Morgunblaðið - 09.07.2019, Side 24

24 ÍÞRÓTTIR
MORGUNBLAÐIÐ ÞRIÐJUDAGUR 9. JÚLÍ 2019
Eitt
ogannað
 Knattspyrnukonan Hrafnhildur
Hauksdóttir er komin aftur til Selfyss-
inga eftir að hafa leikið hálft tímabil
með Gautaborg DFF í sænsku C-deild-
inni. Hrafnhildur er 22 ára og kemur
frá Hvolsvelli en lék með Selfyssingum
2013-16, með Val 2017 og aftur með
Selfyssingum í láni frá Val 2018. Hún á
að baki fjóra A-landsleiki fyrir Íslands
hönd og 82 leiki í efstu deild.
 Hinn 17 ára gamli Viktor Forafonov
setti um helgina nýtt piltamet í 400
metra skriðsundi þegar hann keppti á
norska meistaramótinu í 50 metra
laug. Viktor synti á 4:02,82 mínútum
og bætti gamla metið um 11/100 úr
sekúndu. Patrekur Viggó Vilbergsson
átti metið áður frá því á Íslandsmeist-
aramótinu í apríl síðastliðnum.
 Bandaríska körfuknattleikskonan
Kiana Johnson sem sló í gegn með KR
síðasta vetur er gengin til liðs við Ís-
landsmeistara Vals. Hún skoraði 23,2
stig, tók 10,4 fráköst og átti 7,3 stoð-
sendingar í leik með KR í fyrra en var
þar áður næst stigahæst í finnsku úr-
valsdeildinni þar sem hún lék með
Forssan Alku. Johnson var valin besti
leikmaður janúar-
mánaðar 2019 af
Morgunblaðinu og
var þrisvar í fimm
manna úrvalsliði
mánaðarins hjá
blaðinu síðasta
vetur.
FÓTBOLTI
Andri Yrkill Valsson
yrkill@mbl.is
„Ég tel mig vera í góðri stöðu
núna, það er frekar mikill áhugi og
möguleikar á borðinu en það er ekki
undir mér komið hvernig það fer,“
segir Viðar Örn Kjartansson, lands-
liðsframherji í knattspyrnu, í samtali
við Morgunblaðið varðandi framtíð
sína á ferlinum.
Viðar er samningsbundinn rúss-
neska félaginu Rostov en er í láni hjá
Hammarby í Svíþjóð. Þar er hann
meðal þeirra markahæstu í úrvals-
deildinni með sex mörk í 14 leikjum,
en lánssamningurinn rennur út þann
15. júlí. Viðar getur spilað næsta leik
gegn Sundsvall þann sama dag, en á
miðnætti verður hann aftur orðinn
leikmaður Rostov. Hann sér ekki fyr-
ir sér að dvelja þar lengi í viðbót eftir
að hafa fengið fá tækifæri síðan hann
kom þangað síðasta sumar.
„Ég á þrjú ár eftir af samningi
mínum hjá Rostov, en ég vil vera þar
sem ég fæ fullt traust og spila. Það
hefur ekki verið hingað til hjá Rostov
og af því sem ég hef séð þar áður þá
skiptir engu máli hvað ég geri, það
skilar engu. Svo ég held ég myndi
njóta mín betur annars staðar, það
eru alls kyns þreifingar úr öllum átt-
um og það var komið lánstilboð frá
Tyrklandi sem er búið að hafna, eftir
því sem ég best veit. En svo veit mað-
ur aldrei hvað gerist,“ segir Viðar
Örn.
Langur vegur frá samkomulagi
Forráðamenn Hammarby hafa
mikinn áhuga á að halda honum, en
þar myndi Viðar Örn spila með Aroni
Jóhannssyni sem reiknað er með að
verði kynntur til leiks hjá félaginu á
morgun eftir fjögurra ára dvöl hjá
Werder Bremen í Þýskalandi. Viðar
segist tilbúinn að skoða það að vera
áfram hjá Hammarby, en það sé ekki
sjálfgefið.
„Ég held að þeir séu aðeins að
leggja meira í þetta núna, vilja ná ár-
angri og hafa sýnt áhuga. Það er
kannski of mikill pakki að ná saman
við Rostov, menn eru ekkert keyptir
á háar upphæðir til Svíþjóðar. Ég er
alveg tilbúinn til að skoða það að vera
áfram, en það er langur vegur í að fé-
lögin nái einhverju samkomulagi,“
segir Viðar og undirstrikar að sá
langi samningur sem hann á við
Rostov geri það að verkum að Rúss-
arnir geti svolítið stjórnað því hvert
hann gæti farið næst, eftir því hversu
góð tilboð berast.
„Núna fara hlutirnir að gerast, það
er venjulega allt rólegt í júní. Í sjálfu
sér gæti því verið að ég fari aftur til
Rostov í smátíma og fari síðan þaðan.
