Morgunblaðið - Sunnudagur - 17.01.2021, Qupperneq 4

FRÉTTIR VIKUNNAR
4 MORGUNBLAÐIÐ SUNNUDAGUR 17.1. 2021
Fram kom að íslensk stjórnvöldræddu nú við fleiri lyfja-framleiðendur en Pfizer um
tilraunaverkefni um hjarðónæmi
við bólusetningu. Óþolinmæði hefur
gætt með hve hægt og lítið berst af
bóluefni til landsins, en Evrópusam-
starf um bóluefnisöflun hefur ekki
virkað eins og vonir stóðu til. Katrín
Jakobsdóttir forsætisráðherra sat
þó fast við sinn keip um að þorri
þjóðarinnar yrði bólusettur fyrir
mitt ár.
Lögspekingar á sviði persónuréttar
komust að þeirri niðurstöðu að
heimildir yfirvalda til smitrakninga
væru óskýrar. Þar horfðu þeir sér-
staklega til þess þegar sótt-
varnalæknir aflaði sér upplýsinga úr
kortafærslum á knæpu, þar sem
hópsmit kom upp í haust. Upplýs-
ingar um innvortis sprittun fólks
væru tvímælalaust „viðkvæmar per-
sónuupplýsingar“.
Ákvörðun heilbrigðisráðherra um að
skimun með brjósta- og legháls-
krabbameini færðist frá Krabba-
meinsfélaginu til hins opinbera sætti
mikilli gagnrýni og ekki þó síður hitt
að nú væru konur á aldrinum 40-49
ekki lengur boðaðar í skimun. Fallið
var frá þessu nokkrum dögum síðar.
Hótelhaldarar telja Reykjavíkur-
borg vilja gullgæsina feiga. Hana
skorti minnsta vilja til þess að verja
rekstur gistihúsa í borginni eftir að
fram kom að hún legðist gegn hug-
myndum um frestun fasteigna-
gjalda þeirra, en þau hafa verið nán-
ast tekjulaus undanfarið ár.
Íslendingar eru aufúsugestir í Eist-
landi sem fyrr, jafnvel sem aldrei
fyrr, því þeir eru nú einir þjóða, sem
eru undanþegnir öllum sóttvarna-
reglum við komuna til landsins.
Hvort það auki mönnum ferðahug er
önnur saga, þar eru barir og líkams-
ræktarstöðvar líka lokuð, 11 stiga
frost og bylur, en veiran í miklum
uppgangi. Svo takk, en nei takk.
  
Greint var frá því að frá og með
þessari viku yrði öll dagskrá Stöðv-
ar 2 aðeins aðgengileg áskrifendum,
þar á meðal fréttir og fréttatengt
efni, sem hefur undanfarin 34 ár ver-
ið sent út í opinni dagskrá. Má því
segja að klukkan hafi færst 34 ár aft-
ur og þorri landsmanna mun því að-
eins fá sjónvarpsfréttir af sjónarhóli
hins opinbera.
Menningarmálaráðherrann Lilja Al-
freðsdóttir sagði þetta brotthvarf
frétta Stöðvar 2 slæmt og að sam-
keppni minnkaði fyrir vikið. Hún
sagði skynsamlegast að Ríkis-
útvarpið færi af auglýsingamarkaði,
en áður en af því gæti orðið þyrfti
þingið samt að samþykkja frumvarp
sitt um styrkjakerfi fyrir frjálsa fjöl-
miðla. Sem þá yrðu auðvitað háðir
fjárveitingavaldinu og vafamál
hversu frjálsir væru.
Farsóttin hefur breytt hegðan og
neysluháttum þjóðarinnar mikið.
Aukin dagdrykkja veldur því að vín-
búðirnar hafa slegið hvert sölumetið
á fætur öðru, en ofan á það að eng-
inn kemst í ræktina hefur velta mat-
vöru í netverslunum þrefaldast á
einu ári. Þá jókst innflutningur
neysluvöru einnig verulega.
