Sveitarstjórnarmál - 2019, Page 30

30
SVEITARSTJÓRNARMÁL
Sveitarfélögin og Heimsmarkmið
Sameinuðu þjóðanna um
sjálfbæra þróun
Fjölmennt var á kynningarfundi sem
Samband íslenskra sveitarfélaga hélt nýlega
um heimsmarkmið Sameinuðu þjóðanna
um sjálfbæra þróun. Fundurinn þótti takast
afar vel, en auk þess sem Katrín Jakobsdóttir
forsætisráðherra og Aldís Hafsteinsdóttir,
formaður sambandsins, ávörpuðu fundinn
flutti sveitarstjórnarfólk víðs vegar af
landinu fróðleg erindi um sýn sína á
heimsmarkmiðin og aðkomu sveitarfélaga.
Nálgast má upptökur af framsögum og
glærur framsögumanna á vef sambandsins
undir Fundir og ráðstefnur.
Sá mikli áhugi, sem fundarsókn gaf til kynna
hjá sveitarfélögunum, þarf þó ekki að koma
á óvart. Áhugi á markmiðunum hefur farið
stigvaxandi síðustu misseri, ekki aðeins
hjá ríki og sveitarfélögunum heldur einnig
hjá félagasamtökum og fyrirtækjum. Sem
dæmi má nefna, að Festa – samfélagsábyrgð
fyrirtækja hélt seint á síðasta ári stóran
kynningarfund og var einnig fullt út úr
dyrum á þeim fundi.
Ávarp formanns sambandsins vakti,
að öðrum framsögum ólöstuðum,
verðskuldaða athygli, en Aldís flutti í lok
fundarins stutta samantekt um mögulegar
aðgerðir á vegum sveitarfélaganna með
hliðsjón af núverandi stöðu mála. Lagði
formaðurinn m.a. til að kannað verði af hálfu
sambandsins hvort setja eigi á fót samstarfs-
og samráðsvettvang sveitarfélaga sem hefði
það hlutverk að marka sameiginlega stefnu
eða sýn sveitarfélaganna á heimsmarkmiðin
og innleiðingu þeirra. Er ávarp formannsins
birt í heild sinni á síðu 31.