Fréttir - Eyjafréttir - 24.02.2022, Qupperneq 9

24. febrúar 2022 | | 9
Hlynur Andrésson er lang-
hlaupari ársins 2021 að mati
hlaupara og lesenda hlaup.is.
Verðlaunin voru afhent í þrett-
ánda skiptið sunnudaginn, 13.
febrúar. Hlynur hlýtur þennan
titil í annað skiptið. Kosið var á
milli sex hlaupara í karlaflokki.
Hlynur Andrésson flutti nýlega
til Ítalíu frá Hollandi og æfir
þar undir leiðsögn eins fræg-
asta og besta langhlaupara
Ítalíu, Stefano Baldini, en hann
vann Ólympíugull í maraþoni
2004. Hlynur er Eyjamaðurinn í
blaði Eyjafrétta að þessu sinni,
við ræddum við Hlyn um flutn-
inginn og komandi verkefni.
Hlynur segir flutninginn hafa
átt sér nokkuð langan að-
draganda. „Eftir að hafa keppt
í Bretlandi í 10,000m hlaupi
á braut, bætt Íslandsmetið
mitt og endað í öðru sæti þar,
bauðst mér að flytja til Ítalíu
og æfa undir einum af mínum
hetjum í sportinu, Stefano
Baldini, sem vann Ólympíuleik-
ana í maraþoni árið 2004 í
Aþenu. Ég hafði búið í Hollandi
í 3 ár og verið þar með banda-
rískri/hollenskri stelpu, en
þar sem við hættum saman
í byrjun árs 2021, þá vildi ég
prófa að flytja heim til Íslands
og sjá hvort ég gæti búið þar
og æft á sama stigi og ég hafði
verið að gera í Hollandi. Eftir
nokkrar vikur sá ég að það var
ekki hægt þannig að ég ákvað
að prófa að æfa með hópnum
hans Baldini á Ítalíu í nokkrar
vikur og mér leist svo vel á
staðinn og hópinn að ég ákvað
bara að kýla á það og flytja.“
Hann segist vera ánægður með
lífið á Ítalíu svona við fyrstu
sýn. „Mér líst mjög vel á þetta,
en að sjálfsögðu er ekkert land
án vandamála. Héraðið sem ég
bý í heitir Emilia-Romagna, það
er mjög veðursælt þar og full-
komið fyrir hlaupara til þess að
æfa allan ársins hring, nema
kannski á sumrin þegar hitinn
er kominn upp í 35 gráður,
en þá munum við færa okkur
upp í ítölsku Alpana.“ Hér-
aðið er ekki bara hentugt fyrir
hlaupara því Emilia-Romagna
er líka þekkt fyrir góða matar-
gerð. „Héðan eru t.d. parma
skinka, parmesan ostur, tortelli
og lambrusco allt frá þessum
stað. Svo er ítalskan að mínu
mati fallegasta tungumál
heims og mig hefur alltaf lang-
að til þess að læra hana síðan
ég sá kvikmyndina Inglourious
Basterds eftir Tarantino. Það er
hinsvegar ekki hægt að redda
sér á ensku hérna þar sem
ég bý, þannig þú ert svolítið
í djúpu lauginni þegar kemur
að samskiptum við almenning.
Svo gerast hlutirnir einnig rosa
hægt hérna; t.d. keypti ég
mér bíl um daginn og það ferli
tók næstum 4 mánuði og ansi
mikla þolinmæði.“
Hlynur segir að um frábært
tækifæri sé að ræða fyrir sig.
„Það sem ég sé í þessu er
aðallega að verða eins góður
íþróttamaður og ég mögulega
get. Ég held að ég eigi töluvert
meiri séns á að ná markmiðun-
um mínum hérna með Baldini
sem þjálfara og æfingafélaga
sem eru á mínu getustigi. Svo
má kannski bæta því við að ég
mun læra mitt fjórða tungumál
og virkilega kynnast ítölsku
menningunni.“
Hvað er næst á dagskrá hjá
þér? „Allur fókusinn núna er
á Evrópumeistaramótinu í
frjálsum, sem verður haldið í
Munchen, Þýskalandi í enda
ágúst. Svo er Heimsmeist-
aramótið í hálfmaraþoni um
miðjan nóvember og atlaga
að Ólympíulágmarki stuttu
seinna.“
Nafn: Hlynur Andrésson
Fæðingardagur: 16. september,
1993
Fæðingarstaður: Landspítalinn,
Reykjavík.
Fjölskylda: Addi Steini, Ása og
Egill.
Uppáhalds vefsíða: letsrun.com
Aðaláhugamál: Frjálsar,
körfubolti, bókmenntir,
kvikmyndir og tungumál.
Uppáhalds app: Spotify
Uppáhalds hlaðvarp: Hef
verið hlusta svolítið á Italiano
Automatico og það hefur verið
mér mjög hjálpsamt með að læra
ítölskuna.
Uppáhalds matur: Sólþurrkaður
saltfiskur með kartöflum, rófum og
hamsatólg.
Versti matur: Rósakál
Hvað óttastu: Eftirsjá
Mottó í lífinu: Fylgdu hjartanu.
Hvaða mann/konu myndir þú
vilja hitta úr mannkynssögunni:
Gríðarlega erfið spurning en ætla
að segja Arnold Schwarzenegger
vegna þess að ég held að enginn
hafi notið velgengni á jafn mörgum
mismunandi sviðum og sá maður
og ég gæti líklega lært ýmislegt frá
honum.
Hvaða bók lastu síðast: Það var
ítalska morðgátan “Il Nome Della
Rosa” eftir Umberto Eco
Uppáhalds íþróttamaður og
íþróttafélag: Það breytist oft
en akkúrat núna er það DeMar
DeRozan og Chicago Bulls sem
ég vona að vinni titilinn í ár. Svo
er Max Verstappen í Formúlunni í
öðru sæti.
Ertu hjátrúarfullur: Er lærður
vísindamaður þannig það er
kannski ekki við hæfi að vera
hjátrúarfullur.
Uppáhalds sjónvarpsefni:
Demantamótaröðin í frjálsum eða
NBA Playoffs, svo líka bara góð
kvikmynd.
Hvaða tónlist kemur þér í gott
skap: Mjög hrifinn af nýjustu
plötu The Weeknd sem kom út á
árinu og heitir Dawn FM.
Eitthvað sem þú vilt bæta við?
Væri gaman að sjá sem flesta
í Vestmannaeyjahlaupinu í
september og ég hvet alla
Vestmannaeyinga til þess að
taka þátt því það er alveg einstök
upplifun.
EYJAMAÐURINN
Ætla að verða eins góður íþrótta-
maður og ég mögulega get
Hlynur Andrésson