Þetta þarf ekkert að gerast á næstu
dögum eða vikum og er því svolítil
pattstaða, en ég held að þetta leysist
á endanum. Það sem skiptir mestu
máli er að vera þar sem fólk hefur trú
á þér.“
Allt gengið samkvæmt áætlun
Miðað við frammistöðuna með
Hammarby ætti Viðar Örn að mæta
með gott sjálfstraust á næsta áfanga-
stað, hver svo sem hann verður.
„Já og í leikformi, það skiptir
miklu máli. Það er allt annað en að
æfa bara og koma inn á í leikjum. Ég
spilaði ekki mikið í sex mánuði og ég
fann það fyrstu leikina hér að ég var
svolítið ryðgaður. Ég ætlaði hér að
komast aftur í leikform og skora
mörk og það hefur gengið upp eins
og ég sá fyrir mér,“ segir Viðar Örn,
sem er 29 ára gamall og hefur á at-
vinnumannsferlinum spilað í Noregi,
Kína og Ísrael, auk Rússlands og Sví-
þjóðar.
Rússarnir
stjórna
framtíðinni
 Viðar getur spilað einn leik enn með
Hammarby  Þreifingar úr öllum áttum
Morgunblaðið/Eggert
Stokkhólmur Viðar Örn Kjartansson hefur skorað sex mörk í fjórtán leikj-
um fyrir Hammarby í sænsku úrvalsdeildinni á þessu keppnistímabili.
Andri Yrkill Valsson
yrkill@mbl.is
„Ég myndi halda að það væru svona
helmingslíkur eins og staðan er í
dag,“ segir Emil Hallfreðsson,
landsliðsmaður í knattspyrnu, í
samtali við Morgunblaðið að-
spurður hvort hann muni semja aft-
ur við ítalska félagið Udinese. Emil
er samningslaus sem stendur, æfir
hér heima með FH-ingum en veit í
raun ekkert hvað framtíðin ber í
skauti sér.
Emil, sem er 35 ára gamall, var í
þrjú ár hjá Udinese en skipti síðasta
sumar yfir til Frosione, sem þá var
nýliði í ítölsku A-deildinni. Þeim
samningi var rift í janúar eftir að
Emil meiddist illa á hné, en Udinese
bauð honum þá til sín á ný og samdi
við hann út síðasta keppnistímabil.
Fyrstu æfingar í undirbúningi liðs-
ins fyrir næsta tímabil hófust svo í
gær en Emil er enn að bíða eftir
svari hvort Udinese hafi áhuga á að
halda sér.
„Ég ákvað að gefa þeim forgang
og bíða eftir svari frá þeim, enda
mjög ánægður hvernig þeir fengu
mig aftur í vetur þegar ég var
meiddur. Mér finnst þeir eiga það
skilið frá mér, en við erum enn að
bíða og sjá hvort það gangi upp eða
ekki,“ segir Emil. Það síðasta sem
hann heyrði frá Udinese var það að
liðið ætlaði að meta þá leikmenn
sem væru að snúa aftur úr láni og á
meðan bíður Emil enn um sinn.
Er opinn fyrir öllu
„Ég hélt að það yrði erfiðara, en
Ítalinn er svolítið rólegur. Fé-
lagaskiptin þar gerast oft ekkert
fyrr en í ágúst svo það er yfirleitt
frekar rólegt framan af.“
Þar sem Emil er samningslaus
geta önnur félög rætt við hann og
segir hann að einhverjar þreifingar
hafi verið í gangi, en ekki mikið
hingað til. Hann er heldur ekki far-
inn að stressa sig á að missa af lest-
inni í félagaskiptaglugganum þó
hann gefi Udinese lengri tíma.
„Nei, en ég mun heldur ekkert
bíða langt fram í ágúst eftir þeim.
Við erum byrjuð að skoða eitthvað
annað í kringum okkur og sjá hvað
annað spennandi er í boði,“ segir
Emil, sem hefur leikið á Ítalíu sam-
fleytt frá árinu 2007 fyrir utan eitt
ár á láni hjá Barnsley á Englandi.
Er það fyrsti kostur að vera áfram
á Ítalíu?
„Já, en ég er þannig séð opinn
fyrir öllu. Mig langar bara að spila
með einhverju skemmtilegu liði á
góðum stað þar sem fjölskyldan
hefur það gott. Það skiptir mestu
máli,“ segir Emil Hallfreðsson.
Vonast eftir
skemmtilegu liði
á góðum stað
Morgunblaðið/Kristinn Magnússon
Óvissa Emil Hallfreðsson veit ekki
hvar hann spilar á næsta tímabili.
Vagnhöfði 7, 110 Reykjavík | Sími: 517 5000 | stalogstansar.is
Ekki bara jeppar
SANGSIN gæðavara frá Kóreu
BREMSU
VÖRUR
í flestar gerðir bíla