Fyrsta sendingin af bóluefni Mod-
erna kom til landsins, heilir 1.200
skammtar, sem duga fyrir bólusetn-
ingu 600 manns. Að sögn er von á
meiru síðar.
Kirkjugarðasamband Íslands and-
æfði lagafrumvarpi sem heimila
myndi aukið frelsi fólks til þess að
strá ösku látinna. Í umsögn kom
fram að það gæti haft bæði ófyrir-
séðar og óæskilegar afleiðingar, en
sjálfsagt telur það kirkjugarðana
einnig missa reku úr sínum sverði.
Ellefu af 20 stærstu sveitarfélögum
landsins sýndu íbúum sínum það ör-
læti að lækka fasteignaskatta og var
meira að segja Reykjavíkurborg í
þeim hópi. Borgin fór alla leið úr 1,65%
sem er hæsta leyfilega skatthlutfall,
niður í 1,60%. Ekkert þeirra var hins
vegar í námunda við það hlutfall sem
lögin gera ráð fyrir, en það er 1,32%
Íbúar í Úlfarsárdal höfðu þó ekki
tíma til þess að fagna lægri fast-
eignaskatti. Til þess voru þeir of
uppteknir við að mótmæla áformum
borgarinnar um breytingu á að-
alskipulagi hverfisins. Hún felst í að
setja niður lítið létt iðnaðarhverfi, í
ætt við það sem nú má finna á Bílds-
höfða, fyrir ofan íbúðahverfið.
Þrátt fyrir mikið atvinnuleysi er
töluvert af lausum störfum á mark-
aði, Þau voru um 2.800 á síðasta árs-
fjórðungi, en á sama tíma voru
14.900 manns atvinnulausir. Senni-
lega eru margir þeirra að vænast
þess að fá sín fyrri störf aftur þegar
plágunni linnir og vilja því síður fast-
ráða sig annars staðar.
  
Meirihlutaeigendur í Skeljungi hafa
uppi ýmis áform um breytingar á
rekstrinum, t.d. með frekari smá-
sölu. Jón Ásgeir Jóhannesson,
stjórnarformaður Skeljungs, segist
eygja ýmis tækifæri, þar á meðal
fjárfestingu í Bretlandi. Vörumerkið
Útrás 2.0 er laust til umsóknar.
Stjórnarandstaðan og þá sér-
staklega Samfylkingin settu sig upp
á móti fyrirhugaðri sölu á hlut rík-
isins í Íslandsbanka og telur hana
getað valdið Hruninu 2.0 ef ekki
annarri fjármálakreppu á heimsvísu.
Sem auðvitað væri verra. Oddný
Harðardóttir sagði söluna ekki
tímabæra, eins og hún ætti best að
vita, enda mælti hún sjálf fyrir frum-
varpi um sölu ríkisins á eignarhlut í
fjármálafyrirtækjum þegar hún var
fjármálaráðherra Samfylking-
arinnar árið 2012.
Þrátt fyrir að farsótt lamaði stóran
hluta atvinnu- og þjóðlífs á síðasta
ári kom á daginn að staðgreiðsla út-
svars á seinni hluta þess reyndist
7,2% hærri en á sama tíma árið 2019.
Komu þær greiðslur í lok liðins árs
mörgum sveitarfélögum skemmti-
lega á óvart, en þær voru nokkuð
misjafnar eftir landshlutum.
Kórónuveirusmit var greint á
hjartadeild Landspítala og var um-
svifalaust lokað fyrir innlagnir, sjúk-
lingar og starfsfólk skimað. Eftir
nokkurt japl, jaml og fuður kom þó í
ljós að eitthvað var bogið við skim-
unina, sem að líkindum greindi þar
gamalt smit.
