Lögmannablaðið - 2020, Blaðsíða 27

Mun þetta leiða af sér tímasparnað?
„Já, það er örugglega stærsti þátturinn þar sem ekki þarf að
slá inn upplýsingarnar aftur. Ef allt gengur síðan upp með
gæsluvarðhaldsbeiðnirnar þá bætast önnur rannsóknarmál
við s.s. húsleitir og handtökur, lögræðismálin … hver
málaflokkurinn á fætur öðrum mun bætast við. Svo endum
við á sakamálunum og einkamálunum. Þetta er mjög
spennandi og allir eru mjög áhugasamir,“ sagði Símon.
Fjarfundabúnaður í fyrirtökum
Í kjölfar Covid jókst notkun fjarfundabúnaðar í fyrirtökum
dómsmála. Ingibjörg Þorsteinsdóttir sagðist helst nýta Teams
í millifyrirtökur og undirbúning aðalmeðferðar eða ræða
við lögmenn í gegnum síma: „Út frá öryggissjónarmiðum er
ekkert því til fyrirstöðu að nota Teams enda eru fyrirtökur
opnar í flestum málum. Kostir þess að nýta fjarfundarbúnað
í fyrirtökum eru margvíslegir og snúa fyrst og fremst að
skilvirkni og gæðum. Með þessum hætti sparast talsverður
tími, bæði hjá dómara og lögmönnum sem unnt er að nýta
til raunverulegrar úrvinnslu málsins. Svo hafa lögmenn sem
starfa á landsbyggðinni lýst ánægju með þetta fyrirkomulag,
enda mun árangursríkara að þeir sjálfir séu viðstaddir
fyrirtöku mála í stað þess að senda lögmann fyrir sig sem
er kannski ekkert inn í málinu. Í raun er ekkert því til
fyrirstöðu að vera með allt nema aðalmeðferð í fjarfundi
enda eru gögn ýmist send með tölvupósti eða í gegnum
réttarvörslugáttina,“ sagði Ingibjörg.
Símon sagði að dómarar hefðu verið hvattir til að nýta
sér tæknina en það væri þó misjafnt í hve miklum mæli
þeir gerðu það. Þótt að skjáir séu komnir upp í flestum
dómsölum þá eru þeir enn sem komið er eingöngu notaðir
til að varpa upp skjölum en ekki er búið að tengja hugbúnað
og hefja rafræna málsmeðferð úr sal eða taka skýrslur af
vitnum í gegnum hljóð og mynd. Ástæðan að sögn Símonar
er sú að sá hágæða hug- og tæknibúnaður, sem uppfyllir öll
öryggissjónarmið, er dýr og verið er að athuga hvort hann sé
útboðsskyldur. „Við erum þó með fjarfundarbúnað í dómsal
103 í Héraðsdómi Reykjavíkur sem tengist fangelsunum
á Hólmsheiði og Litla-Hrauni og er notaður til að taka
skýrslur af mönnum og framlengja gæsluvarðhald svo ekki
þurfi að flytja fanga á milli. Dómstólasýslan er síðan að
láta setja upp búnað í sal hjá Héraðsdómi Reykjavíkur og
Landsrétti í tilraunaskyni en hann þarf að „tala saman“
við upptökukerfið okkar svo ekki verði réttarspjöll,“ sagði
Símon að lokum.

INGIBJÖRG ÞORSTEINSDÓTTIR
SÍMON SIGVALDASON
LÖGMANNABLAÐIÐ TBL 03/20 27