Morgunblaðið - 01.11.2022, Blaðsíða 29

MENNING 29
MORGUNBLAÐIÐ ÞRIÐJUDAGUR 1. NÓVEMBER 2022
Nánari upplýsingar um sýningartíma á sambio.is
TRYGGÐU ÞÉR
MIÐA INNÁ
Indie wire
KEMUR Í BÍÓ 11. NÓVEMBER - FORSALA HAFIN
88%
Tímar tröllanna í Bíó Paradís
Heimildarmynd Ásdísar
Thoroddsen, Tímar tröllanna,
verður frumsýnd boðsgestum
í kvöld í Bíó Paradís og hefjast
almennar sýningar á myndinni á
morgun, 2. nóvember.
„Tröllin í fjöllunum, tröllin í
okkur sjálfum. Tröll hafa fylgt
mannkyni í goðsögum og raun-
verulegri sögu, allt eftir því hvaða
skilningur var settur í orðið á
hverjum tíma. Tröllin eru hluti
af íslenskri menningu og birtast
í rituðum sögum, lagabókum og
munnlegum arfi. Sögulega séð
hafa tröllin staðið fyrir fólk sem
stendur utan samfélagsins og
er því hættulegt eða er innan
vébanda þess, en sýnir andfélags-
lega hegðun. Þá tákna tröllin líka
ógnir þær sem að okkur steðja og
eru oft handan skilnings okkar,“
segir um myndina í tilkynningu
en myndin verður sýnd til skiptis
textalaus og með enskum texta.
Sýningartíma má finna á vef
kvikmyndahússins, bioparadis.is.
Tröll Úr heimildarmynd Ásdísar
Thoroddsen, Tímum tröllanna.
Opinn samlestur í Borgarleikhúsinu
Í Borgarleikhúsinu verður í dag, þriðjudag, kl. 13
boðið upp á opinn samlestur á Mátulegum, sviðsút-
gáfu sögunnar sem fyrst birtist í kvikmyndinni Druk
eftir danska leikstjórann Thomas Vinterberg. Lesið
verður í forsal leikhússins en frumsýnt verður 30.
desember. Brynhildur Guðjónsdóttir leikhússtjóri
leikstýrir og leikarar eru þeir Hilmir Snær Guðna-
son, Þorsteinn Bachmann, Halldór Gylfason og
Jörundur Ragnarsson.
Í Mátulegum ákveða fjórir menntaskólakennar-
ar á miðjum aldri að gera tilraun til að sannreyna
kenninguna um að manneskjan sé fædd með of lítið
áfengismagn í blóðinu – þeir eru lífsleiðir, staðnaðir í starfi og á góðri
leið með að sigla einkalífinu í strand. Tilraunin kemur til með að hafa
mikil áhrif á fjórmenningana, starf sem einkalíf. Kvikmyndin hefur
verið umtöluð og hlotið fjölda verðlauna víða um lönd. Kaffi verður í
boði og hægt er að panta veitingar.
Brynhildur
Guðjónsdóttir
Kvöldstund með Maríu Markan
Í vetur mun Listasafn Sigurjóns
Ólafssonar standa fyrir tón-
leikum, flutningi hljóðrita og
kynningum á sögulegu efni í sal
safnsins á Laugarnesi. Síðastliðið
þriðjudagskvöld fjölluðu Trausti
Jónsson og Hreinn Vilhjálmsson
um söngkonuna Maríu Markan,
þau systkini hennar sem þekkt
voru af sönghæfileikum sínum
og leiknar voru upptökur með
söng og tónverkum þeirra, sýnd-
ar myndir og sagt frá æviferli
þeirra. Í kvöld munu Trausti
og Hreinn hins vegar fjalla um
Maríu eina og leiknar verða upp-
tökur með söng hennar.
