Feykir - 13.06.2018, Síða 3

Hestar
Tóti með hæst dæmda hest
í heimi í annað sinn
Þórarinn Eymundsson
og gæðingurinn Þráinn
frá Flagbjarnarholti áttu
sannkallaða stjörnusýningu
á Hólum í Hjaltadal fyrir helgi
en þar fór fram vorsýning
kynbótahrossa. Þráinn hlaut
8,70 fyrir sköpulag, 9,11 fyrir
kosti og 8,95 í aðaleinkunn
sem gerir hann að hæst
dæmda hesti í heiminum í dag.
Sló hann þar með heimsmet
Þórálfs frá Prestsbæ sem hlaut
8,94 í aðaleinkunn í fyrra.
Þráinn er fæddur árið 2012,
undan Álfi frá Selfossi og Þyrlu
frá Ragnheiðarstöðum, eigandi
hans og ræktandi er Jaap
Groven. Hesturinn hefur verið
sýndur alls fimm sinnum,
fjögra vetra hlaut hann hæst
8,38 í aðaleinkunn, fimm vetra
bætti hann um betur og hlaut
8,69 í aðaleinkunn og nú hefur
hann eins og fram hefur komið,
bætt heimsmetið fyrir hæstu
aðaleinkunn, 8,95. Sýnandi
hestsins nú eins og áður er
Þórarinn Eymundsson en
Þórarinn sýndi einmitt líka
Þórálf frá Prestsbæ. Þórarinn
hefur því sýnt tvo hæst dæmdu
hesta heims sem er einstakur
árangur.
Einnig er áhugavert að
benda á það að Þórálfur er, eins
og Þráinn, undan Álfi frá
Selfossi og eru því Álfssynir
númer 1 og 2 í heiminum í dag.
/PF
Heimsmeistarinn Þráinn frá Flagbjarnarholti og Þórarinn Eymundsson á hressilegu
tölti. MYND: SVALA GUÐMUNDSDÓTTIR
23/2018 3