Skessuhorn - 23.11.2022, Side 26

MIÐVIKUDAGUR 23. NÓVEMBER 202226
Vísnahorn
Það er nú einhvern veginn þannig að fólk getur
búið saman um áraraðir í þokkalegu samkomu­
lagi þó það sé ósammála í pólitík. Sérstak­
lega reyndar ef það er ekki stöðugt að troða
skoðunum sínum uppá aðra. Vissulega kemur
matarástin líka til hjálpar í mörgum tilfellum
og það ég best veit er það Valborg Bentsdóttir
sem er höfundur þessarar ágætu stöku:
Gleymast flokka gömul rök.
Gleðin okkar verður
og þinn plokkfisk eldar spök
eyrnalokkagerður.
Nærri síðustu jólum fréttist af því að sá merki
lögmaður Sveinn Andri Sveinsson hefði setið
að snæðingi suður í Dubai og fengið þar
gullhúðaða steik í kvöldskattinn. Um þessa
atburði kvað Jón Jens Kristjánsson:
Sveini tekst að safna fé
og sitja í óhófsranni
en ekki fréttist að hann sé
orðinn gull af manni.
Þá er það þessi spurning um vorn innri
fegurðar auka. Hvort gullát hefur þar jákvæð
áhrif. Friðrik Steingrímsson gekk framhjá
spegli og varð að orði:
Spegilmyndin segir sitt,
sífellt meir ég grána.
Ekki virðist útlit mitt
ætla neitt að skána.
Hallmundur Kristinsson gaf honum hins­
vegar þessi góðu og vel meintu ráð:
Einhverntíma lærði ég það á Laugum
að labba króka til að forðast gjótur.
Hverju sinni er ég lít hann augum
undrast ég hve spegillinn er ljótur.
Það er samt tryggara að fara að öllu með gát á
þeim krókaleiðum sem nauðsynlegar eru eigi
að forðast allar gjótur lífsins, enda sagði Frið­
rik Jónsson landpóstur:
Með sér ætíð blessun ber,
bætta lætur trega
að hafa fætur fyrir sér
og fara gætilega.
Og um annan mann af öðru tilefni sagði Lúð­
vík Rúdolf Stefánsson Kemp Illugastaðabóndi:
Gerði hvatur seggur sá
sífellt at í konum.
Flest að rata óhöpp á
aldrei fatast honum.
Lúðvík Kemp var örugglega nokkuð flók­
inn persónuleiki á sinni tíð. Á margan hátt
fjölgreindur maður en ölkær í góðu meðal­
lagi, prýðilega hagmæltur en níðskældinn
svo hefði sloppið með minna. Vegaverkstjóri
um árabil og lagði meðal annars veginn yfir
Siglufjarðarskarð sem var í sjálfu sér stórafrek
á þeim tíma. Sjálfum sér lýsti hann svo:
Að mér sækir andlegt slen
umsetinn af djöflum.
En ég er eins og Jóa Ben.
-Jesúbarn á köflum.
Flest verðum við fyrir umtali heimsins með
einhverjum hætti. Tökum það vissulega
misnærri okkur enda svosem umtalið mis­
jafnt. Gunnþórunn Sveinsdóttir hafði þetta
að segja:
Ef það gleður anda minn
enn skal fjúka staka.
Þótt hnútum kasti heimurinn
hendi ég þeim til baka.
Það var aftur á móti Ingólfur okkar Ómar sem
sagði:
Viltu tendra vonarbál,
veittu styrk þeim hrjáða,
leggðu rækt við líf og sál
og láttu hjartað ráða.
Einhvern veginn virðist mér að hvar sem menn
telja sig í pólitík séu þeir þó sammála um að
bæði samgöngumál og heilbrigðismál séu
langfjársveltir málaflokkar. Hitt er svo annað
hverjum það er að kenna. (Örugglega ekki
mínum stjórnmálaflokki). Held ég fari rétt
með að Jón Gunnarsson hafi verið samgöngu­
ráðherra þegar Hjálmar Freysteinsson kvað:
Í vegina alltaf vantar fé,
veldur það mörgu tjóni
og ekki er nú hægt að segja að sé
samgöngubót að Jóni.
Jóhannes í Syðra­Langholti heyrði sagt frá
bílveltu með þeim orðum að „það var happ að
engin slapp ómeiddur“ og tók saman ræðuna
með þessum árangri:
Við beygju krappa, brak og stapp
bíllinn fór í klessu.
En það happ að engin slapp
ómeiddur úr þessu.