María nam söng í Þýskalandi
og starfaði þar fram að seinni
heimsstyrjöld. Þaðan hélt hún til
Bandaríkjanna og starfaði m.a.
við Metropolitan-óperuna í New
York. Eftir hana liggja margar
upptökur, bæði útgefnar á plötum
og í fórum Ríkisútvarpsins.
MerkMaría Markan verður til umfjöll-
unar í Listasafni Sigurjóns í kvöld.
Í tilefni af tónlistarhátíðinni Iceland
Airwaves verður haldin sérstök
bransaveisla fyrir íslenska tón-
listarbransann í dag og á morgun.
ÚTÓN, STEF og Tónlistarborg
Reykjavíkur með stuðningi frá Ís-
landsstofu standa að dagskránni en
þetta er í annað
sinn sem þessir
bransadagar eru
haldnir.
Markmiðið
með bransa-
veislu segir
Sigtryggur
Baldursson fram-
kvæmdastjóri
ÚTÓN vera að
„auka alþjóðleg
viðskipti með íslenska tónlist, hjálpa
fólki með sinn feril út fyrir land-
steinana og koma íslenskri tónlist í
umferð sem víðast“.
Á þessari viðburðadagskrá gefst
íslensku tónlistarfólki tækifæri til
þess að kynnast erlendu fagfólki í
tónlistarbransanum sem er komið
hingað til lands til þess að taka þátt
í ráðstefnu Airwaves og tónlist-
arhátíðinni sjálfri. Sigtryggur segir
að um sé að ræða fólk sem sinnir
ýmsum störfum innan bransans, t.d.
umboðsmenn, útgefendur, fjölmiðla-
menn og tónlistarforleggjarar. Á
morgun, 2. nóvember, verður boðið
upp á sérstaka tengslamyndunar-
fundi þar sem sækja má um stutta
fundi með þessu fólki.
Boðið verður upp á námskeið í
umboðsmennsku með Ali Raymond,
umboðsmanni Arlo Parks, og tónlist-
arstjórnun með Steven Tallamy,
stofnanda WiseMusicGroup á
Íslandi. Þá verða haldnar nokkrar
vinnustofur á Kex hosteli. Á einni
þeirra verður fjallað um útgáfu á
tónlist fyrir sjálfstætt starfandi
tónlistarfólk og á annarri um það
að vera sinn eigin umboðsmaður. Þá
mun Lewis Jamieson sjá um vinnu-
stofu um það hvernig tónlistarbrans-
inn getur tekist á við loftslagsvána.
Skipulagðar hafa verið pall-
borðsumræður þar sem fjallað
verður um störf tónlistarforleggjara,
þ.e. einkarekinna höfundarréttar-
fyrirtækja sem vinna að því að
auka tekjur tónhöfunda. Þrjú
slík fyrirtæki starfa nú á Íslandi.
Þátttakendur í pallborðinu verða
þau Colm O’Herlihy frá INNI
Music, Brynja Guðmundsdóttir frá
Iceland Sync og Steven Tallamy frá
WiseMusicGroup. Samtalinu stýrir
Christiana Sudano sem hefur unnið
hjá stórum tónlistarforleggjara í
Bandaríkjunum. Viðburðurinn fer
fram á Kex hosteli á morgun kl.
16.30.
Eins og áður sagði eru margir
þessara erlendu gesta komnir
til landsins til þess að taka þátt í
ráðstefnu Iceland Airwaves sem og
hátíðinni sjálfri. Ráðstefnan verður
haldin 3. og 4. nóvember. Þar verður
m.a. fjallað um sameiningarkraft
tónlistar á stormasömum tímum.
ragnheidurb@mbl.is
lNámskeið, vinnustofur og pallborð í bransaveislu
Tækifæri til að kynnast
erlendu fagfólki
Sigtryggur
Baldursson
Tónlist Bransaveisla er haldin dagana á undan Airwaves. Myndin er af Valborgu Ólafs frá hátíðinni 2019.
Morgunblaðið/Eggert