Nesfréttir - 01.08.2021, Blaðsíða 10

Sýning á kirkjulistaverkum
Sigrúnar Jónsdóttur (1921-2001),
kirkjulistakonu, verður í Seltjarnar-
neskirkju í tilefni þess að eitt
hundrað ár voru liðin frá fæðingu
hennar 19. ágúst síðastliðinn.
Sýningin verður opnuð að lokinni
guðsþjónustu í Seltjarnarneskirkju
29. ágúst kl. 11.00. Biskup Íslands,
sr. Agnes M. Sigurðardóttir,
prédikar í guðsþjónustunni, en
sóknarpresturinn sr. Bjarni Þór
Bjarnason, þjónar fyrir altari.
Organisti er Friðrik Vignir
Stefánsson og kór kirkjunnar syngur.
Sýningin verður opnuð formlega að
lokinni guðsþjónustunni og boðið
verður upp á hressingu.
Sigrún Jónsdóttir, kirkjulistakona,
fæddist í Vík í Mýrdal 19. ágúst 1921.
Hún lést 22. nóvember 2001.
Foreldrar hennar voru hjónin Jón
Jónsson, silfur- og málmsmiður,
og Guðný Þorgerður Þorgilsdóttir,
starfskona hjá Alþingi. Snemma komu
í ljós listrænir hannyrðahæfileikar
Sigrúnar sem hún lagði rækt við
og gerðu hana að þeirri listakonu
sem nú er minnst með virðingu.
Hún fluttist með foreldrum sínum
til Reykjavíkur og hóf nám í
Kvennaskólanum og lauk því 1939.
Nokkru síðar tók hún að sækja
námskeið í saumum og handavinnu,
ýmist hjá einkakennurum eða í
Handíða- og myndlistaskólanum.
Sigrún lauk handavinnukennaraprófi
frá Kennaraskóla Íslands 1947.
Hún hélt utan til Gautaborgar til
frekara listnáms. Sigrún útskrifaðist
sem meistari úr textíldeild
Slöjdföreningens-skóla eftir tíu
ára nám og starf að listgreininni
í Gautaborg. Sigrún kynnti fyrir
Íslendingum ævaforna listgrein,
batik. Batikskermar og batikdúkar
sem hún gerði nutu mikilla vinsælda.
Sýningar á kirkjulist hennar
voru haldnar hér heima og í
Bandaríkjunum.
Segja má að hún sé með fyrstu
kirkjulistakonum Íslendinga og
er líklega mikilvirkust þeirra allra
í kirkjulist þar sem vefnaður og
saumur koma við sögu.
Höklar, stólur, stólsáklæði
á prédikunarstól og
altarisklæði
Sigrún vann fjölda ofinna og
saumaðra kirkjulistaverka fyrir
kirkjur víðs vegar út um land sem og
í útlöndum. Þessi verk kallast höklar,
stólur, stólsáklæði á prédikunarstóli
og altarisklæði. Því síðastnefnda
er sveipað utan um altari í kirkjum
eða altarisbrúnina. Verkin eru
ætíð prýdd með fornum kirkju- og
guðfræðilegum táknum.
Hún lét líka til sína taka á öðrum
menningar- og minjasviðum svo
um munaði. Það var að frumkvæði
hennar að eikarskipið Skaftfellingur
var flutt til Víkur í Mýrdal frá
Vestmannaeyjum fyrir rúmum
tuttugu árum. Skaftfellingur var á
æskuárum hennar líftaug íbúanna í
Vík. Sigrún var öflug kona og alla tíð
trú sínu listræna þjónustuhlutverki.
Sýning á list Sigrúnar stendur yfir í
mánuð og er aðgangur ókeypis.
HSH.
10 Nesfrétt ir
Kirkjulistakonu
minnst
Sýning á verkum Sigrúnar Jónsdóttur
í SeltjarnarneskirkjuHraðavaraskilti
við Lindarbraut
Hraðavaraskilti er komið við Lindarbraut á Seltjarnarnesi þar sem
hámarkshraði er nú 40 kílómetrar á klukkustund.
Almennum hraðaskiltum hefur verið breytt í kjölfar lækkunar hámarkshraða
úr 50 kílómetra hraða í 40 til að auka umferðaröryggi vegfarenda um
Lindarbraut samkvæmt staðfestingu bæjarstjórnar í vor. Að auki voru
nýverið sett upp tvö hraðavaraskilti í sitthvora akstursstefnuna á götunni
sem benda ökumönnum á hraðann sem þeir aka á. Íbúar hafa lýst ánægju
sinni með breytinguna og er vonast til að hún dragi markvisst úr hraðanum
á Lindarbrautinni sem er fjölfarin gata og mikið um börn og ungmenni á leið
til og frá skóla.
Frá Lindarbraut þar sem hraðavaraskilti hefur verið komið upp.