Bændablaðið - 15.08.2024, Blaðsíða 12

12 Fréttir Bændablaðið | Fimmtudagur 15. ágúst 2024
Veiðitímabil á hreindýrstarfa
hófst 15. júlí og hreindýrskúa 1.
ágúst. Það sem af er hafa veiðst
u.þ.b. 121 tarfur og 14 kýr.
Jóhann G. Gunnarsson, sér-
fræðingur í teymi lífríkis og
veiðistjórnunar hjá Umhverfis-
stofnun, segir veiðar fara frekar
hægt af stað. „Mikið hefur verið
um þokur í því hægviðri sem verið
hefur undanfarnar vikur,“ segir
hann. Búið sé að veiða tarfa á öllum
veiðisvæðum. Þó mest á svæðum eitt
og sex, þar sem kvótinn á törfum sé
hvað hæstur.
„Dýrin eru vel á sig komin og
búið að fella nokkra tarfa sem hafa
verið um og yfir 100 kg í fallþunga.
Menn verða að nýta alla góða daga
sem gefast í veðrinu og fylgjast vel
með þannig að ekki verði örtröð
seint á veiðitímanum. Þó að kvótinn
sé lítill á mörgum svæðum þá getur
það gerst,“ segir Jóhann. Hann
bendir jafnframt á að á veiðisvæði
tvö sé lítill kvóti eins og í fyrra vegna
fæðar dýra á Fljótsdalsheiðinni og
víðar á svæði tvö.
Átta hundruð dýra kvóti
Í ár er heimilt að veiða allt að 800
hreindýr; 397 kýr og 403 tarfa.
Kvótinn er sá minnsti í mörg ár.
Gjald fyrir veiðileyfi á tarf er 193
þúsund krónur og 110 þúsund fyrir
kú. Veiðitíma á tarfa lýkur 15.
september og á kýr 20. september.
Á tímabilinu 1. nóvember til og
með 20. nóvember eru veiðar á kúm
þó heimilaðar á svæðum átta og níu
samkvæmt þar til bæru veiðileyfi.
Námskeið fyrir nýja leiðsögu-
menn með hreindýraveiðum var
haldið í vetur. „Þeir sem sátu það
þurfa svo að fara tvær veiðiferðir sem
nemar með reyndum leiðsögumanni
og þegar það er í höfn ásamt öðrum
skilyrðum þá fá þeir skírteinið
í hendur,“ útskýrir Jóhann. Um
miðjan ágúst voru 11 af 32 komnir
með réttindin.
Veitt sé sem vestast
Sérstök tilmæli eru frá Umhverfis-
stofnun um að veiðimenn leitist við
að veiða sem stærstan hluta kvótans
á svæði níu vestast á svæðinu í
Suðursveit. Er tilgangurinn að draga
úr líkum á að hreindýrin á svæði níu
leiti milli sauðfjárveikivarnahólfa
yfir í Öræfasveit, sem og að stuðla að
fækkun hreindýra sem gengið hafi
á Breiðamerkursandi og valdi þar
gróðurskemmdum. /sá
Hreindýraveiðar:
Þoka hefur torveldað veiðiskap
Heimilt er að veiða 800 hreindýr í ár. Nú er búið að veiða rúmlega 120 tarfa og á annan tug kúa. Mynd / pvdberg
Veiðisvæði hreindýra.
Fiskeldisskóli slær í gegn
Nemendur Fiskeldisskóla unga fólksins í Þorlákshöfn en krakkarnir heimsóttu
meðal annars laxeldisfyrirtækið First Water. Mynd / Aðsend
Fiskeldisskóli unga fólksins hefur
víða verið vel sóttur í sumar.
Fiskeldisskólinn er samstarfs-
verkefni vinnuskóla sveitarfélaga,
Sjávarútvegsmiðstöðvar Háskólans
á Akureyri og fyrirtækja í fiskeldi.
Honum er ætlað að bæta menntun
tengda fiskeldi og miðla þekkingu
til krakka á aldrinum 14-16
ára. Kennarar eru nemendur
sjávarútvegsdeildar Háskólans á
Akureyri, ýmist útskrifaðir eða enn
í námi.
„Skólinn hefur gengið mjög
vel og mikill áhugi er á honum.
