Feykir - 15.01.2020, Blaðsíða 2

Úti hamast vindurinn og úrkoman lemur rúðurnar,
hríðarbylur í morgun en slydda nú þegar farið er að líða á
daginn (þriðjudag). Hvorugt gott til útivistar en þegar maður
hefur þak yfir höfuðið og þarf ekki að vera á ferli utandyra,
getur bara unnið vinnuna sína við eldhúsborðið með
kaffibrúsann og kertaljós á kantinum, er þetta samt ekkert
svo slæmt.
Ég hef ekki komist hjá því að taka
eftir að tíðarfar undanfarinna
vikna er farið að reyna á þolrifin
hjá mörgum og upphrópanir og
andvörp eru tíð á samfélags-
miðlunum. Því er ekki að neita að
undanfarinn mánuður hefur
verið talsvert rysjóttur og sjaldan
orðið lát á látunum til lengdar.
Það er þó kannski ekki hægt að
tala um aftakaveður ef desember-
veðrið mikla er undanskilið. Eins og ég kom að áðan eigum
við mannfólkið mismikið undir veðri og þess vegna finnst
mér líka að við höfum mismikla ástæðu til að kvarta. Ég bara
get ekki að því gert að það læðist stundum örlítill
pirringshrollur niður eftir hryggsúlunni á mér þegar ég sé
fólk sem hefur enga knýjandi þörf fyrir að fara út úr húsi, hafi
það haft vit á að byrgja sig upp af mjólk og kaffi, væla og
skæla yfir veðurfarinu, vitandi það að þeir eru margir sem
hafa ekki um annað að velja en að láta sig vaða út í bylinn,
hvað þá þegar hugsað er til björgunarsveitafólksins okkar
sem oft á tíðum þarf að hætta sér út í vægast sagt vafasamar
aðstæður, eingöngu vegna fífldirfsku og asnaskapar annars
fólks.
Veðurminni fólks er afskaplega gloppótt, að ég held. Þegar
við fáum kuldatíð eða rigningarsumur hættir okkur til að
halda því fram að svona sé þetta bara alltaf, þrátt fyrir
sólarmetin sem voru slegin árið áður. Einhverjir vilja halda
því fram að veðrátta, á við þá sem nú er, eigi sér bara engin
fordæmi en mér finnst nú einhvern veginn að það þurfi
ekkert að leita svo afskaplega langt aftur til að finna dæmi um
eitthvað svipað. Ég vil nú, enn sem komið er, ekki telja mig til
elstu manna en ég man samt vel eftir nokkrum vetrum þegar
ég sá ekki út um gluggana á íbúðinni sem ég bjó í svo
mánuðum skipti. Það voru sannkallaðir snjóavetur.
Það sem ég vildi sagt hafa með þessum orðum mínum er
líklega bara það að það gagnar lítið að fjargviðrast yfir
veðurfarinu, við fáum því ekki breytt, heldur reyna að taka
stormunum með allri þeirri þolinmæði sem við búum yfir.
Fríða Eyjólfsdóttir,
blaðamaður
LEIÐARI
Leiðari um leiðindaveður
Útgefandi: Nýprent ehf., Borgarflöt 1, Sauðárkróki
Póstfang Feykis: Borgarflöt 1, 550 Sauðárkrókur
Ritstjóri & ábyrgðarmaður:
Páll Friðriksson, palli@feykir.is & 861 9842
Blaðamenn:
Fríða Eyjólfsdóttir, frida@feykir.is & 867 9744,
Óli Arnar Brynjarsson, oli@feykir.is | Sigríður Garðarsdóttir, siggag@nyprent.is
Áskriftarverð: 585 kr. hvert tölublað með vsk. Lausasöluverð: 720 kr. með vsk.
Áskrift og dreifing: Nýprent ehf. Sími 455 7171. Umbrot og prentun: Nýprent ehf.
Óháð fréttablað á Norðurlandi vestra - alltaf á miðvikudögum
Landnámssetrið í Borgarnesi
Öxin - Agnes og Friðrik
Sagnamaðurinn Magnús
Ólafsson frá Sveinsstöðum
verður með þrjár sögustundir á
Landnámssetrinu í Borgarnesi í
janúarmánuði sem bera heitið
Öxin - Agnes og Friðrik.
Þar mun Magnús segja frá
einum dramatískasta atburði
Íslandssögunnar – síðustu aftök-
unni á Íslandi sem fram fór við
Þrístapa í Vatnsdalshólum þann
12. janúar árið 1830 kl. 14 þegar
þau Friðrik Sigurðsson og Agnes
Magnúsdóttir voru líflátin.
Atburðir þessir tengdust
fjölskyldu Magnúsar persónulega
og segir hann frá ótrúlegum
atvikum í því samhengi. Atvikum
sem ekki hafa farið í hámæli og
erfitt er að skýra. Magnús er
sagnamaður af guðs náð og
heldur áhorfendum föngnum frá
upphafi til enda. Frumsýning var
sl. sunnudag 12. janúar kl. 14 en
þá voru liðin slétt 190 ár frá því
atburðurinn átti sér stað. Uppselt
var á frumsýninguna.