Þó samgöngurnar séu svosem alltaf heldur
að skána, allavega frá einhverju sjónarhorni,
finnst nú mörgum sem sá bati gangi frekar
hægt. Þó eru þær nauðsynlegar ef menn eiga
að hafa möguleika á að hittast og gleðjast og
„sitja um stund saman, við sumbl og gaman“
eins og skáldið kvað. Hvort sem þeir atburðir
gerast í samkomu­ eða heimahúsum. Markús
á Borgareyrum lýsti ánægjulegu kvöldi svo:
Mér hefur gleði vínið veitt
vinir kærir svo því haga
að kvöldinu hef ég ekki eytt
en á það meðal bjartra daga.
Það hefur reynst mörgum snúið að finna
hinn eina rétta förunaut í lífinu og tekst ekki
alltaf í fyrstu tilraun. Ekki einu sinni alltaf í
annarri segja sumir en allavega hafði Markús
þetta að segja:
Þó makar tíðum liggi á lausu
löngum bregst hinn rétta að finna
svo margir hinna makalausu
maka sig á kostnað hinna.
Svo er það þetta með staðsetningu ástarinnar.
Það er nú eitt vandamálið og æskilegt að báðir
aðilar séu sammála þar um eins og reyndar
margt fleira. Jón Bjarnason í Garðsvík lagði
þetta til mála:
Drýgði hvorki dáð né synd,
dáður lítt af konum,
öll var fyrir ofan þind
ástleitnin hjá honum
Séra Helgi Sveinsson hafði aftur á móti þessa
skoðun á málunum:
Illum hrolli um þig slær
áður en nóttin líður,
þegar ástin aðeins nær
upp á miðjar síður.
Og Hjörleifur Jónsson á Gilsbakka tók í líkan
streng:
Margir hæla ást um of,
ýmsum var hún byrði.
Nái hún aðeins upp í klof
er hún lítils virði.
Með þökk fyrir lesturinn,
Dagbjartur Dagbjartsson
Hrísum, 320 Reykholt
S 435 1189 og 849 2715
dd@simnet.is
Flest að rata óhöpp á — aldrei fatast honum
Á þriðjudaginn í liðinni viku fór
Bæjarstjórnarfundur unga fólks­
ins fram á Akranesi. Þetta var í 21.
skipti sem fundur af þessu tagi er
haldinn. Fyrirkomulagið er þannig
að settur er upp fundur í bæjar­
þingsalnum þar sem almennir
bæjar fulltrúar og embættismenn
koma sér fyrir líkt og á venju­
bundum fundum í bæjar stjórn, en
auk þeirra fulltrúar íþrótta,­ tóm­
stunda­ og skóla félaga í bænum
sem sæti eiga í Ungmennaráði
Akraness. Fundurinn var öllum
opinn og einnig var hægt að fylgj­
ast með beinni útsendingu á síðu
Akranes kaupstaðar.
Ungmennin héldu framsögu­
erindi og síðan svöruðu bæjarfull­
trúar spurningum þeirra. Ung­
mennaráð er skipað níu fulltrúum
nemendafélaga grunnskólanna,
nemendafélags FVA, Tónlistar­
skóla Akraness, fulltrúa ÍA og full­
trúum félagsmiðstöðvanna tveggja
þ.e. Arnardals og Hvíta hússins.
Blaðamaður Skessuhorns fylgdist
með framsöguræðum unga fólksins
sem valið höfðu sér ólík þema til
umfjöllunar. Þau héldu öll áhuga­
verðar ræður og ekki er ofsögum
sagt að þau komu afar vel fyrir.
Tveir sögulegir atburðir áttu sér
stað á þessum fundi. Annars vegar
sátu saman fundinn þeir Davíð
Logi Heiðarsson og Einar Brands­
son, en Davíð er barnabarn Einars.
Hinsvegar varð Líf Lárusdóttir
sú fyrsta í sögunni til þess að sitja
bæjar stjórnarfund unga fólksins
sem fulltrúi ungmennaráðs árið
2006 en hún var kjörin í bæjar­
stjórn síðastliðið vor og er nú for­
maður bæjarráðs.
mm
Bæjarstjórn unga fólksins kom saman
Sóley Brynjarsdóttir flytur hér erindi sitt á fundinum. Ljósm. mm Valgarður Lyngdal Jónsson forseti bæjarstjórnar stýrði fundi. Ljósm. mm.
Bæjarfulltrúar ásamt gestum
frá Ungmennaráði Akraness.
Ljósm. Þorpið frístundamiðstöð.