Fréttir - Eyjafréttir - 24.02.2022, Side 4

4 | | 24. febrúar 2022
Frysting gengur vel
„Það er bara bræla,“ var það
fyrsta sem Sindri Viðarsson hjá
Vinnslustöðinni hafði til málanna
að leggja þegar við ræddum við
hann á þriðjudaginn. „Annars
hefur fram að þessu óveðri gengið
ágætlega hjá okkur. Við erum bún-
ir að vera að frysta nær óslitið frá
því á föstudaginn fyrir rúmri viku.
Þetta veður sem er að ganga yfir
núna hefur sett strik í reikninginn.
Frystingin er að slitna núna í
fyrsta skiptið af því að Ísleifur
kemst ekki til Eyja, en hann liggur
í vari við Reykjanes eins og fleiri
bátar. Við erum að vonast til að
hann komist til Eyja í kvöld eða
nótt. Síðan er verið að skammta
okkur rafmagn núna sem gerir
þetta allt aðeins erfiðara.“
Hjá Vinnslustöðinni eru kom-
in á land rúm 40 þúsund tonn.
„Stærstur hluti hefur farið í
bræðslu en við erum búin að
frysta um 4000 tonn. Þetta hefur
verið gott hráefni og það sem við
erum að frysta núna hefur verið
með um 16% hrognafyllingu
og loðnan hefur verið í síðustu
skömmtum svona 16-18 prósent.
Það sem Ísleifur er að koma með
er að nálgast 19% og þá fer að
styttast í að hægt verði að fara
að kreista.“ Sindri segir hráefnið
vera mismunandi enda sé veiðin
að koma af mismunandi svæðum.
„Stór hluti af flotanum var fyrir
vestan land, við Reykjanes og inn
á Faxaflóa, og var að fá ágætis
afla. Kapin hefur verið við Eyjar
og þar var þokkaleg loðna. Norð-
menn eru enn að fiska fyrir austan
land þannig að loðnan virðist
vera mjög dreifð. Hvergi stóra
gangan, en víða kropp.“ Hvenær
reiknar þú með að hægt verði að
fara að kreista í hrogn? „Það er
stór spurning. Það fer náttúrulega
allt eftir þroska loðnunnar og
hrognanna. Hún fer ekkert að losa
hrognasekkinn fyrr en fyllingin er
komin upp í 21-22%. Ég er búinn
að segja það alla vertíðina að við
getum farið að pæla í þessu fyrstu
vikuna í mars og ég ætla að halda
mig við það. Það er alveg jafn
vitlaust eins og hvað annað.“
Þegar talið barst að söluhorfum
fyrir afurðir þá var Sindri nokkuð
brattur. „Við getum ekkert annað
en verið bjartsýnir á sölu en það
er bara allt í vinnslu. Eins og
venjulega þá skýrist þetta ekkert
endanlega fyrr en eftir vertíð en
það er tilefni til bjartsýni,“ sagði
Sindri kátur að lokum.
Fínasta Japans loðna
Eyþór Harðarson hjá Ísfélaginu
hóf samtalið á mjög svipuðum
nótum og Sindri. „Það er bara
bræla á þessu og þrír bátar hjá
okkur í skjóli við Reykjanes að
bíða eftir að komast með loðnu
til frystingar í Eyjum, vonandi
hefst það í kvöld.“ Þar á bæ er
búið að frysta rúm 2000 tonn af
þeim rúmu 67 þúsund tonnum sem
skip Ísfélagsins hafa komið með
að landi. „Þetta hefur verið fín
Japans-loðna sem við höfum náð
að frysta núna nær óslitið í rúma
viku. Það er bara þessi bræla núna
sem er að stoppa okkur af. Nú er
bara beðið eftir næsta skammti.
Við höldum líklega áfram að
frysta hrygnu til mánaðamóta og
þá getum við farið að taka hrogn.“
Eyþór segir hráefnið hafa verið
gott sem skipin hafi verið að koma
með. „Aflinn sem skipin eru að
reyna að koma heim núna er góður
og er hrognafylling að nálgast
20%. Þá fer að styttast í að það
fari að losna í hrygnunni og þá fer
hrognavinnslan af stað.“ Hjá Ís-
félaginu stendur ekki til að frysta
hæng. „Það er mikil óvissa með
sölu á honum eins og ástandið
er núna en aftur á móti eru mjög
góðar söluhorfur í mjöli og því
eðlilegra að kallinn endi þar.“
Þegar talið barst að söluhorfum
almennt á loðnuafurðum var Ey-
þór nokkuð brattur. „Það er bara
eins og menn hafa sagt áður þetta
lítur ágætlega út en það er annarra
að svara því betur en menn eru
bara bjartsýnir. Það er alla vega
eitthvað eftir af þessari vertíð,“
sagði Eyþór að endingu.
Alltaf nóg að gera
Arnar Richardsson hjá Berg-
Huginn var ekki að æsa sig þegar
við ræddum við hann á þriðju-
dag. „Það er bara búið að vera
ágætt hjá okkur. Bergey fór út á
fimmtudaginn og landaði í gær og
svo fara þeir aftur út á fimmtu-
dag. Þetta var mest þorskur, ýsa
og koli hjá þeim sem þeir fengu
Lónsbugtinni og á Pétursey.“ Það
var ekki hægt að sleppa Arnari án
þess að ræða fasta liði og spyrja
frétta af Vestmannaey VE. „Það
eru allir varahlutir komnir til
landsins og það er verið að mála
og klára eitt og annað. Það ætti allt
að vera klárt hjá okkur eftir um tíu
daga eða svo.“ Aðspurður um það
hvernig markaðsmálin stæðu nú
þegar afléttingar væru komnar á
fullt úti í Evrópu sagði Arnar mál-
in ekki vera alveg svo einföld. „Nú
erum við komin á þann árstíma
sem mikil veiði er við Noreg og
þeir moka inn á markaðina með
tilheyrandi áhrifum á verðið. En
það er nóg fram undan hjá okkur,
Gullver er að fara í togararallið og
þá þurfum við að skaffa vinnsl-
unni fyrir austan fisk þannig að
það er alltaf nóg að gera.
SJÁVARÚTVEGURINN
Brælur og bullandi vertíð