Æskan - 01.11.1980, Blaðsíða 21

GRÝLUKVÆÐI
eftir Jóhannes úr Kötlum
Grýla hét tröllkerling leið og ljót,
með ferlega hönd og haltan fót.
I hömrunum bjó hún og horfði yfir sveit,
var stundum mögur og stundum feit.
Á börnunum valt það hvað Grýla átti gott,
og hvort hún fékk mat í sinn poka og sinn pott.
Ef góð voru börnin var Grýla svöng,
og raulaði ófagran sultarsöng.
Ef slæm voru börnin varð Grýla glöð,
og fálmaði í pokann sinn fingrahröð.
Og skálmaði úr hamrinum heldur gleið,
og óð inn í bæina — beina leið.
Þar tók hún hin óþekku angaskinn,
og potaði þeim nið’r í pokann sinn.
Og heim til sín aftur svo hélt hún fljótt,
— undir pottinum fuðraði fram á nótt.
Um annað, sem gerðist þar, enginn veit,
— en Grýla varð samstundis södd og feit.
Hún hló, svo að nötraði hamarinn,
og kyssti hann Leppalúða sinn.
Svo var það eitt sinn um einhver jól,
að börnin fengu buxur og kjól.
Og þau voru öll svo undurgóð,
að Grýla varð hrædd og hissa stóð.
En við þetta lengi lengi sat,
I fjórtán daga hún fékk ei mat.
Þá varð hún svo mikið veslings hró,
að loksins í bólið hún lagðist — og dó.
En Leppalúði við bólið beið,
— og síðan fór hann þá sömu leið.
Nú íslenzku börnin þess eins ég bið,
að þau láti ekki hjúin lifna við.
Lengstu geimferðinni lauk 11. október
s. I., þegar tveir sovéskir geimfarar,
Leonid Popov og Valery Ryumin, sneru
aftur til jarðar í Soyuz 37 frá geimstöðinni
Salyut 6. Geimförunum var skotið frá sov-
ésku Mið-Asíu 9. apríl. Þeir voru 185
daga í geimnum. Popov var sæmdur orð-
unni „Hetja Sovétríkjanna“ og Ryumin
annarri Lenínorðu. Ryumin átti fyrra
geimdvalarmet ásamt öðrum geimfara,
175 daga og 36 mínútur.
Vestur-þýski ævintýramaðurinn Jaromir
Wagner var í október s. I. fyrstur manna til
að ferðast yfir Atlantshafið standandi úti á
þekju flugvélar. Ferðin tók tæpar 50
HEIMSMET
klukkustundir í sjö áföngum. Erfiðasti
kaflinn var frá Reykjavík til Narssarssuaq
á Vesturströnd Grænlands.
Maður nokkur í Danmörku, er heitir
Magnus Jensen, telur sig hafa sett nýtt
heimsmet í að segja brandara, 24 klukku-
stundir og 5 mínútur. Aðspurður sagðist
Jensen hafa safnað bröndurum og
skemmtisögum frá því hann var drengur.
Áður en yfir lauk hafði hann sagt 4000
þeirra, þrátt fyrir að hæsi gerði honum
erfitt fyrir. Hann mun að sjálfsögðu krefj-
ast þess að „Heimsmetabók Guinnes"
viðurkenni afrekið.
19