Þingmenn úr flestum flokkum tóku
undir sjónarmið Lilju Alfreðsdóttur
menningarmálaráðherra um að Rík-
isútvarpið færi af auglýsingamark-
aði, en vinstri græn áttu þó erfitt
með að fella sig við það nema því
yrði bættur skaðinn með enn glæsi-
legri fjárframlögum úr ríkissjóði.
Hafði Kolbeinn Óttarsson Proppé
það á orði að ríkisfjölmiðill gegndi
lykilhlutverki við að viðhalda réttum
og sameiginlegum skilningi þjóð-
arinnar á staðreyndum mála.
Eitthvað skorti þó á sameiginlegan
skilning lögregluþjóna og heilbrigð-
isyfirvalda á lögmæti þess að skylda
fólk í sýnatöku eða 14 daga sóttkví í
farsóttarhúsi við komuna til lands-
ins. Svandís Svavarsdóttir kvaðst
vilja skoða lagagrundvöllinn áður en
svo langt væri gengið.
Ásmundur Einar Daðason, barna-
og félagsmálaráðherra, ákvað að
færa sig úr Norðvesturkjördæmi á
mölina í komandi kosningum.
  
Samtök fyrirtækja á veitingamark-
aði sendu stjórnvöldum harðorða
áskorun um að bregðast tafarlaust
við stöðu veitingageirans, sem væri
kominn á hnén eftir sóttvarnatak-
markanir á rekstrinum. Helmingur
félagsmanna telur að rekstur þeirra
lifi að óbreyttu ekki út febrúar.
Kalla þurfti út sérsveit lögreglu í
Borgarholtsskóla þegar maður
vopnaður hafnaboltakylfu og hníf
réðst að nemendum og kennurum
um hábjartan dag, eftir að hópáflog
höfðu brotist út. Árásin var tekin
upp á síma og dreift á félagsmiðlum.
Rannsókn Ragnheiðar Jónsdóttur
íslenskufræðings bendir til þess að
unglingar noti ensk tökuorð og
slangur í æ ríkara mæli. Word.
Maður á sextugsaldri var dæmdur í
14 ára fangelsi fyrir að hafa orðið
konu sinni að bana í Sandgerði í
fyrravor.
Tryggingafélagið VÍS sendi frá sér
jákvæða afkomuviðvörun um að
hagnaður þess árið 2020 yrði 39%
meiri en vænst hafði verið. Markaðs-
aðilar voru felmtri slegnir og hluta-
bréfaverð VÍS féll um 3,5%.
Þórunn Egilsdóttir, oddviti Fram-
sóknarflokksins í Norðaustur-
kjördæmi, greindi frá því að hún
myndi ekki sækjast eftir sæti á lista
flokksins fyrir komandi kosningar.
Hún er í leyfi eftir að hún greindist
með krabbamein fyrir skömmu.
Guðmundur Felix Grétarsson, raf-
virki sem missti báða handleggi í
slysi árið 1998, gekkst undir tvöfalda
handleggjaágræðsluaðgerð í Lyon í
Frakklandi.
Sóttin, bóluefnið
og borg óttans
Hópáflogum í Borgarholtsskóla lyktaði með því að maður réðst á nemendur og kennara með hníf og hafnaboltakylfu.
Það var þó alls ekki eina líkamsárásin og áflogin, sem lögregla þurfti að rannsaka í vikunni.
Morgunblaðið/Kristinn Magnússon
10.1.-16.1.
Andrés Magnússon
andres@mbl.is
Kaja organic, Kalmansvellir 3, kajaorganic.com, kajaorganic@gmail.com
Sölustaðir:
Hagkaup, Nettó, Melabúð, Fjarðarkaup, Heilsuhúsið, Frú Lauga, Matarbúðin,
Brauðhúsið, Fiskkompaní, Mamma veit best og Matarbúr Kaju Akranes
Frækex
Gott með ostum
Gott með áleggi
Gott fyrir umhverfið
Gott fyrir þig
Keto, vegan, gluteinlaust
og að sjálfsögðu lífrænt
í umhverfisvænum
umbúðum