Í sumar vorum við til dæmis að
kenna í fyrsta sinn á Húsavík og í
Þorlákshöfn en við höfum einnig
kennt hann í Vesturbyggð og á
Djúpavogi. Fiskeldisskólinn er
hluti af „Bridges VET“ verkefni,
sem er samstarfsverkefni Íslands,
Noregs, Svíþjóðar og Finnlands
um nám í fiskeldi,“ segir Guðrún
Arndís Jónsdóttir, forstöðumaður
í Háskólanum í Akureyri, alsæl
með áhuga unga fólksins á
fiskeldisskólanum. /mhh
Matís og Landbúnaðarháskóli
Íslands hafa gert með sér samstarfs-
samning til að auka þekkingu og
bæta þjónustu á sviði landbúnaðar
og matvælaframleiðslu.
Samningurinn var staðfestur í
júlíbyrjun og er um rannsóknasamstarf
bæði í innlendum sem erlendum
verkefnum og samstarf um tillögur
og sérverkefni fyrir stjórnvöld á sviði
landbúnaðar og matvæla.
Segir í fréttatilkynningu að samstarf
verði um uppbyggingu rannsókna-
innviða og sérfræðiþekkingar þar
sem við á. Sérfræðingar beggja munu
tengjast betur í gegnum sameiginleg
verkefni.
Áherslusviðin þar sem samstarfið
mun gagnast eru t.d. sauðfjárrækt,
kynbætur (erfðafræði), ný prótein,
tenging vinnslu og frumframleiðslu,
nýting hliðarafurða, fóður, áburður,
vöruþróun og samstarf við neytendur.
Þá er stefnt að nýtingu sértækra
rannsóknainnviða hvorrar stofnunar
um sig til að skapa samlegðaráhrif
í starfsemi og um leið að styrkja
rekstrarforsendur innviðanna.
Gert er ráð fyrir vinnu nýdoktora,
doktors- og eða meistaranema í
völdum samstarfsverkefnum og skulu
þeir að jafnaði vera undir leiðsögn
sérfræðinga annars eða beggja
aðila. Leitast verður við að fjölga
doktorsnemum á sviði landbúnaðar
og matvæla.
Jafnframt verður lögð sérstök
áhersla á nýtingu á erlendum
tengslanetum í Evrópu og
Norðurlöndum, sbr. UNIgreen og
öðrum samstarfsaðilum eftir því sem
við á. /sá
Saman í rannsóknir
Nú í byrjun ágúst staðfestu íslensk stjórnvöld aðgerða-
áætlun gegn sýklalyfjaónæmi, sem talin er vera ein
helsta heilbrigðisógn samtímans.
Hingað til hefur sýklalyfjaónæmi ekki verið jafnstórt
vandamál á Íslandi og víða annars staðar, en samkvæmt
aðgerðaáætluninni hefur það farið vaxandi hér á
undanförnum árum.
Talið er að aukið sýklalyfjaónæmi muni valda
erfiðleikum við meðhöndlun ýmissa sjúkdóma og
sýkinga, auka dánartíðni og kostnað í heilbrigðiskerfinu.
Sú hætta er metin raunveruleg að í náinni framtíð
verði ekki hægt að meðhöndla einfaldar og alvarlegar
sýkingar með sýklalyfjum.
Regluleg vöktun
Undir aðgerðaáætlunina skrifuðu Willum Þór Þórs-
son heilbrigðisráðherra, Bjarkey Olsen Gunnars-
dóttir matvælaráðherra og Guðlaugur Þór Þórðarson
umhverfisráðherra. Aðgerðaáætluninni var skilað
til Willums í byrjun árs en að vinnu hennar kom
þverfaglegur starfshópur.
Eitt af markmiðum áætlunarinnar er að bæta yfirsýn
og þekkingu á útbreiðslu sýklalyfjaónæmra baktería
og sýklalyfjaleifa í umhverfinu, hjá mönnum, dýrum
og í matvælum. Það verður gert með því að koma á
reglulegri vöktun en til þess þarf Umhverfisstofnun
úrræði eins og mannafla og fjármagn – en fyrir því er
gert ráð fyrir í kostnaðaráætlun aðgerðaáætlunarinnar.
Meira eftirlit og aukin fræðsla
Helstu aðgerðir sem snúa að landbúnaði og
matvælaframleiðslu snúa að meira eftirliti með notkun
sýklalyfja í dýrum, auka fræðslu til almennings,
dýralækna og matvælaframleiðenda.
Áætlunin nær til áranna 2025–2029 og inniheldur
sex aðgerðir sem fela í sér 24 markmið og 75 verkefni
sem nauðsynlegt er að hrinda í framkvæmd. /smh
Sýklalyfjaónæmi:
Aðgerðaáætlun staðfest
Aukin fræðsla til almennings, dýralækna og matvæla-
framleiðenda er meðal helstu aðgerða sem snúa að
landbúnaði og matvælaframleiðslu. Mynd / smh