Goðasteinn - 01.09.1964, Page 96

Þekkt er sögn frá þeirri tíð,
er Þrasi forðum byggði Skóga,
að þar sæist gullið glóa
gegnum flauminn langa hríð.
Enginn hefur ennþá náð
auðlegð þeirri, er fossinn geymir,
æskuna þó um það dreymir,
að hún muni finna ráð.
Ef menn leggja á þig bönd
eða hindra göngu þína,
aldrei framar í þér skína
óska, vona og draumalönd.
Vonum enn, að verðir þú
vegfarandans unaðs gjafi,
uppi á landi og úti í hafi
óstöðvandi, fyrr og nú.
Þú hefur runnið ár og öld
alltaf keppt að sama marki,
vek með þínum vilja og kjarki
vona ljósin þúsund föld.