Morgunblaðið - 27.08.2022, Page 8

Brýnt er að sjómenn æfi rétta notkun fallvarnabúnaðar.
Ásgeir Ingvarsson
ai@mbl.is
S
tarfsemi Ísfells heldur
áfram að vaxa og dafna
en félagið er fyrir löngu
orðið umsvifamikið í
hönnun og framleiðslu
neta, tóga og annars búnaðar fyrir
fiskeldi. Er mikil áhersla lögð á
vöruþróun hjá Ísfelli og reglulega
líta nýjungar dagsins ljós. Auk þess
að selja eigin vörur flytur Ísfell inn
m.a. björgunar- og öryggisvörur,
rekstrarvörur, hífibúnað og veiði-
búnað.
Erna Kristjánsdóttir tók nýlega
við starfi markaðsstjóra hjá félag-
inu en hún er með MPM-gráðu frá
Háskólanum í Reykjavík og lauk á
sínum tíma bóklegu námskeiði í
skipstjórn smáskipa hjá Tækni-
skólanum. Áður starfaði Erna hjá
Faxaflóahöfnum og Cruise Iceland.
Hún segir að um þessar mundir
snúist vöruþróunin hjá Ísfelli m.a.
um að gera sterkari net fyrir fisk-
eldiskvíar en Sigurður H. Stein-
þórsson er deildarstjóri fiskeldis
hjá fyrirtækinu og stýrir þróunar-
verkefnum Ísfells á þessu sviði.
Ný gerð af netum fyrir kvíar
hefur bæði kosti og ókosti
Fiskeldisstöðvar eru að færa sig úr
næloni og yfir í önnur efni, s.s.
pólýetilín, sem er léttara og sterk-
ara og þolir betur róbótastýrðan
háþrýstiþvott. Er mikilvægt er að
halda netunum í kvíunum hreinum
svo að slý og sjávargróður – jafnvel
kræklingur – safnist ekki upp og
skerði flæði súrefnis og næringar-
efna. Ef netin eru ekki hreinsuð
reglulega safnast gróðurinn upp og
lokar hægt og rólega möskvunum.
Hafa nælonnetin verið meðhöndluð
með efnum, sem eiga að varna því
að gróðurinn komi sér fyrir, en
þessi efni innihalda kopar og losna
smám saman úr netinu og út í sjó-
inn, og þykja áhrifin ekki æskileg
fyrir umhverfið.
Sjávargróðurinn safnast ekki svo
glatt upp á pólýetilín-netum og tek-
ur langan tíma þangað til þau láta á
sjá vegna þvotta. Hins vegar eru
þau stífari og því ögn erfiðari í
meðförum. „Þá er pólýetilín eðlis-
léttara en vatn og því þarf að
þyngja netin, á meðan nælonnet
draga í sig sjó sem þyngir þau.
Netapokar úr pólýetilíni hafa síðan
líka meiri vatnsmótstöðu svo að
nota þarf öflugri búnað til að halda
netunum á sínum stað. Þessari nýju
gerð neta fyrir fiskeldi fylgja því
bæði kostir og ókostir.“
Vilja vera snör í snúningum
Um fimmtíu manns starfa í dag hjá
Ísfelli en fyrirtækið var stofnað ár-
ið 1992 og fagnar því 30 ára afmæli
í ár. Að stofnun fyrirtækisins stóðu
félagarnir Pétur Björnsson, Hólm-
steinn Björnsson, Páll Gestsson og
Jón Leósson. Sá síðastnefndi sagði
fljótlega skilið við reksturinn og
lengi vel voru starfsmenn félagsins
aðeins þrír. Starfsemin var aðallega
fólgin í innflutningi á veiðarfærum
og efnum til veiðarfæragerðar.
Fylgdu stofnendurnir fyrirtækinu
lengi: Hólmsteinn var fram-
kvæmdastjóri þess í nítján ár og
Páll sölustjóri allt fram til ársins
2004 en Pétur tók að sér að vera
formaður stjórnar og gegnir því
hlutverki enn þann dag í dag. Guð-
bjartur Þórarinsson er nú fram-
kvæmdastjóri félagsins og starfs-
stöðvarnar átta talsins, hringinn í
kringum landið.
