Árbók Nemendasambands Samvinnuskólans - 01.06.1983, Blaðsíða 25
hafði helst aldrei þorað að horfa á strák, lítið fengið að
fara á skemmtanir. Nú varð ég undireins skotin í strák-
unum, en það var nú lítið tækifæri til alvarlegra ástar-
leikja, mest hægt að kyssast á tröppum eftir dansæfingar.
Flestir bjuggu hjá ættingjum eða vinum, og höfðu ekki
betri aðstæður en ég, sem var í stofunni, með portera á
milli mín og gömlu hjónanna. Um einn bekkjarbróður
min var svo þröngt, að hann varð að sofa á bedda, sem
settur var upp hvert kvöld í eldhúsinu, sem.var svo lítið,
að hann varð að hafa fæturna inn í bakarofninum.
Tveir höfðu fengið leigðan sumarbústað inn við Tungu
við Suðurlandsbraut. Það þótti enginn smáspotti í þá daga,
og þó að strætisvagnar væru farnir að ganga, kostaði það
heilmikið ef alltaf átti að fara í strætó, og ég held að þeir
hafi oft gengið í skólann. Við Auður heimsóttum þá nokkr-
um sinnum. Það var kalt inni hjá þeim og þeir voru
dúðaðir við lesturinn. Eitthvað gátu þeir eldað sér þarna.
Eina nóttina kviknaði í bústaðnum og þeir brenndust eitt-
hvað, annar þeirra var reifaður á höndum lengi á eftir.
Einhver varð til þess að skjóta yfir þá skjólshúsi, því að
þeir héldu áfram í skólanum.
Fæstir höfðu mikil auraráð, og ekki fór mikið fyrir
fatnaði. Ég átti t.d. eitt pils og tvær blússur við það, og
peysu hafði ég prjónað mér áður en ég fór í skólann. Fyrir
jólin saumaði svo mamma á mig sparikjól úr vínrauðu
silkiefni, ógurlega fínan. Fram að þeim tíma varð ég að
pressa pilsið fyrir allar dansæfingar og fara í betri blúss-
una. Ekki spillti þetta gleðinni yfir að vera til. Dans-
æfingarnar fóru þannig fram að dansað var í báðum
kennslustofunum, vængjahurðunum ýtt til hliðar og stól-
um raðað meðfram veggjum, og þar sátum við stúlkurnar
fyrst og fremst svona upp á gamla móðinn, og biðum
eftir því að strákarnir byðu okkur upp í dans. Það var
áreiðanlega ekki mikið um það að við byðum þeim upp
í dans. Ég held við höfum öll dansað og dansað mikið. Ég
man ekki eftir að það hafi verið nema ein harmónikka,
sem var spilað á og það stundum af einum nemanda,
21