Tvær sýningar til viðbótar eru
á dagskrá safnsins, laugardaginn
18. janúar klukkan 20-22 og
sunnudaginn 26. janúar klukkan
16-18. /FE
HSN á Blönduósi
Gáfu meðferðarbekk og æfingatæki
Hollvinasamtök Heilbrigðisstofn-
unarinnar á Blönduósi byrjuðu
árið með því að afhenda
Heilbrigðisstofnun Norðurlands
vestra á Blönduósi formlega
nýjan meðferðarbekk og æfinga-
tæki að andvirði kr. 974.396.
Tækin hafa nú þegar verið
tekin í notkun og eru staðsett í
aðstöðu sjúkraþjálfara en, eins og
segir í tilkynningu frá Hollvina-
samtökunum, eru Húnvetningar
svo lánsamir að hafa fjóra vel
menntaða sjúkraþjálfara við
stofnunina sem hafa bætt
aðstöðuna til muna og á nú aðeins
eftir að koma sundlauginni aftur í
gagnið.
Hollvinasamtök Heilbrigði-
sstofnunarinnar á Blönduósi voru
stofnuð 19. apríl árið 2005 og
verða því 15 ára á árinu. Þau hafa
stutt myndarlega við bakið á
Heilbrigðisstofnuninni á Blöndu-
ósi í gegnum tíðina. Eina fasta
tekjulind samtakanna eru ár-
gjöldin og því er nauðsynlegt að
félögum fjölgi, segir í tilkynningu
samtakanna. Í því skyni munu
eyðublöð liggja frammi á biðstofu
og hjá sjúkraþjálfurum eftir næstu
viku þar sem fólk getur skráð sig í
samtökin. Einnig er hægt að
hringja í síma 452-4324 eða 680-
6013. /FE
Frá afhendingu gjafabréfsins. Sjúkraþjálfarar ásamt stjórnarmönnum og yfirhjúkr-
unarfræðingi við æfingartækið AÐSEND MYND
Engar aflatölur birtust í síðasta tölublaði
Feykis og verða því tölur tveggja fyrstu
vikna ársins teknar saman að þessu sinni.
Í ótíðinni undanfarið hafa fáir stundað
sjóinn sem sjá má að einhverju leyti merki í
aflatölunum. Heildarafli fyrri vikunnar á
Skagaströnd var 28.730 kíló og þeirrar síðari
46.951 sem samanlagt gerir tæp 76 tonn.
Norska skipið Silver Framnes landaði
tæpum 230 tonnum af úthafsrækju á Sauðár-
króki í fyrstu viku janúar og Drangey kom með
tæp 97 tonn báðar vikurnar. Málmeyjan
landaði aðeins í seinni vikunni.
Alls var landað 324.434 kílóum á Sauðár-
króki í fyrri vikunni og 253.535 í þeirri seinni,
samtals 578 tonn. Heildarafli tímabilsins á
Norðurlandi vestra var 653.650 kíló. /FE
Aflatölur 29. des. 2019 – 11. jan. 2020 á Norðurlandi vestra
Rúm 650 tonn það sem af er ári
SKIP/BÁTUR VEIÐARFÆRI KG SKIP/BÁTUR VEIÐARFÆRI KG
SAUÐÁRKRÓKUR
Drangey SK 2 Botnvarpa 193.776
Málmey SK 2 Botnvarpa 156.722
Silver Framnes NO 999 Rækjuvarpa 227.471
Alls á Sauðárkróki 577.969
SKAGASTRÖND
Hamar SH 224 Lína 20.955
Kristinn SH 812 Landbeitt lína 52.093
Sæfari HU 212 Landbeitt lína 2.633
Alls á Skagaströnd 75.681
Norðurland vestra
Fleiri
dýralæknar
á bakvakt
Dýralæknum á bakvakt á
Norðurlandi vestra hefur
verið fjölgað um óákveðinn
tíma úr einum í tvo af Mat-
vælastofnun en reynslan
sýnir að vaktsvæðið sé of
víðfeðmt og illfært á veturna
til að einn dýralæknir geti
sinnt öllum útköllum, einkum
þegar illa viðrar.
Á vef Matvælastofnunar
kemur fram að landinu sé
skipt í vaktsvæði til að veita
dýraeigendum aðgang að
dýralæknum utan hefðbund-
ins vinnutíma. Bakvaktirnar
eru eingöngu fyrir neyðar-
tilfelli sem koma upp og þola
ekki bið. Vaktsvæðin og fjöldi
dýralækna eru skilgreind í
lögum um dýralækna og heil-
brigðisþjónustu við dýr. /PF
Magnús við minningarstein á aftöku-
staðnum. MYND AF LANDNAM.IS.
2 02/2020