„Við leggjum mikla áherslu á
þjónustu í heimabyggð og að geta
afgreitt allt vöruúrval Ísfells sam-
dægurs. Þá hefur fyrirtækið lagt
sig fram við að tileinka sér fljótt
allar nýjungar í hönnun veiðarfæra
með það fyrir augum að gera þau
létt í drætti, sterkbyggð og með
góða endingu, og þannig hámarka
veiðigetu skipa,“ segir Erna. „Felst
þjónusta félagsins ekki hvað síst í
gæðavörum, áreiðanleika, og fram-
úrskarandi hópi starfsfólks sem býr
að víðtækri þekkingu á sviði veiðar-
færa, rekstrarvara og öryggis-
mála.“
Öryggisbúnaður er ein af stoðun-
um í rekstri Ísfells og segir Erna
ánægjulegt að sjá hve rík öryggis-
vitundin er hjá íslenskum sjávar-
útvegsfyrirtækjum. „Öryggismálin
eru það fyrsta sem allir sjófarendur
þurfa að huga að en Ísfell á í sam-
starfi við skoðunarstöðvar björgun-
arbúnaðar víðs vegar um landið.
Allar þessar stöðvar eru viður-
kenndar bæði af Siglingamálastofn-
un og framleiðendum björgunar-
búnaðarins.“
Rétt vinnubrögð við hífingar og
rétt notkun fallvarnarbúnaðar
skipta sköpum þegar unnið er í og
við skip. Erna segir að hluti af auk-
inni öryggismenningu sé að fyrir-
tæki gæta þess æ betur að senda
starfsmenn sína á hífi- og fallvarn-
arnámskeið sem Ísfell stendur
reglulega fyrir. „Þar er farið yfir
notkun og meðhöndlun hífi- og fall-
varnarbúnaðar með það fyrir aug-
um að draga úr slysahættu og
tryggja að búnaðurinn endist sem
lengst. Ísfell er eina fyrirtækið hér
á landi sem á aðild að LEEA sem
eru alþjóðasamtök fyrirtækja í
lyftitæknigeiranum. Auk þess að
sérhæfa okkur í sölu á hífi- og fall-
varnarbúnaði höfum við leyfi til að
skoða búnaðinn, líkt og skylt er að
gera, a.m.k. einu sinni á ári.“
Á 30 ára afmæli fyrirtækisins var
ráðist í umfangsmikla stefnumótun-
arvinnu og segir Erna að meðal
þeirra verkefna sem séu framundan
sé að færa fyrirtækið nær við-
skiptavinum með öflugu markaðs-
starfi. Þar kemur til kasta Ernu en
hún vinnur að því að uppfæra
markaðsefni félagsins og merki. Þá
fer ný heimasíða í loftið áður en
langt um líður. „Við viljum líka
færa okkur nær almenningi og ætl-
um m.a. að gera það með því að
vera virk á samfélagsmiðlum, og þá
einkum á Facebook, Instagram og
LinkedIn. Þar munum við sýna bet-
ur þær vörur sem við seljum og þá
starfsemi sem á sér stað innan
fyrirtækisins og það er vonandi að
fólk hafi gaman af að sjá hvað er að
gerast á bak við tjöldin.“
Sjóeldið segir skilið við nælonnetin
Ný gerð neta fyrir
sjókvíar er að ryðja sér
til rúms. Gert til þess að
ekki þurfi lengur að
húða netin með málm-
blönduðum efnum sem
hamla vexti sjávargróð-
urs. Til stendur að gera
Ísfell sýnilegra á sam-
félagsmiðlum
Morgunblaðið/Hákon
Eitt af verkefnum Ernu Kristjánsdóttur verður að virkja samfélagsmiðla og sýna fólki á bak við tjöldin.
Ísfell hefur lagt mikinn metnað í að þróa veiðarfæri með það fyrir augum að gera veiðar skilvirkari og fara betur með aflann, t.d. með hnútalausum netum.
Einn vandi við eldi í sjó er að sjávargróður sest á netin og getur smám saman lokað möskvunum. Nælonnetin hafa verið varin með efnum sem eru á útleið.
8 MORGUNBLAÐIÐ LAUGARDAGUR 27. ÁGÚST 2022