Þetta er mjög brýnt verkefni.
Er mikilvægt að þau læri á þessum
aldri að hafa stjórn á tilfinningunum
sínum?
Lísa: Algjörlega, það er mikilvægt á öllum aldri.
Við höfum við verið að kenna þeim yngstu
öndunaræfingar sem hjálpa þeim að sofna.
Mjög margir krakkar eiga í erfiðleikum með
að fara að sofa.
Gróa: Þau eru kvíðin og áhyggjufull, eru komin
með herðarnar alveg upp í háls og þá er alveg
nauðsynlegt að þau læri þetta. Þau eru dugleg að
nota þetta heima og það er það sem maður vill.
Hvernig lýst krökkunum á þetta
verkefni?
Lísa: Svona 97% af krökkunum eru alveg til
í þetta en það eru nokkur prósent sem eiga í
miklum erfiðleikum með að slaka á og það eru
krakkarnir sem maður vill helst ná til.
Gróa: Þau eiga mörg mjög erfitt með að sitja
kyrr. Þetta kemur smám saman, því meira sem
við förum í þetta. Á næsta ári tökum við 5. bekk.
Við ætlum hægt og rólega að fá allan skólann í
þetta. Þetta mun virka og hefur verið að virka.
Lísa: Þetta snýst ekkert bara um það að sitja kyrr
heldur að ná því að vera svolítið ánægð þar sem
þau eru. Þau eiga ótrúlega mörg í erfiðleikum
með það að bara vera.
Gróa: Af hverju líður mér svona? Hvað get ég
gert til þess að róa mig niður? Mörg þeirra eru
hrædd við að fara að sofa og eru myrkfælin.
Ég held að þetta sé bara akkúrat það sem þau
þurfa, til dæmis fyrir prófkvíðann sem er orðinn
mjög mikill núna í dag. Þau eru að taka vel við
þessu og segjast nota þetta heima fyrir. Þetta
síast inn hægt og rólega og þau þurfa á þessu
að halda, alveg greinilega.
Mikil hugarfarsbreyting hefur átt sér
stað í samfélaginu síðustu ár gagnvart
jóga og hugleiðslu. Hvernig upplifið
þið það?
Gróa: Ég er jógakennari og það eru alltaf fleiri
og fleiri sem fara og læra það að vera jógakenn-
arar af því þau finna að þar eiga þau heima. Það
þurfa allir á þessu að halda, að muna að anda.
Þegar allur heimurinn er kominn á axlirnar á
þér þá þarftu aðeins að róa þig niður. Þetta er
bara gott, andleg heilsa skiptir öllu máli eins
og líkamleg heilsa.
Af hverju er mikilvægt að þetta komi
inn í skólana, frekar en að krakkarnir
geri þetta bara sjálfir utan skólatíma?
Lísa: Ég held þetta sé ákveðin forvörn, ef það er
hægt að segja sem svo. Að kenna þeim hvernig
á að takast á við þetta allt saman, allt áreitið í
kringum okkur, áður en það fer að vera íþyngj-
andi eða of erfitt að komast út úr vítahringnum.
Eins og við þekkjum í okkar kennararstétt þá er
fólk að upplifa kulnum hægri vinstri. Þetta er
ekkert nema streita náttúrulega og við þurfum
að kenna krökkunum okkar að takast á við
þetta og líka að kenna þeim að þetta sé ekki
eðlilegt ástand.
Gróa: Þetta er ekki komið nógu mikið inn
í íþróttirnar utan skóla, að róa sig niður og
anda. Vonandi, með þessu skrefi, og þessum
Hvatningarverðlaunum, þá taka fleiri við sér
því þetta er nauðsynlegt.
Hvaða þýðingu hefur það fyrir ykkur
að fá Hvatningarverðlaunin?
Lísa: Það hefur rosalega mikla þýðingu fyrir
okkur. Það er verið að segja okkur að við séum að
gera eitthvað gott og þá líður manni ótrúlega vel.
Þá er maður fullviss um að þetta festist í sessi.
Þetta hættir ekki bara eftir þetta skólaár. Við
fáum fleiri tækifæri til þess að gera þetta betur.
Gróa: Þetta er mikið hrós. Vonandi grípa fleiri
skólar tækifærið. Ég held þetta sé hvatning fyrir
bæjarfélagið að tileinka sér þetta.
Hvernig er að starfa sem kennari í
Heiðarskóla?
Lísa: Það er æðislegt. Skólaandinn er geggjaður.
Gróa: Það er frábært, frábært starfslið. Þetta
er besti skólinn.
Eru krakkar á þessum aldri of mikið í
símanum? Er það að spila inn í?
Gróa: Heiðarskóli er náttúrulega tækniskóli og
við ætlum ekki að tala á móti því. En við vitum
það alveg að krakkarnir eru mjög mikið í tölv-
unum og símunum. Auðvitað hefur það áhrif.
Krakkarnir eru ekki komnir með það mikinn
þroska til að geta tekist á við allt það áreiti sem
því fylgir. Með jóga, slökun og núvitund reynum
við að hjálpa þeim að standa svolítið með sjálfum
sér. Það er hluti af því sem við erum að reyna
að vinna með, að kenna þeim að það skipti ekki
máli hvað öllum öðrum finnist, ef þér líður vel.
Við getum alveg verið sérvitringar, það er allt í
lagi. Tækin sjálf eru góð en við þurfum náttúru-
lega, eins og með allt annað, að kenna þeim að
nota þetta. Það tekur tíma. Með hverju árinu
verður það vonandi betra.
Lísa: Ég held við séum alveg þokkalega framar-
lega í því í Heiðarskóla, að kenna þeim hvernig
við getum notað tækin. Að það þurfi ekki alltaf
að vera í þeim, en að við getum notað þau á
góðan og uppbyggilegan hátt.
Finnst ykkur jóga og slökun eiga að
vera partur af aðalnámskrá?
Lísa: Tvímælalaust, þetta er hluti af andlegri
heilsu. Þannig auðvitað skiptir þetta máli hjá
krökkum, rétt eins og það að læra að lesa og
skrifa.
~ Fleiri skólar grípi tækifærið og innleiði jóga og slökun fyrir nemendur á skólatíma ~
Hlutu Hvatningarverðlaunin 2019 fyrir verkefni í Heiðarskóla sem stuðlar að andlegri vellíðan
MIKILVÆGT AÐ ALLIR MUNI AÐ ANDA
Sólborg Guðbrandsdóttir
vf@vf.is
VIÐTAL
Gróa og Lísa brosmildar með hvatningarverðlaunin.
Verðlaunahafar Hvatningarverðlauna Reykjanesbæjar 2019 ásamt Helga Arnarssyni,
sviðsstjóra Fræðslusviðs og Valgerði Björk Pálsdóttur, formanns Fræðsluráðs.
12 MANNLÍF Á SUÐURNESJUM f immtudagur 27. júní 2019 // 26. tbl. // 40. árg.